Ацы бонты йæ уарзон адæмæн лæггадгæнæг, кæстæртæн зондамонæг æмæ хæларзæрдæ, Хуссар Ирыстоны Тыбылты Александры номыл университеты профессор, филологон зонæдты кандидат, хæсты азты фæсчъылдымы ветеран Хуыгаты Илья Арсены фыртыл æххæст кæны 90 азы.
Хуыгаты мыггаджы бирæ ис фæрнджын хистæртæ, кæцытæн сæ æдзухон архайд у райгуырæн бæстæйы фæрныгадæн, уый хорзæн. Раст уыдонмæ хауы нæ юбиляр дæр, кæцы йæ цард снывонд кодта фидæны фæлтæры хорздзинадæн, уыдоны размæцыдæн. Ахæм адæймаг та вæййы йæ нацийæн табуйаг, кад æмæ йын цыт кæнынц рæсугъд, тæхудиаг удыхъæды хицау кæй у, уый тыххæй.
Нæ республикæйы Ветеранты советы уæнг уæвгæйæ, Хуыгаты Илья æппæтдæр аразы уый тыххæй, цæмæй куыст цæуа æмбæлон æгъдауыл, хъусдард цæуа кардзыд адæймæгты царды уавæртæ хуыздæр кæнынæн, рынчын æмæ æвæгæсæг ветерантæ уой æдзухон хъусдарды бын.
Илья Арсены фырт! Нæ зæрдæ дын зæгъы ноджыдæр æвæллайгæ куыстхъомдзинад, бирæ нын рацæр æнæнизæй дæ бинонты, дæ кæстæрты фæндиаг.
Уастырджи дæ йæ базыры бын дарæт уæнгрогæй!
РХИ-йы Ветеранты совет
