Дзæуджыхъæуы футболон командæ «Алани» Мæскуыйы йæхи цæттæ кæны ног сезонмæ. Командæ цæттæгæнæн сборты рæстæджы акодта дыууæ контролон хъазты. Нырма уал фембæлд «Уфа»-имæ, стæй та – дыккаг дивизионы лидертæй сæ иу – «Челябинск»-имæ. Дыууæ хъазт дæр фесты 0:0 хыгъдæй.
Фæстæдæр куыд фæбæрæг, афтæмæй «Алани» Национ футболон къорды чемпионаты фыццаг туры фембæлдзæн «Уфа»-имæ. Хъазт уыдзæн 13 июлы, кæнæ та – 14 июлы. Дыккаг туры та 21-22 июлы ацæудзæн «Тюмень»-мæ.
Ног сезоны райдианмæ ивындзинæдтæ цæуы командæйы сконды дæр. Арендæйы «Алани»-мæ æрбацыд «Краснодар»-ы 21-аздзыд централон æрдæгхъахъхъæнæг Кокойты Давид. Бадзырдмæ гæсгæ кæд футболист тренерон штабы зæрдæмæ куы фæцæуы, уæд сын бар уыдзæн йæ балхæнынæн.
САМБО
Кæсæг-Балхъары уагъд æрцыд Советон Цæдисы спорты дæсны Казбек Панаговы номарæн æппæтуæрæсейон турнир самбойæ. Ерысты сæхи хорз равдыстой ирон богалтæ. Сыгъзæрин майдантæ рамбылдтой Тасойты Алик (98 кг) æмæ Гæджиты Зауырбег (+98 кг). Æвзист призертæ систы Колыты Тамерлан (64 кг), Хуытыгты Дзамболат (88 кг) æмæ Джиоты Аслан (+98 кг). Бронзæйон хорзæхтæ та бафтыдысты Кæркуысты Георги (79 кг) æмæ Хацырты Петры (98 кг) къухты.
ХУРИТЫ Батрадз