«Æрвылазон æхсæнадæмон равдыст «Продэкспо-2024» уагъд цæудзæн 5 февралæй 9 февралмæ Мæскуыйы», – хъусын кæны Республикæ Хуссар Ирыстоны базарадон минæвар Уæрæсейы Гогинов Таймураз.
Хæлцад æмæ нозты фадыджы «Продэкспо»-йы равдыст у æрвылазон. Ацы аз уагъд æрцæудзæн 31-æм хатт. РХИ дзы хайад райсдзæн æхсæзæм хатт. Хуссар Ирыстоны стендыл вæййы алыгъуызон продукттæ. Иууыл фылдæр та сæнуадзæн завод «Ирон-сæн»-ы продукци æмæ минералон дæттæ. Нæ фæзуатыл цы продукци вæййы, уый алы хатт дæр цымыдис сæвзæрын кæны дистрибьютортæм. Алы аз дæр ацы равдыстмæ æрбацæуы 60-65 мин адæймагæй фылдæр. Фарон та РХИ-йæн цы стенд рахицæн кодтой, уым æвæрд æрцыд Ленингоры бæгæныуадзæн заводы продукцийы æртæ хуызы – «Аланова», «Ирыстон», «Бордыстар». Уыцы бæгæнытæ ивгъуыд аз призон бынæттæ нæ бацахстой, фæлæ сын фидæны стыр перспективæ ис. Уымæн æмæ æмбисондæн баззадысты Хъелы суадоны диссаджы æууæлтæ, бæгæны та уагъд цæуы сæрмагондæй ацы донæй.
Базарадон минæвар сиды нæ республикæйы амалиуæггæнджытæм, цæмæй хайад райсой банысангонд равдысты. Кæд æмæ, зæгъгæ, искæй фæнды йæ продукци бавдисын, уæд базарадон минæвар цæттæ у æмгуыст бакæнынмæ нæ республикæйы интерестæ хъахъхъæнгæйæ. Уый тыххæй рагацау 2-æм февралмæ бацæуын хъæуы æмæ хи срегистраци кæнын хъæуы Базарадон сæудæджерадон палатамæ æнæаргъæй. Фæлæ кæд искæцы æнтыстджын амалиуæггæнæджы фæнды сæрмагондæй йæхи тыхтæй йæ продукци равдисын, уæддæр РХИ-йы базарадон минæвар йемæ равдысты æмгуыст кæндзæн. Æрмæст амалиуæггæнæгмæ куы уа æппæт æмбæлон документаци, уæд.
Уæ зæрдыл уын лæууын кæнæм Хуссар Ирыстоны стендыл цы продукци æвæрд цæуы, уыдон стыр цымыдис кæй сæвзæрын кæнынц, уæлдай хъусдард вæййы минералон дæттæм. Зæгъæм, «Бæгъиат», «Едыс», «Ossetian» цалдæр хатты хорзæхджын æрцыдысты сыгъзæрин майдантæй. Растдæр ацы æхсæнадон равдысты фæрцы сарæзтой бадзырдтæ æмæ ныр ацы дæттæ фенæн ис Казахстан, Донецк, Луганск, Беларусы республикæты, афтæ ма Уæрæсейы бирæ регионты дæр. 2022 аз та «Иронсæн» цы продукци уадзы, уыдонæн лæвæрд æрцыд сызгъæрин майдан. Уыцы заводы уагъд сæнтæ æмæ коньяктæ абон æнтыстджынæй уæй цæуынц Уæрæсейы базары.
УАЗÆГТЫ Марфæ
