Хуссар ирыстоны паддзахадон университеты библиотекæйы кусджытæ Цхуырбаты Фатимæйы сæргълæудæй сорганизаци кодтой чингуыты равдыст ирон адæ-мы геноцидты, уыцы нымæцы 2008 азы геноциды, ома, августы тугуарæн хæсты тыххæй дæр ахæм номимæ, зæгъгæ «Перед памятью время бессильно».
Равдысты æвæрд сты ахæм чингуытæ, кæцыты автортæ ирдæй равдыстой 1920 азæй 2008 азы августы онг хуссарирыстойнаг адæмы ахасты гуырдзиаг агрессийы тыххæй. Равдыстмæ æрбацæуджытæ базонгæ уыдзысты ирон адæмы геноциды тыххæй ахæм рауагъдтимæ, куыд Цыбырты Людвиджы чиныг «Полигон», Мæргъиты Алексийы «Сын Ирыстона», цыран æвдыст æрцыд ирон адæмы хъайтар Хуыбылты Валерийы тохвæндаджы тыххæй, Плиты Гацыры «Мæлæм! Уæд лæугæйæ», Уалыты Гайозы чиныг «Большая трагедия маленького народа», «Август 2008» правда глазами очевидцев, Уанеты Владимиры «Люди, помните о нас», Тедеты Валентинæйы «Я – осетин», Абайты Васойы «Трагедия Южной Осетии, беспредел геноцида», Сиукъаты Никъалайы «Две трагедии Южной Осетии», «И кровь и пепел», «Пять дней к спасению» æмæ бирæ æндæртæ. Равдыст арæзт æрцыд ирон адæмы геноциды 100 азы бонмæ, фæлæ абон дæр баххæст цæуы геноциды темæйыл фыст алыгъуызон цымыдисон æрмæджытæй.
Цымыдисон ма у уый дæр, æмæ равдысты æвæрд кæй сты æхст, нæмыгдзæф чингуытæ. Хъуыддаг уый мидæг ис æмæ 2008 азы августы хæсты рæстæджы нæ фыдбойнаджы сыхæгтæ ирон адæмыл бынтондæр куы рахæтыдысты, уæд ницæуыл уал ауæрстой, сæ нысан уыд Хуссар Ирыстонæй «сыгъдæг быдыр» саразын æмæ мардтой, сыгътой сæ разы цы æййæфтой, уый. Тугуарæн хæсты гуырдзиаг лæгсырдтæ басыгътой хуссарирыстойнаг адæмы уарзон уæлдæр ахуырадон уагдоны бæстыхай, цыран, кæй зæгъын æй хъæуы, арты æвзæгтæй нæ аирвæзтысты чингуытæ дæр. Аирвæзтысты ма дзы хæрзцъус чингуытæ æмæ уыдон дæр нæмыгдзæфтæ æмæ æрдæгсыгъдтытæй. Куыд зæгъæм, В.Соколовайы «Очерки по фонетике иранских языков», «Русские говоры», «Общая теория частей речи» «Актуальные проблемы культуры речи» æмæ æндæртæ. Ацы чингуытæ дæр сты хæстæфхæрд, уыдон дæр сæхиуыл бавзæрстой гуырдзыйы геноцид.
«Азфыссæг Мæргъиты Алекси нын хæсты размæ йæ чингуытæй балæвар кодта цалдæр томы, фæлæ уыдон дæр басыгъдысты. Мæнæ ма дзы цы дыууæ чиныджы аирвæзтысты, уыдон хæсты рæстæджы æвæрд уыдысты университеты æмдзæрæндоны нын цы библиотекæ уыд, уым. Фæлæ ма сыгъд университеты бæстыхайы цы нæмыгдзæф чингуытæ баззад, уыдоны нæмгуытæй асыгъдæг кодтам æмæ абон ирд æвдисæн сты не знæгты сырдон митæн. Уадз, æмæ Ирыстоны фæлтæртæ зонгæ кæной гуырдзиаг лæгхортæ ирон адæмæн цы фыдæвзарнтæ бавзарын кодтой, уыдонимæ. Науæд æвзонг фæлтæрæй бирæтæ рæстмæ нæ зонынц 20-æм азты гуырдзиаг тыхæйисджыты аххосæй сæ дадатæ æмæ нанатæ цы трагикон цауты бахаудтой, уыдоны тыххæй», – радзырдта библиотекæйы сæргълæууæг Цхуырбаты Фатимæ.
Равдысты чингуыты ‘хсæн фенæн ис ныртæккæ дзæнæттаг Цхуырбаты Кристинæйы чиныг «Геноцид южных осетин», зæгъгæ. Хъуыддаг уый мидæг ис æмæ ирон адæмы геноциды темæйы фæдыл æвзонг чызг уни-верситеты ахуыр кæнгæйæ, бахъахъхъæдта йæ дипломон куыст, фæлæ йæхицæн бирæ рацæрын нæ бантыст. Æгъатыр низæй æвзонгæй атыдта йæ хиуæтты, йе ‘мгæртты ‘хсæнæй. Фæлæ йæ ном æнусон æрцыд йæ дипломон куыстæй, кæцыйы хицæн чиныгæй мыхуыры рауагътой йæ хиуæттæ. «Университеты чингуыты равдыст кæй сарæзтам, уый базонгæйæ, Кристинæйы фыд Енвер æрбахаста йæ дзæнæттаг чызджы чиныг æмæ нын æй балæвар кодта. Афтæ ма ацы чингуыты фæрцы сæ дипломон куыстытæ бахъахъхъæнынц нæ университеты æндæр студенттæ дæр. Нæ горæты цæрджытæй равдысты тыххæй чи базоны, уыдон дæр æрбацæуынц æмæ стыр цымыдисимæ базонгæ вæййынц чингуыты мидисимæ. Иу дзырдæй пайда сæ кæнынц куыд студенттæ, афтæ ма иу кæнæ иннæ хъуыддаджы тых-хæй кæй бахъæуынц, уыдон дæр», – загъта библиотекæйы сæргълæууæг.
Равдысты ма гуырдзиаг агресси æвдыст æрцыд къорд фотоальбомы, газетты æмæ журналты дæр, уыдон дæр сты экспозицийы иу хай. Библиотекæйы сæргълæууæджы ныхæстæм гæсгæ, чингуытæ баххæст цæудзысты дарддæр дæр. Уый нæм бахатыд, цæмæй нæ газеты фæрцы фехъусын кæнæм æмæ нæ горæты цæрджытæй геноциды тыххæй чингуытæ кæнæ æндæр цымыдисон æрмæджытæ кæмæ ис, уыдон сæ æрбахæссой университеты библиотекæмæ.
ДЖИОТЫ Екатеринæ
Comments are closed, but trackbacks and pingbacks are open.