Уалдзæджы æрбалæудимæ фæфылдæр сты хъæууон фæллойгæнджыты аудинæгтæ. Сæ тæмæны сты хуым кæнын-тауыны куыстытæ республикæйы хæдзарадты. Ацы хъуыддаджы уыдонæн сæ къух аразынц хорз боныгъæдтæ дæр. Кусынæн бæзгæ бонтæ кæй ахаста, уымæ гæсгæ æмгъуыдæй раздæр райдыдтой хуымгæнæн куыстытæ. Паддзахадон унитарон куыстуат «Ирагропромсервис» фермертæн æххуыс кæны техникæйæ. Сæ курдиæттæм гæсгæ, уыдон ифтонг цæуынц техникæйæ. Ныртæккæ техникæйы 16 иуæджы хуым кæнынц Знауыр, Цхинвал æмæ Ленингоры районты зæххытæ. Уалдзæджы бахуым кæнын, зындгонд куыд у, афтæмæй хуыздæр кæны мæры иумæйаг уавæр, ахъаз кæны уымæлад бахъахъхъæнынæн æмæ активондæр кæны пайдайаг микроорганизмтæ.
“Ирагропромсервис”-ы директор Мамытаты Вахтанг куыд зæгъы, афтæмæй уалдзыгон æндæр куыстытæм дæр цæттæ кæнынц сæ бæрныуæвæг техникæйы.
СЫГЪДÆГ КÆНЫНЦ КЪАНАУЫ
Хъæууон хæдзарады дæлбар куыстуат “Мелеораци»-йы кусджытæ Къостайыхъæуы сыгъдæг кæнынц донхæргæнæн къанауы. Ацы куыстытыл архайынц техникæйы 5 иуæджы.
Куыстытæ фесты æмæ Цхинвал æмæ Знауыры районты къорд хъæуты цæрджытæ ифтонг æрцæудзысты донхæры донæй.
ИФТОНГ ЦÆУЫНЦ ХЪÆУÆГ ÆРМÆДЖЫТÆЙ
Республикæйы архайæг фермертæ æмæ хисæрмагонд хæдзарадтæ, фосмæ цæмæй æмбæлон ветеринарон хъусдард уа, уый тыххæй ветеринарон кусджыты æндæр æмæ æндæр низты ныхмæ хостæй ифтонг кæнын фаг нæу. Уыдон ма хъуамæ ифтонг цæуой, æдзух кæмæй пайда кæнынц, ахæм хардзгæнæн æрмæджытæй. Уыдонмæ хауынц биркъæкæнæнтæ, вакумон пробиркæтæ, шприцтæ æмæ æндæр ахæмтæ.
Ахæм æрмæджытæ æрæджы дих æрцыдысты республикæйы æппæт районты ветеринарон службæтыл.
Хъæууон хæдзарады министрады ветеринари æмæ фосдарды управленийы хисдæр Тедеты Ацæмæз куыд зæгъы, афтæмæй ахæм хардзгæнæн æрмæджытæй дарддæр ма ветеринарон службæтыл дих æрцыдысты дезинфекцигæнæн фæрæзтæ, фос кæм сты уыцы бынæтты дезинфекци скæныны тыххæй.
БЕСТАУТЫ Валя
