Рæхджы хуссарирыстойнаг чиныгкæсджытæ сæ къухтæм райсдзысты æмæ хуыздæр базонгæ уыдзысты Ирыстон æмæ Уæрæсейы культурæйы дины фарстатæ æмæ ивгъуыд æнусты философи куыд бæрæг цыдис æмæ философты хъуыдытæ бæстон æмæ цымыдисонæй æвдыст кæм æрцыдысты, ахæм ног чиныгимæ. Йæ рацыд куыд авторæн, афтæ æхсæнадæн дæр хъуамæ суа стыр цины хъуыддаг, уыимæ иумæ пайда æрхæсса ахуыры фæндагыл чи ныллæууыд æмæ ныллæудзæн, уыдонæн. Ацы чиныгæй фæхъæздыгдæр уыдзæн Хуссар Ирыстоны чингуыты фонд.
Хуссар Ирыстоны паддзахадон университеты философийы кафедрæйы доцент, республикæйы уæлдæр скъолайы сгуыхт кусæг Хуыбиаты Соняйын чиныг «Философи. Культурæ. Дин», зæгъгæ, уый кой кæнæм. Чиныгæн презентаци уыдис нæ горæты Анахарсисы номыл Национ библиотекæйы конференцзалы. Фæуазæг æм сты авторы хæлæрттæ, йæ коллегæтæ, сфæлдыстадон интеллигенцийы минæвæрттæ, Хицауады бæрнон кусджытæ.
Хуыбиаты Соняйы куыст æмæ архайды фæдыл, стæй чиныджы тыххæй йæ хъуыдытæ загъта нæ университеты философи æмæ культурологийы кафедрæйы профессор, философон зонæдты кандидат Дзугаты Къоста. Уый банысан кодта чиныджы нысаниуæг, афтæ ма авторы къухты бирæ кæй æфты æмæ зæрдиагæй кæй бакуыста чиныджы рацыдыл, уый.
«Абон мах цы чиныгæн аразæм презентаци, уый æвдисæн у, автор иттæг хорз кæй зоны рæгъмæ цы фарстатæ хæссы, уыдон æмæ йæ хъуыдыкæнынады культурæ дæр йæ раны кæй ис, уый. Мæн фидарæй уырны, ацы чиныг уæрæх аудиторийæн кæй уыдзæн цымыдисон æмæ хъæуæг куыд Ирыстоны, афтæ республикæйæн æдтейæ дæр. Кæй зæгъын æй хъæуы, стыр æххуыс уыдзæн студенттæн дæр сæ ахуыры рæстæджы», – банысан кодта Дзугаты Къоста. Уый ма зæрдæбынæй раарфæ кодта йæ коллегæйæн æмæ йын йæ цæст бауарзта ног æнтыстытæ йе сфæлдыстадон куысты æмæ фидар æнæниздзинад.
Республикæ Хуссар Ирыстоны Фæсарæйнаг хъуыддæгты министр Джиоты Æхсар дæр арфæ ракодта Хуыбиаты чызгæн, ахæм егъау æмæ бындурон куыст кæй бакодта, уый тыххæй æмæ банысан кодта чиныджы нысаниуæг. Студентты æнæмæнг ацы чиныджы сæр кæй бахъæудзæн, уый дæр банысан кодта министр.
Университеты ректор Тедеты Вадим дæр йæ рады банысан кодта университеты философи æмæ культурологийы кафедрæйы кусджытæ се ‘ппæт дæр кæй сты, баивæн кæмæн нæй, ахæм дæсны специалисттæ. Тедеты Вадим ма банысан кодта Хуыбиаты Соняйы стыр æнтыст æмæ загъта, зæгъгæ, университет сæрыстыр у йæ номдзыд ахуыргæндтæй. Уый фæстæ зæрдæбын арфæйы ныхæстæ загъта авторы адресыл.
Нæ уацх.
