6-æм марты нæ горæты Ногдзауты парчы Сылгоймæгты дунеон боны размæ байгом адæмон æрмдæсныты фыццаг армукъæ «нæ зынаргъ сылгоймæгтæн», зæгъгæ. Хайад дзы райстой 40 адæймагæй фылдæр. Паркæй хъуыстысты зæрдæйæн æхцондзинад хæссæг ирон музыкæйы зæлтæ æмæ адæмы хонæгау кодтой армукъæмæ. Иннæ ахæм сын боныгъæд дæр уыцы бон сæ къух арæзта. Сорганизаци йæ кодтой РХИ-йы Культурæйы министрад æмæ ацы министрады цур Адæмон сфæлдыстады центр.
Центры директор Гуыцмæзты Эльзæ нын куыд радзырдта, афтæмæй армукъæ уагъд æрцыд фыццаг хатт. Йæ нысан та уыд æмбæстæгтæн бæрæгбонон зæрдæйыуаг æвзæрын кæнын æмæ адæмон æрмдæснытæн сæ продукци ауæй кæнын.
«Сылгоймæгты дунеон боны алкæмæндæр уæд бæрæгбонон æмæ хорз зæрдæйыуаг. Æмæ адæмон æрмдæснытæн та фадат ис сæ куыстытæй ауæй кæнынæн. Уый та у уæлæмхас разæнгардгæнæн мадзал алыгъуызон куыстытæ сфæлдисыны тыххæй. Ногазон армукъайы хайад райсынмæ кæд куырдиæттæ æрбалæвæрдтой 30 адæймаджы, уæд ныр сæ нымæц схызт 42 адæймагмæ», – радзырдта Гуыцмæзты Эльзæ.
Стъолтыл равæрд æрцыдысты æрмдæсныты алыгъуызон куыстытæ: хъæдæй скульптурæтæ, згъæрæй куыстытæ, адæмон хъазæнтæ, æлыгæй конд дзаумæттæ, бисерæй æмæ хъæдæрмæгæй арæзт æндæр куыстытæ.
Армукъæйы ма нысан у декоративон-прикладон сфæлдыстады дзаумæттæ пропагандæ кæнын. Армукъæйы хайад истой куыд хицæн автортæ, дæснытæ æмæ арæхстджынтæ, афтæ культурæйы къабазы организацитæ, скъолайон уæлæмхас уагдæттæ, кæцытæ кусынц нывкæнынады, прикладон, ювелирон æмæ адæмон сфæлдыстады æндæр здæхтыты.
Армукъæйы хайад райстой Æвзонг техникты республикон станцы хъомылгæнинæгтæ сæ директор Къалаты Нариманы сæргълæудæй.
Æрмдæсныты афарстам, армукъæйæ сæ зæрдæтæ куыд барухс сты, уымæй. «Бузныг зæгъын, ацы армукъæ чи сорганизаци кодта, уыдонæн. Ауæй кодтон мæ куыстытæй, уыцы нымæцы бисерæй конд сылгоймаджы чысыл хызынтæ. Кæй зæгъын æй хъæуы, ныр дæр та райгондæй баззадтæн. Уый размæ та хайад райстон Ногазон армукъæйы», – загъта æрмдæсны сылгоймаг Джыккайты Заринæ.
Армукъæйæ райгондæй баззадысты Тедеты Фатимæ, Мажукина Татьяна, Хъуылымбегты Оксанæ æмæ æндæртæ. Уыдон дæр ауæй кодтой сæ куыстытæй. Æгæрыстæмæй, стъолтыл равæрдтой шоколадæй хиаразгæ алыгъуызон адджинæгты рæсугъд къоппытæ.
Мадзалы организатортæ, йæ хайадисджытæ æмæ Ирыстоны сылгоймæгтæн сæ бæрæгбоны цытæн раарфæ кодта Культурæйы министры хæдивæг Дзеранты Джульеттæ.
Зæгъын ма хъæуы уый дæр, æмæ армукъæ кæй хъуамæ уыдаид дыккаг бон – 7 марты дæр, фæлæ боныгъæд кæй февзæрдæр, уымæ гæсгæ йæ аивтой.
Гуыцмæзты Эльзæ куыд банысан кодта, афтæмæй фæнд кæнынц 8-æм марты цытæн армукъæ æрвылаз дæр уадзын.
Нæ уацх.
