Бæрæгбонон программæйы фæлгæтты 26 августы театралон фæзуаты уыд Ирон къæбицы равдыст æмæ хъазтизæр. Цытджын мадзалы фæстæ ардæм фæуазæг сты республикæйы Сæргълæууæг Гаглойты Алан, хицауады уæнгтæ æмæ уазджытæ. «Ирон къæбиц»-ы сæ фæззыгон фæлхас адæмы размæ рахастой Цхинвалы районы хъæутæ. Цытджын уазджытæн ирон фынджы æгъдæуттæ равдыста нæ республикæйы æмбæстаг Дзабиты Михаил. Уый ирон æгъдаумæ гæсгæ Стыр Хуыцау æмæ зæдтыл бафæдзæхста æрбацæуджыты æмæ æппæт ирон адæмы æмæ нуазæн радта Гаглойты Аланмæ. Президент йæхи рады раарфæ кодта бæрæгбоны цытæн. Уый фæстæ ирон нуазæны дзаггарзæй раарфæ кодтой уазджытæ дæр æмæ ацаходыдтой уæливыхтæ æмæ кусæрттаджы æртæ фæрсчы кæрдихтæй.
Кæд иннæ азтимæ абаргæйæ ацы бæрæгбоны къаддæр адæм уыд, уæддæр дзы чи уыд, уыдоны цæсгæмттыл зындис бæрæгбонон зæрдæйы равг. Районы хъæуты цæрджытæ сæ фынгтыл равæрдтой сæ тымбылæг иу метрмæ æввахс кæмæн уыд, ахæм цымыдисон æртæ уæливыхы, алыгъуызон ссывдтытæ, физонæг, ирон дзыкка, сойджын цыхт, хæдзарон бæгæны æмæ ирон къæбицы алыгъуызон хæринæгтæ æмæ нуазинæгтæ, цæхæрадæтты хиæркæнгæ халсæрттæ æмæ дыргътæ. Уазджыты зæрдæмæ уæлдай тынгдæр фæцыдысты уæливыхтæ. «Рагæй хъуыстон ирон къæбицы хæрзаддзинады тыххæй, фæлæ ныртæккæ мæхæдæг куы ацаходыдтон, уæд бамбæрстон, ацы хæринæгты адæн æппындæр кæй ницæимæ ис абарæн», – загъта Никарагуайы Фæсарæйнаг хъуыддæгты министр Денис Роналдо Монкада Колиндрес, дзаджджын цæхæраджыны карст хæргæйæ.
Уазджыты ма сбуц кодтой ирон национ кафтытæ æмæ зарджыты цыбыр хъазтизæрæй. Ам фæсивæды къордтæ æмæ «Амонд»-ы ансамбль аив сæххæст кодтой «Симд», «Хонгæ», «Чепена», «Хъаматимæ кафт», «Уæладзыгон кафт» æмæ æндæр традицион кæфтытæ æмæ хъæлдзæг зарджытæ.
Стыр цымыдисимæ уазджытæ æрвыстой сæ рæстæг театралон фæзуаты.
ХУЫГАТЫ Миленæ
