МАХ НЫФС ÆВÆРÆМ НÆ УÆРÆСЕЙАГ ХÆЛÆРТТЫ ÆДЗУХОН ÆХХУЫСÆЙ

Аивгъуыйгæ къуырийы нысаниуæгджын поли-тикон цауты æхсæн ма асджиаг бынат ис, бæстæйы сæргълæууæг Гаглойты Аланы  кусæгон балц кæй уыд Мæскуымæ. Уым Президент хайад кæй райста Республикæ Хуссар Ирыстон æмæ Уæрæсейы Федерацийы ‘хсæн социалон-экономикон рæзты фæдыл Æхсæнхицауадон къамисы рабадты. Къамисы уæрæсейаг хайы сæрдар, Уæрæсейы Федерацийы Хицауады Сæрдары хæдивæг Александр Новак банысан кодта, Хуссар Ирыстон сæ стратегион цæдисон кæй у. Уæрæсейаг-хуссарирыстойнаг ахастытæ, зæгъгæ, рæстæгæй фæлвæрд æрцыдысты æмæ арæзт цæуынц цæдисад æмæ интеграцийы принциптыл. Хуссар Ирыстон сæрмагонд æфсæддон операцийы Уæрæсеимæ æмзæрдæ кæй у æмæ йæ фарсмæ кæй ис, уый ахсджиаг хъуыддагыл банымадта Новак. Банысан ма кодта дыууæ бæстæйы ‘хсæн базарадон-экономикон æмгуыстады æвæрццаг динамикæ. Радзырдта Æмцæдисад æмæ интеграцийы тыххæй УФ æмæ РХИ-йы ‘хсæн Æхсæнпаддзахадон бадзырдтыты фæлгæтты химæрайсгæ хæстæ æххæст кæнынмæ уæрæсейаг фарсы цæттæдзинады тыххæй.

Хуссар Ирыстон 2008 азæй фæстæмæ рæзы социалон æмæ экономикон фадыджы инвестицион программæйы фæлгæтты. Уыцы егъау æмæ æвæджиаг хæс йæхимæ райста стыр Уæрæсе. Уый руаджы нæ республикæ азæй азмæ рæзы æмæ ивы йæ хуыз, æндидзынц бирæ нысаниуæгджын объекттæ. Уый тыххæй мах бузныг стæм æмæ уыдзыстæм стыр Уæрæсейæ. «Æфсымæр æфсымæрæй у тыхджын æмæ ныфсджын», – уый дзурæг у нæ ахастытыл.

 

«ПРОДЭКСПО»-йы ХАЙАД РАЙСТА ХУССАР ИРЫСТОН ДÆР

Куыд зонæм, афтæмæй Президент Гаглойты Алан  йæ кусæгон балцы фæуазæг Æхсæнадæмон форум «Продэкспо»-мæ. Йемæ уыдысты Хицауады Сæрдар Джуссойты Константин, Хицауады Сæрдары хæдивæг  – экономикон рæзты министр Тадтаты Дзамболат æмæ Уæрæсейы Федерацийы Республикæ Хуссар Ирыстоны Æххæстбарджын Минæвар Гасситы Знауыр.

Уæрæсейы Федерацийы Хуссар Ирыстоны Базарадон минæварады сæргълæууæг Гогинов Таймураз Гаглойты Аланæн радзырдта, зæгъгæ, республикæ фæндзæм хатт исы хайад форумы. Банысан кодта Хуссар Ирыстоны экспортерты рæзт.

Ацы аз æхсæнадæмон равдыст «Продэкспо»-йы йæ продукци фыццаг хатт равдыста Хъелы бæрзонд хæххон бæгæныфыцæн завод æмæ йæм тынг бацымыдис кодтой æлхæнджытæ.

Уый фæдыл бæстæйы сæргълæууæг раарфæ кодта «Продэкспо»-йы хуссарирыстойнаг хайадисджытæн. Йæ ныхæстæм гæсгæ, цæмæй нæ республикæйы товаруадзджытæ æхсæндунеон æмвæзадмæ рахизой, уый  тыххæй форум у уникалон фæрæз.

Уæрæсейы хæлцадон базарадон бизнес «Продэкспо»-йы æвдыст æрцæуы дунейы бæстæтæй уæййæгтæ: æрвылбон цы продукттæ æмæ нуазинæгтæй пайда кæнæм, равзаргæ деликатестæ, органикон æмæ спортивон хæлц, æнæниз цардыуаг кæныны тыххæй экзотикон продукттæ æмæ æндæр ахæмтæ.

Æрмæстдæр ацы ран равдисынц сæ алкоголон нуазинæгтæ æмæ сæнты экспозицитæ 30 бæстæ-йæ фылдæрæй. Æрвылаз дæр равдысты презентаци æрцæуынц бирæ ног хæринæгтæ æмæ нуазинæгтæн. Ацы фæзуаты фадат ис, чи цы агуры, уый ссарынæн. Уымæ гæсгæ Хуссар Ирыстонæн ахсджиаг у инвестортæ республикæмæ æрбахонын, цы продукцийы ног хуызтæ рауадзыныл куыст цæуы бæстæйы, уыдон цæмæй цадæггай æндæр базарадон фæзуæттыл реализаци цæуой.

 

ПАРТИЙÆН ÆВЗÆРСТ ÆРЦЫД НОГ ЛИДЕР

Ахсджиаг политикон цауты æхсæн рахицæнгæнæн ис республикон политикон парти «Ныхас»-æн ног лидер æвзæрст кæй æрцыд, уый. Ацы парти йæ сырæзтæй фæстæмæ иузæрдион лæггад кæны  адæмæн æмæ паддзахадæн. Кæдфæнды дæр сты адæмы фарсмæ, аккагæй æмæ эффективонæй æхсæнады интерестæ размæ кæнынц. Парти архайы, куыд бæрнон политикон тых, афтæ, уымæн æмæ хъахъхъæны закъон æмæ рæстдзинад.

Куыд зонæм, афтæмæй партийæн 2018 азæй фæстæмæ къухдариуæг кодта Президент Гаглойты Алан.  Закъоны нормæтæ æмæ фæтк хъахъхъæныны нысанæн радон съезды рæстæджы политикон партийæн æвзæрст æрцыд ног разамонæг – Парламенты депутат, партийы активон архайæг Бесаты Зитæ. Уый ныфс бавæрдта, кæй адарддæр кæндзысты партийы принциптæ æмæ идейæтæ. Ахсджиаг хъусдард здæхт цæудзæн паддзахады уæвынады демократон принциптæ, закъондзинад, фæтк, æмбæстагон æхсæнады рæзт æмæ æндæр ахæм хъуыддæгтæм.

КЪÆБУЛТЫ Маринæ

Comments are closed, but trackbacks and pingbacks are open.