Иры хъæуы сæндон арæзт æрцыд æртæ азы размæ. Æмæ сæндон ацы аз та ратдзæн фыццаг тыллæг. Сæнæфсиры сорттæ сты «Шинраз», «Каберне», «Ломиаури», «Чинури». «Уæрæсейы Федерацийæ ацы сорт сæнæфсир ласын нал бахъæудзæн. Фæлæ афтæ мачи ахъуыды кæнæд, ома, бынæттон цæрджытæй нал исдзыстæм продукци. Сæрмагондæй ацы сæнæфсиры сорттæ чи зайын кæны, уыдонимæ дæр кусдзыстæм», – зæгъынц завод «Ирон сæн»-ы пресс-службæйы.
Ацы инвестор нæ республикæмæ æрцыд 2017 азы æмæ æрбынат кодта Цхинвалы раздæры консерваразæн заводы территорийыл. Уым инвестор сæвæрдта нырыккон, бæрзондтехнологон италиаг ифтонггæрзтæ. Сæны алыгъуызтæй дарддæр ма завод уадзы цалдæр хуызы коньяк дæр. Сæ продукци сын фæлхасгæнæг æхсызгонæй æлхæны канд нæхимæ нæ, фæлæ ма нæ республикæйы æддейæ дæр. Заводы продукцийæн фенæн ис Уæрæсейы Федерацийы алы регионты стырдæр супермаркетты тæрхджытыл. «Ирон сæн»-ы продукци æрвылаз дæр бæрзонд бынæттæ бацахсы æппæтадæмон экономикон форум «Продэкспо»-йы.
«Нæ продукцийæн ис бренд «Аланский резерв». Сæн аразæм ахæм сæнæфсиры сорттæй – «Шираз», «Каберне», «Мерло» æмæ «Совиньен»-æй. Нырмæ сæнæфсир ластам УФ-йæ, фæлæ бынæттон сорттæ куыд «Ломиаури» æмæ «Чинури»-йæ дæр иттæг хорз сæн цæуы. Мах архайæм бынæттон арендатортимæ кусыныл, цæмæй уыдонæй æлхæнæм сæнæфсир, фæлæ мах хуызæн стыр куыстуатæн уый фаг нæ вæййы. Стæй мах æрмæстдæр хæрзгъæд продукци æлхæнæм. Иры хъæуы сæндонæй цы тыллæг сисæм, уый дæр нæ уыдзæн мах масштабты фаг. Уымæ гæсгæ цæттæ стæм бадзырдтæ саразынмæ цæрджытимæ», – радзырдтой нын заводы пресс-службæйы.
«Ирон сæн»-ы директор Алексей Цапаев та афтæ загъта: «Ирон адæмы ‘хсæн цы хорз традици ис – алы хæдзары дæр, гæнæнуæвгæйæ, сæн аразын, уый нæ тынг къуылымпы кæны. Перспективон æгъдауæй нæ фæнды европæйаг фæлтæрддзинадæй спайда кæнын ома, фермер зайын кæны сæнæфсир, сæндуцæг аразы сæн, реализаци та ис дистрибютерон компаниты бæрны. Цалдæр азы дæргъы фæд-фæдыл ауагътам сæнæфсиры тыллæг æрæмбырд кæныны бæрæгбон, цæмæй республикæйы цæрджытæ сæ хъусдард аздахой сæнæфсиры куыстмæ. Нæ фарсмæ – иу æрбалæууыдысты Экономикон райрæзты министрад æмæ æндæр официалон адæймæгтæ, республикæйы бынæттон цæрджытæй уыцы куыст чи кæны, уыдон дæр-иу фæхуыдтам. Архайдтам семæ бадзырдтæ саразыныл. Раст зæгъгæйæ, фарон сæнæфсир тынг æвзæр рзад Ирыстоны. Уый тыххæй нын сæ тыллæг цъус адæм ауæй кодтой. Кæй райстам, уыцы гагатæн дæр сæ гъæд бынтондæр нæ бæззыд, фæлæ цæмæй не ‘ууæнк ма фесафæм, уый тыххæй «нæ» нæ дзырдтам. Кæд æмæ нæм ацы аз дæр æрбацæуой, уæддæр та никæй фæхъыг кæндзыстæм. Уыйхыгъд ма сын консультацитæ дæр ратдзыстæм, куыд зилынсæм хъæуы, уый фæдыл. Цы сæндон сарæзтам, уырдæм æрхуыдтам иттæг хорз специалисттæ. Уыдон цæстуарзонæй бацамондзысты сæнæфсиры талатæм афæдзы алы афон дæр куыд зилын хъæуы, уыцы сусæгдзинæдтæ.
ДУДАЙТЫ Авелия
