РЕСПУБЛИКÆЙЫ РÆЗТЫ НЫСÆНТТÆ
РЦИ-Аланийы Хицауады Сæрдар Дзанайты Барис министртимæ цы кусæгон æмбырд ауагъта, уым ныхас цыд райдайгæ ног азы дарддæры нысæнттыл, Уæрæсейы Хицауад кæй сфидар кодтой, республикæйы уыцы социалон-экономикон мадзæлттæ царды куыд æнтысынц, ууыл.
Министртæ бæлвырд радзырдтой алы объекты тыххæй дæр. Сæ арæзтад, сæ рацарæзт, скъолаты, рæвдауæндæтты, рынчындæтты, поликлиникæты, фельдшерон-акушерон пунктты, культурæйы хæдзæртты, спортивон комплексты æмæ фæндæгты уавæртæ рæгъмæ рахастой. Фæлæ, сæйрагдæр æрлæууыдысты медицинæйы къабазыл.
«Цыдæриддæр мадзæлттæ бæрæггонд æрцыд, уыдон нын тынг ахсджиаг сты. Ахуырады, æнæниздзинад хъахъхъæныны, социалон къабазы, культурæйы, спорты объекттæ цæрджытæн удæнцой æрхæсдзысты, сæ фылдæр арæзт фесты. Ацы аз медицинæйы къабазы дарддæр архайдзыстæм регионалон центртæ æмæ кусæндæттæ ифтонггæрзтæй æххæст кæныныл, паддзахадон системæйы бындурыл иугонд нымæцон контур саразыныл, хорз цæттæгонд кадртæ рынчындæттæм арвитыныл», – банысан кодта Хицауады Сæрдар.
Куыд зонæм, афтæмæй ивгъуыд аз национ проект «Æнæниздзинад хъахъхъæнынад»-ы фæлгæтты сарæзтой Хъарман-Сындзыхъæуы амбулатори, Бехъаны фельдшерон-акушерон пункт, Елхоты рынчындоны поликлиникæйы хайад æмæ æндæртæ.
Ацы азы кæронмæ хъуамæ бындурон цалцæг баййафой Сырх Ходы акушерон пункт, Ногиры, Винограднæйы, Предгорнæйы амбулаторитæ, Веселæйы, Кондратенкойы хъæуты, Павлодольскы станицæйы медицинон кусæндæттæ.
Ацы аз Беслæны æрбынæтон уæвæг районы поликлиникæ æмæ тагъд медицинон æххуысы станцæйы арæзтад кæронмæ фæхæццæ кæнынц.
Дзанайты Барис бæрнон адæймæгты бафæдзæхста æппæт фарстатæм дæр къæрцхъус уæвын æмæ, куыстытæ куыд цæуынц, уый йын рæстæгæй-рæстæгмæ хъусын кæнын.
АХУЫРАДЫ РÆЗТÆН
Национ проектмæ гæсгæ, æгуыст адæймæгты ахуыр кæныныл Цæгат Ирыстон бахардз кæндзæн 20 милуан сомæй фылдæр. Ацы хабар фехъусын кодта республикæйы Адæмæн куыстдæттæг комитеты пресс службæ.
Ахуырад æххæст кæндзысты мæнæ ахæм дæсныйæдтæм гæсгæ: менеджер, администратор, бухгалтер, графикон дизайн, хъуыддагаразæг, хæринаггæнæг æмæ æндæртæ.
Ацы аз национ проект «Демографи»-мæ гæсгæ, профессион ахуырадыл бахардз кæндзысты ссæдз милуан сомæй фылдæр. Фæндзай азæй уæлæмæ кæуыл цæуы, ахæм æгуыст адæймæгтæн, декреты уæвæг сылгоймæгтæн, куыстдæттæгимæ фæллойадон ахастдзинæдтæ кæмæн нæй æмæ авд азæй кæстæр сывæллæттæ кæмæн ис, ахæм сылгоймæгтæн, лыгъдоныл нымад чи ‘рцыд, Украинæйæ æрбацæуæг ахæм адæймæгтæн ахуырадон программæтæ баххæст кæндзысты лæвар. Ныртæккæ æххæст цæуынц гидтæ-экскурсиамонджыты ахуырады курсытæ.
Æндæразимæ абаргæйæ, фарон цæгатирыстойнаг æгуыст адæймæгты нымæц 25 проценты фæкъаддæр. 31 декабрмæ регистрацигонд æгуыст адæймæгты къæпхæн уыд 1 процент, æндæраз та уыцы рæстæг уый уыд 2, 1 проценты.
Нæ уацх.
