Милицæйы æнахъомты хъуыддæгты фæдыл æмæ фæндагон змæлды æдасдзинады инспектортæ республикæйы скъолаты уадзынц профилактикон фембæлдтытæ хистæркъласонтимæ æмæ сæ ныййарджытимæ. Ацы хъуыддаджы ма хайад исынц ахуырдонты разамонджытæ дæр.

Ӕнахъомты хъуыддæгты фæдыл инспектортæ рауагъдон кълæстæн æмбарын кæнынц, фæткхалæн цау кæнæ фыдракæнд куы саразай, уæд цахæм бæрндзинад ахæсдзæнис аххосджын, уыдæттыл. Радзурынц сын карз нозтыты зианхæссæг миниуджытыл, æмæ ма æнæххæст кары сывæллон куы фæнозтджын вæййы, уæд куыд æрцæуы æфхæрд. Уымæй уæлдай ма сын амонынц, æхсæнадон бынæтты æмæ массон мадзæлтты рæстæджы уагахаст цахæм хъуамæ уа.

Фæндагон змæлды æдасдзинады инспектортæ та хъусдард аздæхтой фæндагон фæткойтæм. Бамбарын сын кодтой, закъоны фæлгæтты кæй нæ ис æнæххæст кары сывæллонæн машинæ скъæрыны бар, ома, йыл æнæмæнг хъуамæ сæххæст уа 18 азы. Фыдбылызтæй кæстæрты бахизыны тыххæй инспектортæ æрсидтысты ныййарджытæм, цæмæй цырддзаст уой, уæлдай тынгдæр хъахъхъæной сæ сывæллæтты æмæ сæм ма дæттой сæ машинæты дæгъæлтæ. Ӕмбæлон гæххæттытæ куы нæ уа шофырмæ, уæд бæрндзинад хæссы машинæйы хицау. Стæй ма шофыр куы разына æнæххæст кары сывæллон æмæ ма уыимæ куы уа нозтджын, уæд дæр бæрндзинад хæссы машинæйы хицау – йæ бары гæххæттытæ йын байсынц иу аз æмæ æрдæджы æмгъуыдмæ æмæ ма йæ фæивар кæнынц 20 мин сомы. Автомашинæ та æвæрд æрцæуы сæрмагонд иварон бынаты.

Уымæй уæлдай ма æнæххæст кары сывæллоны сæвæрынц милицийы профилактикон хыгъды. Ӕнæххæст кары сывæллон искуы профилактикон хыгъды куы уа æвæрд кæнæ йæ фæткхалæн цауы фæдыл куы бакæной милицæмæ, уæд йæ фидæны размæцыдæн фæзындзæн цæлхдуртæ. Зæгъæм, Уæрæсемæ уæлдæр ахуыргæнæндонмæ чи сфæнд кæны, уыдонæй æрдомынц гæххæт, ома, йæ уагахаст цахæм уыд ныры онг. Стæй ма дзы куыстмæ исгæйæ кæцыдæр куыстуæттæ æнæмæнг æрдомдзысты уыцы гæххæтт, æмæ фæткхалæг куы разына, уæд æй нæ райсдзысты куыстмæ  кæнæ университетмæ.

Ацы пъланон мадзæлттæ уадзынц районты скъолаты дæр æмæ нысанмæздæхт сты, цæмæй рæзгæ фæлтæр цайдагъ кæной хорз уагахастыл, ма халой закъон æмæ зоной барадон нормæтæ.

Джиоты Алыксандр

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.