Уырыссаг традициты бæрæгбон «Масленица» банысан кодтой 15-æм мартъийы Пионерты парчы. Йæ саразыныл бакуыстой нæ горæты уæвæг «Æмфыдыбæстæйонты» æхсæнад æмæ парти «Ныхас»-ы æвзонг фæлтæры къорд.
Парти «Ныхас»-ы уæнгтæ райсом 11 сахатыл Пионерты парчы айтыгътой даргъ фынг æмæ йыл æрæвæрдтой 300 лауызы. Æхсырысæртæ, джем, мыд, сгущенкæ – кæмæн цы агуырдта йæ зæрдæ, уыимæ аходыдтой хæрзад лауызтæ.
Этнобæрæгбон хицæнæй сарæзтой «Русский дом»-ы организаци дæр. Уыдонæн та парчы иннæ кæрон уыд сæ бæрæгбон. Уазджытыл уыдон дæр æмбæлдысты тæвд цай æмæ уырыссаг лауызтимæ. Бæрæгбоны ма хайад райстой дзулфыцæн комбинаты кусджытæ. Уыдон равдыстмæ æрбахастой дзулы цалдæр хуызы æмæ адджын кæрдзынтæ. Уыдис ма сæм бæгæны æмæ уæлибыхтæ дæр. Ам ма хайад райстой къухæй æрмдæснытæ. Уыдон та равдыстмæ æрбахастой сæхи къухтæй конд куклæтæ æмæ хъæдæрмæгæй конд хæдзарон дзаумæттæ.
«Масленица»-йы бæрæгбоны музыкалон пограммæ уыд хъæздыг æмæ цымыдисон. Ирд æмæ зæрдæмæдзæугæ номыртæ бацæттæ кодтой нæхи сывæллæттæ дæр. Цхинвалы скъола-интернаты хореографионвокалон æмæ инструменталон коллективтæ зарыдысты куыд уырыссаг, афтæ ирон зарджытæ дæр.
«Масленица»-йы бæрæгбоны традицийы тыххæй радзырдта «Русский дом»-ы уæнг Светлана Старцева:
– «Ацы бæрæгбон фæндараст зæгъы зымæгæн æмæ, уалдзæгæн та – æгасцæуай. Бæрæгбон ахæссы 7 боны. Уырыссаг адæм къуырийы дæргъы фæкæнынц лауызтæ æмæ сæ барынц хуримæ, ома сты тымбыл æмæ хъарм хурау. Ацы къуыри алчидæр архайы, цæмæй куыд хуыздæрæй равдиса йæхи. Лауызтæ та фынгмæ рахæссынц мыдимæ, джемимæ. Ацы къуырийæ-иу райдыдтой æнхъæлмæ кæсын уалдзæгмæ. Адæмы хъуыдымæ гæсгæ ацы бæрæгбон куыд арвитай, афтæ ацæудзæн æнæхъæн афæдз. Ацы къуыри стыр комбæттæны размæ у фæстаг чырыстон дины амындмæ гæсгæ. Уымæ гæсгæ ферох кæнын хъæуы æппæт мæстытæ, быцæутæ, хъæуы кафын, зарын. Къуырийы кæронмæ æнæмæнг хъæуы бафидауын алкæимæ дæр æмæ ма хатыр ракурын хъæуы, кæд æмæ искæйы зæрдæхудты бацыдтæ, уæд. Ацы бонты ма дарын хъæуы цымыдисаг костюмтæ, алыгъуызон хъæлдзæг маскæтæ. Уый фæстæ басудзынц уынджы быдыргъ æмæ уый адыл хæрзбон зæгъынц зымæгæн.
УАЗÆГТЫ Марфа
