Уалдзæджы фыццаг æмæ рæсугъд бæрæгбонмæ сæхи зæрдиагæй бацæттæ кодтой Цхинвалы районы Къостайыхъæуы астæуккаг скъолайы ахуыргæнджытæ æмæ ахуыргæнинæгтæ. Сылгоймæгты Æппæтдунеон боны цытæн æрæмбырдуæвджытæн арфæйы ныхæстæ загъта скъолайы директор Плиты Заирæ. Йæ цæст сын бауарзта, цæмæй ахæм уарзон бæрæгбонтыл алы хатт дæр æмбæлой хъæлдзæг æмæ амондджынæй, сæ цард æрвитой сабыр арвы бын, сæ кæстæрты хуртæй уой æфсæст æмæ хайджын уой царды æппæт хæрзиуджытæй. Бæрæгбоны цытæн ма арфæйы ныхæстæ загъта Нывгæнæн студийы къухдариуæггæнæг, нæ республикæйы адæмон нывгæнæг Гæбæраты Барис дæр.
Уый фæстæ мадзаламонæг Хуыбиаты Владислав сценæмæ фæхуыдта ахуырдзауты. Уыдон уыдысты дыууæ командæйы – «Арвырон» æмæ «Стъалыгуппар», се сконды уыдысты фæйнæ 7 чызджы æмæ кæрæдзи ивгæйæ, æвдыстой сæ арæхстдзинад. Æнæкæсгæйæ дзырдтой, ирон æмæ уырыссаг æвзæгтыл сылгоймæгтыл фыст æмдзæвгæтæ, æххæст кодтой кафтытæ, æмæ зарджытæ æмæ хъæлдзæг инсценировкæтæ. Цымыдисон бæрæгбон бацæттæ кодтой скъолайы организатор Бæззаты Оксанæ, ногдзауты раздзог Джиоты Сюзаннæ æмæ къласæн æддейæ куысты ахуыргæнæг Галуанты Ларисæ. Кæронбæттæны мадзалы хайадисджытæн бакодтой зæрдылдарæн лæвæрттæ.
Хуыбиаты Никъала
