6-æм апрелы Абхазы республикæйы культурæйы бонты кæронбæттæн концертмæ æрбацыдысты Хуссар Ирыстоны Президент Гаглойты Алан, Хуссар Ирыстоны Абхазы Республикæ æмæ Уæрæсейы Федерацийы минæвæрттæ Елбачиты Алан æмæ Марат Кулахметов, афтæ ма æндæр бæрнон адæймæгтæ.
Концерт байгом кодта Абхазы адæмон зард æмæ кафты ансамблы сгуыхт артист Хибла Мукба. Джими Шумения, Анзор Адлейба, Авто Канджария æмæ æндæртæ уый фæстæ равдыстой сæ дæсныйад.
Ансамблы артист Артур Лакрба горæт Сухумы гуырдзиаг фыдгæнджыты къухæй суæгъд кæныны тыххæй уырыссагау йæхи фыст зарæг куы зарыдис, уæд æм сценæмæкæсджытæ хъуыстой лæугæйæ.
Паддзахадон ансамблы кафджыты къорд йæ арæхстдзинад уыцы изæр равдыста авд хаттæй фылдæр.
Артисттæ уыдысты хæрзконд æмæ тынг фидыдтой сценæйыл. Се уæнгтыл афтæ рæсугъд бадтис сæ уæлæдарæс æмæ сын уый сæ алы змæлд кодта ноджы аивдæр.
Артистты цæттæдзинад æмæ арæхстдзинад дзæвгар хъæздыгдæр кодтой музыкалон инструменттимæ цы аст музыканты архайдта, уыдон. Се ‘хсæн ахæм хорз æмбарындзинæдтæ кæй ис, уый та, кæй зæгъын æй хъæуы, у къорд азты сæ иумæйаг æнувыд куысты фæрцы.
Уыцы изæр абхазаг кафджытæ сæ номыр æххæст кæныны рæстæджы уырыссаг, абхазаг æмæ ирон тырысатимæ кæй рахызтысты, уый тынг фæцыдис адæмы зæрдæмæ æмæ сыл сæмбæлдысты тыхджын къухæмдзæгъдæй. Уыцы уысм залы бадджытæй алкæмæ дæр уыд рæсугъд æмæ хъæлдзæг хъуыдытæ, фæлæ сын иумæйаг та уыд нæ бæстæты æфсымæрдзинады æнкъарæнтæ.
Паддзахадон ансамбль «Симд»-ы хор æмæ кафджыты къорд комплиментон æгъдауæй сæххæст кодтой цалдæр абхазаг зард æмæ кафты.
Хуссар Ирыстоны Президент Гаглойты Алан, Хуссар Ирыстоны Культурæйы министр Зæгъойты Радæ æмæ Хуссар Ирыстоны Уæрæсейы Æххæстбарджын минæвар Марат Кулахметов та сценæмæ абхазаг артисттæн барвыстой дидинджытæ.
Кæронбæттæн хайы сценæмæ схызт Абхазы Хуссар Ирыстоны минæвар Елбачиты Алан. Уый банысан кодта, зæгъгæ, нæ адæмты нырмæйы хорз ахастытæ ацы дыууæ боны ноджы цалдæр хатты фæхъæздыгдæр сты.
«Æз дзурынæй никуы бафæллайдзæн Абхаз æмæ Хуссар Ирыстоны адæмты адджын æмæ хæлардзинады ахастыты тыххæй, фæлæ ацы дыууæ боны цы адджын æмæ хæлардзинады æнкъарæнтæ банкъардтон, уыдонæн, мæ хъуыдымæ гæсгæ, абарæн ницæимæ ис», – зæгъы Хуссыр Ирыстоны Культурæйы министр Зæгъойты Радæ, æмæ йæ коллегæ Даур Ковейæн балæвар кодта Хуссар Ирыстоны банг цы монетæтæ рауагъта, Хетæгкаты Къоста, Абайты Васо æмæ Тугъанты Махарбеджы фæлгæндзтимæ, уыдонæй.
«Бирæ горæттæ æмæ бæстæты уыдыстæм, уыцы нымæцы Германы, Польшæйы, Турчы, Францы, Мексикæйы, Аргентинæйы, Сирийы, Уæрæсейы æмæ æндæр бæстæты, фæлæ нæ хъуыды кæнын æмæ ныл искуы афтæ хорз фембæлдысты, афтæ хорз ныл бацин кодтой», – загъта Абхазы Культурæйы министр Даур Кове.
Йæ раныхасы Хуссар Ирыстоны Президент Гаглойты Алан банысан кодта, зæгъгæ, нæ адæмтæ иу рæстæджы бахъахъхъæдтой сæ бæстæтæ, сæ адæмы. Иу рæстæджы систæм хæдбар паддзахадтæ æмæ уыцы æмæ æндæр хъуыддæгты, абоны онг дæр, стыр æмæ хъомысджын паддзахад Уæрæсе ис немæ.
Уый фæстæ Гаглойты Алан «Кады нысаны орден»-æй схорзæхджын кодта Абхазы Культурæйы министр Даур Ковейы. Уый ма Хуссар Ирыстоны «Сгуыхт артист»-ы кадджын нæмттæ радта Абхазы театры коллектив, кафт æмæ зарды паддзахадон фæсивæдон æмæ эстрадон зарæггæнджытæн.
Гæззаты Иван
