Куадзæн ирон адæм тынг рагæй бæрæг кæнынц. Кæд æй ныр Йесо Чырыстийы райгасимæ бæттынц чырыстон дины кусджытæ æмæ чырыстон дингæнджытæ, уæддæр Чырыстийы райгуырдæй рагондæр у. Бæрæг æй кодтой Иудейы дæр. Маркы Евангелийы ис сæргонд «Куадзæны æхсæвæр». Уый райдайы афтæ: «Донгонд дзултæ бæрæгбоны фыццаг бон, Куадзæны уæрыкк æргæвдыны бон, Йесойæн йæ ахуыргæнинæгтæ загътой: «Куыд Дæ фæнды, кæдæм Дын ацæуæм Куадзæны фынг æвæрынмæ?»
Куадзæны размæ-иу, æрæджы дæр ма, фылдæр адæм, уæлдайдæр хистæр кары фæлтæртæ бирæ рæстæг – авд къуырийы дæргъы дардтой ком, æмæ-иу ацы бæрæгбоны сæ ком суагътой. Комуадзæнæй рауад бæрæгбоны ном – Куадзæн. Вæййы хуыцаубоны, йæ хæдфæстæ къуырисæры та ирон адæм кæнынц Мæрдты Куадзæн. Æмæ мардæн йæ Куадзæны хай уыцы бон ныххæлар кæнынц.
Уæлмæрдмæ зилын, мæрдты ном арын, хойраг, нозт, дыргъ, халсар, адджинаг сын хæлар кæнын ирон адæм сæ уаз хæсыл нымайынц. Уымæн фæзæгъынц: «Хъæубæсты, бинонты фарн базонын дæ кæд фæнды, уæд уал сын, фыццаджыдæр, сæ уæлмæрдмæ бацу. Æнæфснайд, æнæзылдæй йæ баййæфтай, уæд зон: сæ фарн фæцудыдта, фæкъахыр». Ахæм хъæубæстæ, бинонтæ уæд ныллæууынц сæ мæгуыры фæндагыл – удыхъæд, зонд, æнгомдзинад æмæ мулкæй.
Æрдзæн ис афæдзы цыппар афоны: уалдзæг, сæрд, фæззæг, зымæг. Ирон цардæн та йæ афæдзы афонтæ сты æртæ – цыппæргай мæйтæй. Уыдонæй иу у Цыппурсæй Куадзæнмæ, дыккаг Куадзæнæй Майрæмы Куадзæнмæ, æртыккаг Майрæмы Куадзæнæй Цыппурсмæ. Куадзæн, Майрæмы Куадзæн æмæ Цыппурс – ацы æртæ бæрæгбонæй алкæй агъоммæ дæр ирон адæм дардтой æмæ ныр дæр чидæртæ фæдарынц ком. Куадзæны агъоммæ – авд къуырийы, Майрæмы Куадзæнмæ – цыппæрдæс боны. Цыппурсмæ – цыппор боны. Цыппурс дæр уымæн хуыйны. Ком дарай æви нæ дарай, ирон адæмæй алчидæр йæхицæн хæсыл фæнымайы ацы бæрæгбæтты агъоммæ, æнæмæнг, йæ мæрдты ном ссарын, сæ уæлмæрдтæ сын бафснайын. Афтæмæй нæ уæлмæрдтæ афæдзы дæргъы зылдхъуаг никуы вæййынц. Куадзæнмæ сæ зымæджы «фæлхæрдтæй» ссыгъдæг кæнæм, Майрæмы Куадзæнмæ – сæрдыгон кæрдæгæй, Цыппурсмæ – фæззæджы рыг æмæ хæтæлтæй. Æмæ мæрдтæ дæр хæрзаудæн кæнынц удæгæстыл.
Куадзæн у удсыгъдæггæнæн бæрæгбон. Раздæры азты йæм-иу ирон адæм сæхи цæттæ кодтой стырæй, чысылæй, сыгъдæг зæрдæйæ, алкæй дæр фæндыд уыцы бон куыдхуыздæрæй, хъæлдзæгæй, райзæрдæйæ арвитын. Уый тыххæй бæрæгбоны фынгтæ уыдысты алы хæринæгтæй дзаджджын. Уæлдай цинагдæр-иу уыд сывæллæттæн Куадзæн, алыхуызон ахуырст æйчытæ, сæ ног уæлæдарæсæй сæ рæвдыдтой. Уыцы бон-иу уыд айкæй хæцæн æмæ къамисæн бон дæр. Куадзæны боны ист къамтæ, æвæццæгæн, алкæй хæдзары дæр ис. Уæлдайдæр сывæллонæй ист къамтæ.
Куадзæны бæрæгбон ирон адæмы царды стыр бынат ахста. Чырыстон дин парахатгæнджытæ йæ Йесо Чырыстийы номимæ хуымæтæджы нæ бабастой. Æнæуи дæр ирон адæмон æмæ чырыстон бæрæгбæттæн иудзинæдтæ бирæ ис. Уыцы бон чырыстон дингæнджытæн дæр вæййы дæргъвæтин мархойы фæстæ комуадзæн. Фæцин кæнынц, уыцы бон Чырысти кæй райгас, ууыл. Къуырийы фæстаг бон ирæттæ хонынц – Хуыцауы бон. Уырысмæ та, чырыстон дин сæм тыхджындæр кæй у, уымæ гæсгæ хуыйны Воскресенье – Райгасы бон. Ирæттæй, чырыстон дин чи кæны, уыдонæн дæр Куадзæн баст у Йесо Чырыстийы райгасы бонимæ. Йæ хорзæх уæ алкæй дæр уæд!
Цгъойты Хазби
