Ацы къуырийы Хъæды хæдзарады управленийы кусджытæ æрæвнæлдтой Ленингоры районы хъæдты талатæ садзынмæ.
Армадз æмæ Лехурайы комы цæрæн пунктты хъæдгæстæй иутæ дзыхъхъытæ къахтой, иннæтæ талатæ сагътой, æртыккæгтæ та сыл дон кодтой. Дарддæр сæ разы сæвæрдтой хæс – кæй хъахъхъæндзысты æмæ ауддзысты хъæды фондыл, хиздзысты сæ алыхуызон низтæй, рæстæгыл уадздзысты профилактикон мадзæлттæ зынгсирвæзт ма æруадзын, куы ‘рцæуа, уæд та йæ ахуыссын кæныны тыххæй.
Æдæппæт ацы районы хъæды хæдзарады кусджытæ хъæды фонд баххæст кæндзысты 2500 хихджын талайæ. Куыд зæгъынц, афтæмæй, цы талатæ садзынц, уыдонæй бирæтæ схъомыл кодтой РХИ-йы Хъæды хæдзарады управленийæн цы талахъомылгæнæндон ис, уым. «Хихджын бæласы хорздзинад æмæ пайдайы хиæдты тыххæй алчидæр зоны. Уымæ гæсгæ фылдæр ахæм талатæ садзæм. Цъуй, бæрз бæлæстæ дæр фаг ныссадздзыстæм. Ахæм куыстытæ афæдз бакæнынц дыууæ хатты. Йæ нысан – хъæды массивты фæзуат фæфылдæр кæнын», – зæгъы Хъæды хæдзарады управленийы сæргълæууæг Чилæхсаты Таймураз.
Уый ма куыд загъта, афтæмæй нæ хъæдтæ хъæздыг сты ахæм бæлæсты мыггæгтæй, куыд – сабæлут, сусхъæд, бæрзбæлас, кæрзбæлас, тæгæр æмæ тулдзæй. Уыдон, се ‘ппæты дæр æрзайын кæнынц, Ирыхъæуы тала-хъомылгæнæндоны. Декоративон талатæ та æрласынц УФ-йæ. Уыдон та сагъд æрцæуынц куыстуæтты, организациты кæртыты. Зæгъæм, ивгъуыд азы паддзахадон ансамбль «Симд»-ы бæстыхайы раз ныссагътой назбæлæстæ. Назбæлас тагъд хъомыл кæны, æмбæлон æркаст æм куы вæййы, уæд. Хъыгагæн, иуæй-иу куыстуæттæ нæ базилынц сæ кæртыты цы бæлæстæ сагъд æрцæуы, уыдонмæ æмæ сын бахус вæййынц.
Чилæхсайы фырт ма куыд зæгъы, афтæмæй цалдæр азы размæ ацы назбæлæстæй ныссагътой Къуернеты хъæуы, уыдис сæм хорз зылд.
Ахæм æнгæс куыстытæ бакæндзысты республикæйы иннæ районты дæр.
УАЗÆГТЫ Марфæ
