18-æм январы нæ горæты администрацийы Культурæйы хæдзары Цхинвалы скъола-интернаты ахуыргæнинæгтæ сæ хъомылгæнджытæ – скъолайы организатор Харебаты Маринæ, раздзог Икъаты Миленæ, драмкружокы къухдариуæггæнæг Хъотайты Сæрмæт, хореограф Тасойты Азæмæтимæ сорганизаци кодтой хæрзаудæн акци – аргъау мюзикл «Новогодняя мечта Золушки», зæгъгæ. Ацы ахуырадон уагдонæн традицион ссис фæкæсынхъуаг сывæллæттæн чи æххуыс кæны, æппæт уыцы хæларзæрдæ адæймæгтæн арфæйы нысанæн æрвылаз дæр, ахæм мадзæлттæ уадзын. Сценарийы автор у Икъаты Миленæ.
Мадзалмæ æрбацыдысты паддзахады сæргълæууæг Гаглойты Алан, Хицауады æндæр бæрнон адæймæгтæ, политикон партиты лидертæ, министрадты æмæ ведомствоты сæргълæуджытæ, афгайнæгтæ, æхсæнады минæвæрттæ, скъола-интернаты ахуыргæнинæгтæ æмæ ахуыргæнджытæ уагдоны директор Сланты Эллæйы сæргълæудæй.
Бæрæгбонон мадзал райдианы размæ экраныл æвдыст цыд хæрзаудæн акци «Мæ ногазон бæллиц»-ы фæдыл видеоролик, цыран сывæллæттæ дзырдтой сæ бæллицты тыххæй. Куыд зæгъæм, «Зынаргъ Митын Дада, мæ ном хуыйны Тедеты Барсæг. Фæнды мæ, цæмæй мын балæвар кæнай боксы æрмкъухтæ» æмæ афтæ дарддæр. Экраныл ма равдыстой хæрзиуæгтауджытæ Президент Гаглойты Аланæй райдайгæйæ фæкæсынхъуаг сывæллæттæн Ног азы размæ алыгъуызон ногазон лæвæрттæ куыд лæвар кæнынц, уый тыххæй видеоролик.
Уый фæстæ сывæллæттæ сценæйыл равдыстой сæ курдиат, куыд артистизмæй, афтæ зарын æмæ кафынæй дæр. Аргъау-мюзиклы сывæллæттæ (архайдтой дзы скъола-интернаты 30 хъомылгæнинаджы бæрц) сæ ролтæ сæххæст кодтой тынг хорз, раст цыма æцæг артисттæ уыдысты, уыйау. Сценæмæкæсджытæ сын кодтой тыхджын къухæмдзæгъд, уæлдайдæр та-иу сценæйыл чысыл Цхуырбаты Сослан (скъола-интернаты скъолайы кары агъоммæйы къорды хъомылгæнинаг хъазыд хъæргæнæджы ролы) куы фæзынд, уæд. Золушкайы ролы ахъазыд Бикойты Светæ. Чызг рæхсы зарынмæ дæр æмæ йæ рæсугъд курдиатæй уæлдай тынгдæр барæсугъд кодта мадзалы. Дыккаг мады æмæ йæ чызджыты ролы та ахъазыдысты Битеты Джесикæ, Кокойты Ангелинæ æмæ Гурциты Мадинæ. Къаролы роль тынг хорз сæххæст кодта Дзукъаты Сослан.
«Ногазон равдыст махæн ссис традицион, уагъд æрцæуы æрвылаз дæр. Сывæллæттæ стыр райзæрдæйæ сæхи бацæттæ кодтой, цæмæй сын ногазон лæвæрттæ чи сарæзта, уыдоны зæрдæтæ бахъæлдзæг кæной. Ацы дунейы цæрæм уый тыххæй, цæмæй хорздзинад хæссæм нæ алыварс адæмæн. Хæлардзинад тауын у пайдайы хъуыддаг», – загъта Икъаты Миленæ.
Аргъау-мюзиклы æвдыст æрцыд куыд ирон, афтæ уырыссаг культурæ дæр. Сывæллæттæ сæххæст кодтой дыууæ адæмты зарджытæ æмæ кæфтытæ. «Золушка» у зындгонд уырыссаг аргъау, фæлæ йæ ам баххæст кодтой ирон колоритæй. Йæ интерпретацийы бынат разынд ирон «Симд» æмæ мадæлон æвзагыл зарджытæн.
Скъола-интернаты директор Сланты Эллæ зæрдæбын арфæтæ ракодта сидзæр æмæ фæкæсынхъуаг сывæллæтты хъысмæтмæ куыдфæндыйы цæстæй чи нæ кæсы æмæ сæм йе ‘ххуысы къух чи фæдаргъ кæны, уыдонæн.
Сценæмæ фæхуыдтой Президент Гаглойты Аланы. Уый банысан кодта, зæгъгæ, республикæйы къухдариуæгад дарддæр дæр араздзæн гæнæн цы ис, уый, цæмæй интернаты хъомылгæнинæгтæ се ‘ппæт дæр сæхиуыл æнкъарой æххуыс æмæ аудындзинад. «Фыццаг рады мæ фæнды стыр бузныг зæгъын, уыцы адæмæн, кæцытæ Ног азы размæ бахъæлдзæг кодтой нæ сывæллæтты ногазон лæвæрттæ сын кæй бакодтой, уымæй. Фæнды мæ, цæмæй алы сывæллоны дæр уырна, зæгъгæ, уæвынад кæны Митын Дада æмæ мын уый Ног азы сæххæст кæндзæн мæ бæллиц. Бузныджы ныхæстæ зæгъын мæ фæнды ныртæккæ Донбассы фронты раззаг хæххыты сабыр цæрджыты чи хъахъхъæны нæ уыцы хъæбатыр хæстонтæн. Уыдон лæвæрттимæ æрбацыдысты æмæ афтæмæй раарфæ кодтой скъола-интернаты ахуыргæнинæгтæн. Бузныг ацы мадзал чи сорганизаци кодта, уыдонæн дæр. Ирыстон курдиаттæй цух никуы уыд æмæ ныр дæр нæу. Уый афтæ кæй у, уымæн та æвдисæн сты мæнæ нын абон сценæйыл сæ арæхстдзинад чи равдыста, уыцы курдиатджын сывæллæттæ, чысыл Цхуырбаты Сосланæй райдайгæйæ. Æз сæм кастæн æмæ хъуыды кодтон, цас тых ис вазыгджын хъысмæттимæ сывæллæттæм. Уыдонæн сæ бон у циндзинад æрмæст сæхицæн нæ, фæлæ хистæр кары адæмæн дæр лæвар кæнын. Махæй алкæмæн дæр æхсызгон у ацы сывæллæтты хъæлдзæгæй уынын», – загъта Гаглойты Алан.
Уæ зæрдыл уын лæууын кæнæм, Ног азы размæ паддзахадон телерадиокомпани «ИР» ауагъта традицион æрвылазон акци «Мæ ногазон бæллиц», зæгъгæ, кæцыйы фæлгæтты паддзахады сæргълæууæг, Хицауады уæнгтæ, депутаттæ æмæ меценаттæ сæххæст кодтой сидзæр, æххуысхъуаг æмæ инвалид сывæллæтты ногазон бæллицтæ. Æмæ ныр та ацы фæкæсынхъуаг сывæллæттæ сæ курдиатæй барухс кодтой ногазон лæвæрттæ сын чи сарæзта, уыдоны зæрдæтæ.
Мадзалы кæрон йæ хайадисджытæ раарфæ кодтой РХИ-йы Ахуырад æмæ зонады министр Лолаты Асланæн йæ гуырæн боны цытæн.
Арфæйы ныхæстæ зæгъын æмбæлы хæрзиуæгтауджытæн бузныджы нысанæн аргъау-мюзикл чи сорганизаци кодтой, уыдонæн. Ирдæй зынд сывæллæттимæ сæ ахуыргæнджытæ тынг хорз кæй бакуыстой, уый.
Бæрæгбон ацыд хъарм атмосферæйы. Æрæмбырдуæвджытæ æхцондзинад райстой чысыл артистты архайдæй æмæ бузныджы ныхæстæ дзырдтой мадзалы организатортæн.
ДЖИОТЫ Екатеринæ
