Ивгъуыд къуырийы 9-æм июны ацыд сæрдыгон зиу фидæны Экопаркы территори санитарон æгъдауæй ныссыгъдæг кæныны нысанæн.
Иумиагреспубликон зиу расидт Æхсæнадон экологон организаци «Зеленая Алания». Йæ сæргълæууæг Габайты Залинæ дыууæ боны раздæр фехъусын кодта, зæгъгæ, сиды æппæт организацитæ, уагдæттæ, скъолатæ æмæ цæрджытæм, цæмæй бафснайой фидæны Экопаркæн, раздæры Чъехы хъæуы цы бынат рахицæн кодтой, уыцы территори.
Ацы инициативæмæ куыдфæндыйы цæстæй чи нæ кæсы, уыдон иумæйагæй араст сты горæты цæгатаг фарсмæ, цæмæй сæ хайбавæрд бахæссой хорз хъуыддагмæ. Уарзондзинад алфæмблай дунемæ æмæ фидæны улæфæн парк саразыны фæндон æрæмбырд кодта 60 адæймаджы бæрц. Уыдон боныгъæдмæ æнæкæсгæйæ æрæмбырд кодтой быроны 250 голладжы æмæ сæ бакалдтой КамАЗ машинæйы. Цы голлæгтæ дзы нæ бацыд, уыдон та сæхи сæрмагонд машинæтыл аластой. «Акци саразынæн мын баххуыс кодтой политикон партитæ, Паддзахадон университеты активисттæ, студенттæ, компани «Мегафон – Хуссар Ирыстон», «Информацион агентад «Спут-ник-Хуссар Ирыстон», радио «Ир» æмæ раздæры æхсæнадон змæлд «Чистый мир»-ы лæппутæ. Абоны зиу фенын кодта, бирæ организациты минæвæрттæн сæ бон кæй у æрбамбырд уæвын иумæйаг хъуыддаджы тыххæй», – зæгъы Габайты Залинæ.
Зиуы хайадисджытæ ма фæнд кодтой уыцы бон Экопаркы талатæ ныссадзынмæ, фæлæ сæ къæвда бакъуылымпы кодта. Уыцы куыст та бакæндзысты æндæр хатт.
Акцийы хайадисджытæй се ‘ппæтæн дæр лæвæрд æрцыд зæрдылдарæн цайцымæнтæ. Бырон фылдæр чи æрæмбырд кодта, уыдонæн та персоналон лæвæрттæ бакодтой.
УАЗÆГТЫ Марфæ
