29 майæ 5 июнмæ Хуссар Ирыстоны территорийыл æрцыдис иу фыдракæнд æмæ раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикæйы фæндæгтыл æрцыдис æртæ фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой дыууæ адæймаджы.
Алыгъуызон бархалыны фæдыл горæты милицийы управленийы кусджытæ бæрндзинадмæ æркодтой 16 адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 259 фæткхалæн цауы. Уыдонæй æхсæз уыдысты нозтджынæй машинæ скъæрыны цаутæ.
31 майы горæт Цхинвалы мидхъуыддæгты управленийы кусджытæ оперативон информацийы фæдыл æрцахстой 64-аздзыд бынæттон цæрæджы. Ацы фыдгæнæджы рагæй агурынц уæрæсейаг барадхъахъхъæнæг органтæ фæлывд митæ саразыны тыххæй æмæ бахатыдысты сæ хуссарирыстойнаг коллегæтæм, цæмæй сын баххуыс кæной. Ныр ын экстрадици сараздзысты Уæрæсейы Федерацимæ.
1 июны Знауыры милицийы хайадмæ фехъусын кодтой, зæгъгæ Аунеуы хъæуы фосдарæн комплексæй адавтой æхсæз автомобилон уæзбарæны. Оперативон-сгарæн мадзæлттæ ауадзыны фæстиуæгæн бæлвырд æрцыд къæрных – разынд горæттаг 32-аздзыд цæрæг, кæцы басаст йæ фыдракæндыл. Уымæй уæлдай ма рабæрæг, ацы фыдгæнæг ма комплексæй кæй адавта æфсæн бак æмæ аст та æфсæн хæтæлтæ. Къæрных конд æрцыд рæстæгмæдарæн изоляторы.
2 июны милицимæ фехъусын кодтой, зæгъгæ Знауыры районы Сунисы хъæуы хисæрмагонд æдзæрæг хæдзары ссардтой тæссаг предметтæ. Бынатмæ ссыдысты сапертæ æмæ сбæлвырд кодтой, тæссаг предметтæ кæй сты гранат-æхсæны рæмудзæн хай æмæ 30 та автомат Калашниковайы нæмгуытæ.
4 июны горæт Цхинвалы Мæскуыйаг микрорайоны ссыгъд æрдæгарæзт хисæрмагонд хæдзар. Бынатмæ ссыдысты зынгхуыссынгæнæн службæйы кусджытæ æмæ йæ ахуыссын кодтой. Зынг аххуыссын кæныны рæстæджы афæлдæхт службæйон автомашинæ «Камаз» – йæ шофыр бахауд рынчындонмæ.
Милицийы наркотикты ӕрзылды контроль кӕныны управленийы кусджытӕ баурæдтой нæ горæты 38-аздзыд цæрæджы, кæцымæ сæ зæрдæ фехсайдта наркотикон буарадтæй æмæ медицинон препарат «Лирика»-йæ спайда кæнынмæ. Фæткхалæг нæ бакуымдта медицинон басгæрстмæ æмæ йæ горæт Цхинвалы тæрхондон фæивар кодта 80 мин сомы.
