Ацы къуырийы нæ республикæмæ Уæрæсейæ æрцæудзæн Бирæпрофилон рынчындоны гемодиализы хайады хæлд аппаратæн диагностикæ чи сараза, ахæм специалист.
Куыд зонæм, афтæмæй гемодиализы аппараттæ ныр дыккаг мæй хæлд сты. Афтæмæй та бирæ пациенттæн къуыри æртæ хатты хъæуы гемодиализ аразын. Ныртæккæ нæ горæты цæры 12 ахæм пациенты. Цалынмæ нæм бынаты нæ сырæзт гемодиализы хайад, уæдмæ æмбæлон медицинон æххуыс райсынмæ нæ цæрджытæ цыдысты Цæгат Ирыстонмæ. Медицинон хæрдзтæ æмæ фæндаггæгтæ рынчынтæн лæвæрдта паддзахад.
2018 азы хайад куы æрбакодтой, уæд уыцы иурæстæджы цыппар пациентæн процедурæтæ кæм аразой, ахæм фадат фæзынд. Аппаратæй сæ иу уыд резервон. Пайда дзы кодтой æрмæстдæр экстренон цауты рæстæджы. Процедурæйы хъæуæг хостæ зынаргъ сты. Хуссар Ирыстоны нæ уыд аппаратыл чи куыстаид, ахæм специалист, уымæ гæсгæ Уæрæсемæ арвыстой ахуыр кæнынмæ цалдæр адæймаджы, ацы ифтонгадыл бакусыны тыххæй сæрмагонд ахуырмæ.
Рынчынтæн цалдæр азы хос кодтой бынаты. Раздæр сæ нымæц уыд 20, фæлæ, хъыгагæн, ныр чидæртæ не ‘хсæн нал сты. Уый нæ нысан кæны æмæ бынаты æвзæр диализ аразынц, кæнæ исты хостæ нæ фаг кæны. Тугсыгъдæггæнæн аппаратæй дарддæр хъуамæ хатæнтæ дæр арæзт уой гъæдджын арæзтадон æрмæджытæй. Уымæн æмæ хатæны зианхæссæг буарадтæ куы фæзына, уæд уыдон æндавдзысты рынчыны æнæниздзинадыл. Гемодиализы хайад уыдæттæй хызт у алцыдæр йæ уагыл ис.
Сæйраг аххосаг у, техникæимæ кæй ничи зоны кусын. Æмæ куы фехæлы, уæд сæ чи сцалцæг кæна, ахæм специалист бынаты нæ разыны. Цалынмæ Уæрæсейæ техниктæ æрцæуынц, уæдмæ рæстæг ацæуы.
Цыма афон нæу, боны фæстагмæ, дохтыртæ, экономисттæ æмæ юристтæ цæттæ кæныны бæсты уал къухæй дæсны специалисттæ бацæттæ кæнын? Нырыккон медицинæ комкоммæ баст у ног технологитимæ. Рынчындоны Хицауад цæуылнæ агуры мадзæлттæ, цæмæй медицинон кусæнгæрзтыл чи куса, ахæм техниктæ фылдæр уа. Ныр та уал уавæр ахæм вæййы: Æнæниздзинады министрад фæрæзтæ фæагуры, цæмæй бадзырд сараза уæрæсейаг специалисттимæ. Хъуыддаг ныддаргъ вæййы, ацæуынц къуыритæ, мæйтæ… Хатгай афæдзтæ дæр…
УАЗÆГТЫ Марфа
