12-æм апрелы, Космонавтикæйы боны, Дзæуджыхъæуы космикон тæхæг аппаратты конструктор, Советон Цæдисы паддзахадон премийы лауреат Комайты Русланы номыл космонавтикæйы скъолайы байгом кодтой ног экспонат.
Цæгат Ирыстон-Аланийы Сæргълæууæг Сергей Меняйло йæ Телеграм-каналы куыд радзырдта, афтæмæй, уый у нау «Союз»-ы аппарат. Йæ диаметр у 2,5 метры, йæ уæз та – 2 тоннæйы. Ацы капсулæйы космонавттæ хизынц космикон станц æмæ Зæххы ‘хсæн. 2014 азы уый ауагътой космосмæ. Меняйлойы ныхæстæм гæсгæ, Цæгат Ирыстонæн ацы аппарат йæ къухты хуымæтæджы нæ бафтыд. Райдианы капсулæйы фæнд кодтой космонавт Антон Шкаплеровы музеймæ радтын – уым уый интернационалон командæйы сконды хызт Зæххмæ. «Ныр алкæмæндæр йæ бон уыдзæн æрбацæуын æмæ капсулæ фенын. Уæддæр космикон объект æрбацыд номхуындæй, махмæ, Дзæуджыхъæумæ! Бузныг Роскосмосы генералон директор Юрий Борисовæн йæ фарсхæцынады тыххæй. Махæн Роскосмосимæ разæй ис бирæ иумæйаг плæнттæ. Уырны нæ алцыдæр нæ къухты кæй бафтдзæн, уый!», – банысан кодта Сергей Меняйло æмæ ма йæ ныхасмæ бафтыдта, зæгъгæ, космонавт Антон Шкаплеров баныфсæвæрдта Цæгат Ирыстонмæ æрцæуынæй.
Сергей Меняйло ма загъта, зæгъгæ, космонавтикæйы скъолайы æвзонг ахуыргæнинæгтæ, фидæны инженертæ, физиктæ, химиктæ кæддæр сæ нæмттæ кæй ныффысдзысты космос басæттыны уæрæсейаг историйы чиныджы.
Космонавтикæйы скъола Дзæуджыхъæуы байгом æрцыд 2020 азы космикон тæхæг аппаратты конструктор Ко-майты Русланы хъæппæрисæй. Ам ахуыр кæны 400 сывæллонæй фылдæр. Скъолайы цур ма архайы планетарий дæр, кæцы арæзт æрцыд 60 азы размæ. Кæй фæнды, уыдонæн скъолайы ауадзынц экскурситæ, мастер-къластæ.
