УЫДЗÆН НÆМ КОСМОНАВТТÆ…
Ирыстоны бирæ курдиатджын кæстæртæ кæй ис, уыдон сомбонæн уавæртæ аразын кæй хъæуы, ууыл уыд сæ ныхас республикæйы Сæргълæууæг Битарты Вячеслав æмæ Дзæуджыхъæуы наукон центры сæрдар, физикон-математикон наукæты доктор Къусраты Анатолийæн. Куыд зонæм, афтæмæй бæлвырд наукæты скъолатæ махмæ нæй, хъæугæ та æнæмæнг, кæнынц. Æхсызгон куыд нæ уыд, æрæджы фыццаг каналæй шоу “Лучше всех”-ы ирон лæппу Дарчиты Алексы æнтыст. Æмæ нæм ахæмтæ цас ис, фæлæ хатт фадаты аххосæй сæ курдиат нæ раргом вæййы.
Битарты Вячеслав дæнцæгæн æрхаста, æрæджы горæт Красноярскы цы математикон скъола – интернат бабæрæг кодта, уый. Куыд банысан кодта, афтæмæй дзы ахуыр кæнынц, уыцы предметимæ йæ фидæн сбæттынмæ чи хъавынц, уыцы курдиатджын сывæллæттæ. Уыдон арф зонындзинæдтæ исынц математикон наукæтæй, цæмæй фидæны суой дæсны специалисттæ, ахуыргæндтæ. Республикæйы Сæргълæууæг бафæдзæхста ахуыргондæн, цæмæй фылдæр æргом аздахой курдиатджын фæсивæдимæ куыстмæ.
Къусраты Анатоли радзырдта цы сарæзтой, афтæ сæ дарддæры нысанты тыххæй. Куыд загъта, афтæмæй наукон центры хæс у республикæйы социалон-экономикон рæзтæн ахъаз кæнын.
Физикæ, математикæ, астрономион наукæтæ нæ республикæйы æндидзын кæй райдыдтой, уый тынгдæр рабæрæг, æрæджы нæ зындгонд æмзæххон, космикон конструктор, Паддзахадон премийы лауреат Къомайты Руслан кæй фехъусын кодта, уымæй. Уымæн йæ зæрды ис Дзæуджыхъæуы сывæллæтты космонавтикæйы иртасæн центр бакæнын. Куыд загъта, афтæмæй æрыгæттæм стыр цымыдис æвзæрын кæны космонавтикæ, астрономи. Центры сæ бон фенын уыдзæн фыдыбæстæйон космонавтикæйы историимæ баст æрмæджытæ. Ахæм цæстуынгæ æрмæг та сæ хæстæгдæр кæндзæн наукæмæ.
Ахуыргонд ма фæндон бахаста, Дзæуджыхъæуы заууатмæ чи æрцыд, уыцы планетари сног æмæ сфæлгонц кæнын. Уымæй уæлдай ЦИПУ æмæ Хæххон-металлургион институты бындурыл студентон спутник æмæ сывæллæтты нырыккон техникон парк саразын. Ахуыргондæн Битарты Вячеслав ныфс бавæрдта алыаæрсыг æххуыс бакæнынæй.
Кæд ацы фæндтæ царды уагъд æрцæуой, уæд нæ ныфс ис, фидæны нæ чысыл Ирыстоны дæр космонавттæ кæй фæзындзæн, уымæй.
Нæ уацх.
Comments are closed, but trackbacks and pingbacks are open.