Бонæй-бонмæ арфдæр æмæ мидисджындæр кæнынц Уæрæсейы Федераци æмæ Республикæ Хуссар Ирыстоны цы хæлардзинад æмæ æмгуыстады бастдзинæдтæ ис, уыдон. Кæд ныртæккæйы рæстæг æнцон рæстæг нæу, уæддæр Уæрæсейы Федераци алыгъуызон цæлхдуртæм æнæкæсгæйæ, республикæмæ йæ хъус дары. Йæ фæрцы РХИ-йы цард иу ран нæ лæууы, фылдæрæй-фылдæр кæнынц алыгъуызон ногарæзт объекттæ, хуыздæрæрдæм ивы раздæры азтимæ абаргæйæ цард, зæрдæ рухс кæны Инвестицион програм-мæйы фæрцы социалон нысаниуæгджын агъуыстыты рæзтæй. Уыдæттæ бабæрæг кæнынмæ нæм арæх æрцæуынц УФ-йæ уазджытæ. 2-æм июлы та нæм фæуазæг сæрмагонд официалон делегаци, УФ-йы экономикон рæзты министры хæдивæг Дмитри Вольвачы сæргълæудæй. Делегацийы сконды ма уыд ноджы æндæр официалон адæймæгтæ.
Уазджытæ цалдæр боны бæрæг кæндзысты 2024 азы РХИ-йы социалон-экономикон рæзтæн ахъазгæнæг Инвестицион программæйы фæлгæтты арæзт цæуæг объект-æ. Фыццаг уал бацыдысты Мзиугомы хъæуы сывæллæттæн цы лагерь сырæзт, уырдæм.
Ам уазджытыл цытджын æгъдауæй фембæлдысты РХИ-йы Хицауады сæрдар Джуссойты Константин, Уæрæсейы Федерацийы Æххæстбарджын минæвар РХИ-йы Марат Кулахметов æмæ Арæзтад æмæ архитектурæйы минæвар Цоциты Зауыр. Хицауады Сæрдар уазджыты базонгæ кодта ацы тыгъдады цы фондз корпус сырæзт, уыдон мидæг цæуæг куыстытимæ: «Объект у цымыдисон, социалон æгъдауæй ахсджиаг, уымæн æмæ дæтты уæлæмхас фадæттæ рæзгæ фæлтæры æнæниздзинад æмæ сфæлдыстадон рæзтæн. Лагерь лæвæрд куы æрцæуа арæзтады æппæт нормæтæм гæсгæ, уæд ам уыцыиу рæстæг сæ бон баулæфын уыдзæн 150 сывæллонæн. Банысан кæнæм уый дæр æмæ объект арæзт кæй æрцыд сейсмикон уаргъ чи къаддæр кæны, ахæм технологитæй пайдагæнгæйæ».
Уазджытæ азылдысты æмæ сæхи цæстæй федтой, сывæллæттæ цы хатæнты улæфдзысты, уыдон куыд уæрæх æмæ хæрзвадат сты. Ам, лагеры улæфгæйæ уыдонæн уыдзæн æппæт уавæртæ дæр: улæфæн зонæ, егъау актон зал, библиотекæ, кæсæн зал, компьютерон къластæ, музей æмæ спортивон зал. Уымæй дарддæр уазджытæн фенын кодтой лагеры территорийыл цы егъау хæрæндон æмæ административон корпус сырæзт, уый дæр.
Дмитри Вольвачы зæрдæмæ тынг фæцыд лагерь æмткæй. Уый ма загъта стыр æхцондзинадимæ кæй баулæфид ныртæккæ дæр ацы бынаты.
Президентимæ фембæлд
Уырдыгæй уазджытæ сæ фæндаг акодтой Цхинвалмæ. Ам уазджытыл фембæлдысты Президент Гаглойты Аланимæ.
Райдианы Гаглойты Алан уазджытæн загъта бузныджы æмæ арфæйы ныхæстæ се ‘рцыды тыххæй. Сæ иумæйаг куыст нысанмæздæхт æмæ хæрзиуæгон кæй уыдзæн, уымæй ныфс бавæрдта: «Нæ паддзахадты ‘хсæн æмгуыстады фæлгæтты цы процесстæ цæуы, уыдон тынг ахсджиаг сты. Уыдонмæ хауы Инвестицион программæ дæр, кæцы ныртæккæ ис йæ реализацийы стадийыл. Экономикон æгъдауæй размæцыды нæ фарсмæ алы хатт дæр балæууы нæ сæйраг стратегион партнер Уæрæсейы Федераци. Уый тынг нысаниуæгджын хъуыддаг у нæ республикæйæн. Не’мгуысты фæстиуæг у – фидар æууæнк. Нысанмæздæхт æмæ æнгом куыст махæн здæхт у фидæнмæ, уый гаранти дæтты хæлардзинады ахастытæн, канд экономикæйы фадыджы нæ, фæлæ ма социалон гаран-титы рæзтæн дæр».
Дмитри Вольвач дæр ныфс бавæрдта, республикæйы размæцыды хъуыддаджы цыфæнды ныхдуртæ ма уа, уæддæр иуварс кæй цæудзысты иумæйаг тыхтæ æмæ архайды фæрцы. Уый фæстæ та Хицауады уæнгтимæ Дмитри Вольвачы сæргълæудæй уагъд æрцыд рауæрæхгонд æмбырд.
УФ-йы æрцæугæ делегаци ноджы дæр бабæрæг кæндзæн Инвестпрограммæйы фæлгæтты арæзтадтæ. Уыцы нымæцы №2-æм аварион скъолайы бынаты цы ног агъуыст рæзы, Зонкъары донæмбырдгæнæн, Ирыхъæуы консервон завод, Зæронд хиды арæзтад æмæ æндæртæ. Уазджытæ нын радзурдзысты уый тыххæй сæ тæлмæнтæ æмæ уын сæ фехъусын кæндзыстæм нæ радон номыры.
Уазæгты Марфа
