11-æм майы Цхинвалы Культурæйы хæдзармæ æрбамбырд бирæ адæм. Сценæмæкæсджыты рæгъмæ рахастæуыд Плиты Грисы зынгæ поэмæ «Авд цухъхъа»-мæ гæсгæ æвæрд спектакль. Хайад дзы райстой Знауыры поселочы Культурæйы хæдзары драмон кружокы сывæллæттæ.
Мадзалмæ æрбацыдысты РХИ-йы Культурæйы министрады минæвæрттæ Мамиты Григорийы сæргълæудæй, горæт Цхинвалы администрацийы культурæ, фæсивæд æмæ спорты хайады хистæр Тасойты Игорь, республикæйы скъолаты ахуыргæнджытæ æмæ ахуыргæнинæгтæ.
Спектаклы режиссер-æвæрæг у Хетæгкаты Къостайы номыл паддзахадон драмон театры æвæрæг-режиссер Хъотайты Сæрмæт. Гæздæнты авд æфсымæры мады ролы иттæг ахъазыд хорз зарæггæнæг Икъаты Миленæ.
Æвзонг артисттæ афтæ тынг хорз сæххæст кодтой сæ ролтæ æмæ сæм адæймаг кæсынæй нал æфсæст. Хъазыдысты æцæг профессионалон артистты æмвæзадыл. Драмкружокы хистæркъласонтимæ бакуыста Хъотайты Сæрмæт, кæстæркъласонтимæ та – Икъаты Миленæ.
Æвзонг режиссер-æвæрæг Хъотайты Сæрмæты ныхæстæм гæсгæ спектаклыл фæкуыстой мæйæ фылдæр. «Нæхи уæлдай тынгдæр цæттæ кодтам фæстаг дæс боны. Мæ зæрдæмæ фæцыд нæ хъомылгæнинæгты зæрдæмæхъаргæ архайд. Тынг курдиатджын сывæллæттæ нæм ис. Семæ æнцон кусæн у. Сомбоны сæ чизоны искæйы бафæнда актер суæвын, æххæст сты æппæт бæрæггæнæнтæй дæр. Диссаг у, æвæдза, ахæм спектаклы фыццаг хатт ахъазыдысты, фæлæ бынтондæр нæ фæтыхстысты», – банысан кодта уый.
Уый размæ та ацы спектакль аншлагимæ ацыд Знауыры районы æмæ сæ уымæ гæсгæ бафæндыд сæ хъомылгæнинæгты арæхстдзинад цхинвайлаг сценæмæкæсæгæн равдисын дæр. Æвзонг артисттæн бантыст хæсты рыст æххæстæй равдисын. Тынг æввахс айстой сæ зæрдæмæ Гæздæнты авд æфсымæры трагеди.
Æфсымæрты сау гæххæттытæ мад радгай куы иста, уыцы сценæтæм кæсгæйæ бирæтæ урæдтой сæ цæстысыг. Иу ныхасæй, Хъотайты Сæрмæт, Икъаты Миленæ æмæ сæ хъомылгæнинæгтæн бантыст егъау фæстиуæгджын куыст бакæнын. Уы-мæн та æвдисæн уыдысты сценæмæкæсджытæ.
ДЖИОТЫ Екатеринæ
