Цæуыл дзырдтой Путин æмæ Карлсон?
Зынгӕ америкаг журналист Такер Карлсон райста интервью Уӕрӕсейы Федерацийы президент Владимир Путинӕй. Карлсоны АИШ-ы хонынц оппозицион журналист, Такер Карлсон та йӕхирдыгӕй нымайы, зӕгъгӕ, АИШ-ы ӕмӕ ӕппӕт ныгуылӕн бӕстӕты дзыллон информацийы фӕрӕзæ не сты хӕдбар, журналисттæн тыххӕй дзурын кӕнынц мӕнг хъуыдытӕ ӕмӕ гӕды ныхӕстӕ ӕмӕ уымӕ гӕсгӕ бынӕттон цӕрджытӕ нӕ исынц объективон информаци. Уымӕ гӕсгӕ Карлсон ссис ныры ныгуылӕн «демократон» бӕстӕты элитæты знаг.
Путинимӕ интервьюйӕн дыууӕ боны размӕ сарӕзтой анонс ӕмӕ ныгуылӕн бӕстӕты информацион быдыры райдыдтой Карлсоны взӕры кой кӕнын, цъыф калын. Ӕгӕрыстӕмӕй, Евроцӕдисы рабадты тӕрхонмӕ дæр ма рахастой фæндон, цӕмӕй йын санкцитӕ рахӕссой. Афтӕмӕй йӕ нырма зонгӕ дӕр нӕ кодтой, цӕуыл дзырдта Путинимӕ. Æрмӕстдæр Путинимӕ кӕй фембӕлд, уый тыххӕй дӕр цыфыддӕр знагæй тæссагдæр сси! Уый та дын, дӕсгай азты цы демократийӕ ӕппӕлыдысты ӕмӕ ӕгас дунейӕн цы рӕстдзинады стандарттӕ хъардтой, уый. Комкоммӕ зӕгъӕн ис, ныгуылӕн бӕстӕты «демократи» ӕмӕ политикон системӕ арӕзт у мӕнгарддзинад ӕмӕ фӕлитойдзинады бындурыл.
Такер Карлсон йӕ интервью райсыны хъуыддаг бамбарын кодта уымӕй, зӕгъгӕ АИШ-ы ӕмӕ иннӕ ныгуылӕн бӕстӕты цӕрджытӕн бар ис альтернативон информаци райсынӕн ӕмӕ стӕй хатдзӕгтӕ сӕхӕдӕг араздзысты. Уымӕ гӕсгӕ, ныгуылӕн бӕстӕты нӕ, фӕлӕ ӕгас дунейы ӕнӕрхъӕцӕй ӕнхъӕлмӕ кастысты интервьюмӕ.
Интервью райдыдта Украинӕйы темӕйӕ – журналист бафарста Путины, зӕгъгӕ ахӕм хъуыдымӕ цӕмӕ ӕрцыдтӕ, ома НАТО Украинӕйы уылты ныббырсдзӕн Уӕрӕсемӕ?
Цы нысан кæны дзырд «Украинæ»?
Путин йӕхирдыгӕй фӕнысан кодта, ома Уӕрӕсейы разамынад афтӕ никуы хъуыды кодта, никуы тарст уымӕй ӕмӕ йӕм Украинӕйы уылты АИШ ӕнӕнхъӕлӕджы ӕрбабырсдзысты. Цӕмӕй Карлсоны фарстайӕн ӕмбӕлон дзуапп радтаид, уый тыххӕй Путин ӕрдзырдта историон факттыл, Уӕрӕсейы ӕмӕ Украинӕйы сырӕзтыл.
«Кӕцӕй фӕзынд Украинӕ ӕмӕ кӕд райдыдтой Уӕрӕсейӕн йемӕ ахастытӕ? Уӕрӕсейы паддзахады сырӕзт нымайынц 862 азӕй – уӕды рӕстӕгӕй райдыдтой зӕххытӕ иу кӕнын иу паддзахадмӕ ӕмӕ йын уыд дыууӕ центры – Киевы ӕмӕ Новгороды. Уый фӕстӕ 988 азы райстой чырыстон дин ӕмӕ йӕ фӕрцы ноджы сфидар ис паддзахад. Ома ныры Уӕрӕсейы ӕмӕ Украинӕйы территоритӕ сӕдӕ азты дӕргъы уыдысты иу паддзахад, иу адӕмыхатт ӕмӕ иу диныл хӕст.
Астӕуккаг ӕнусты ныллӕууыдысты уӕззау рӕстӕджытӕ, паддзахад ныддихтӕ тӕтӕр-монголты ӕрбабырсты фӕстиуӕгӕн ӕмӕ Киев ӕмӕ иннӕ хуссарварс горӕттӕ сӕ хӕдбардзинад фесӕфтой. Фӕстӕдӕр уыдысты польшæйæгты дӕлбар. Уыдон та уагътой активон ассимиляцион политикӕ, фӕлӕ сын уый кӕронмӕ нӕ бантыст. Дзырд «украина» та нысан кӕны «у края», ома «арӕнгӕрон» чи цӕры, ӕмӕ йын бынтондӕр ницы иудзинад ис хицӕн адӕмыхаттимӕ. Фӕстӕдӕр пропагандӕйы фӕрцы дзырд «украина»-йӕ сарӕзтой хицӕн наци, ома «украинӕгтӕ», фӕлӕ уыдон дӕр сты уырыссаг нацийы минӕвӕрттӕ. Уыцы политикӕ сӕрмагондӕй уагътой уырыссаг нацийы ныхмӕ, цӕмӕй йын йӕ иу хай атоной ӕд зӕххытӕ. Польшæйы ныхмӕ тох кодтой бынӕттон цӕрджытӕ ӕмӕ 17-æм ӕнусы Богдан Хмельницкийы сӕргълӕудӕй бахатыдысты Мӕскуымӕ, цӕмӕй сӕ йӕ дӕлбар бакӕна ӕмӕ сын сӕ бартӕ бахъахъхъӕна».
Путин Карлсонмӕ радта архивон гӕххӕттыты къопитæ. Уыдонæй ирдӕй зынынц ӕппӕт историон процесстӕ, ӕгасӕй ныры Украинӕйы цӕрджыты истори, сӕ рагон иудзинад Уӕрӕсеимӕ. Абоны уыцы факттӕ бирӕтӕ ӕмбӕхсынц, цӕмӕй мӕнг хъуыдытӕ бауырнын кӕной украинӕгтӕн ӕмӕ ныгуылӕн бӕстӕты цӕрджытӕн. Украинӕйы цӕрджыты фылдӕр хай нырма дӕр сӕхи уырыссӕгтыл кӕй нымайынц, уый тыххӕй Путин радзырдта Карлсонӕн иу: «Украинаг хӕстонтӕ ӕрхъулайы бахаудтой ӕмӕ сын аирвӕзӕн нал уыд. Уӕрӕсейаг хӕстонтӕ сӕм хъӕр кӕнынц, зӕгъгӕ, уӕхи уацары радтут ӕмӕ удӕгасӕй баззайат. Фӕлӕ сӕм фӕстӕмӕ рахъӕр кодтой «русские не сдаются», зӕгъгӕ».
Путин радзырдта, Украинайы паддзахады «автортӕ» Ленин ӕмӕ Сталин кӕй уыдысты ӕмӕ йын йӕ территоримӕ бынтон ӕнӕнхъӕлӕджы кӕй ӕрбаиу кодтой Донбассы ӕмӕ Новороссийы. Фӕстӕдӕр, дыккаг дунеон хӕсты фӕстӕ, Украинӕмӕ ноджы ӕрбаиу кодтой ныры ныгуылӕн хай, Закарпатье, румынаг ӕмӕ венгриаг территоритӕ, ӕмӕ ма сын Хрущев та балӕвар кодта Хъырымы ӕрдӕгсакъадах. Комкоммӕ зӕгъгӕйӕ, Украинӕ у хиаразгӕ бæстæ ӕмӕ йæ нырыккон арæнты паддзахад уæвынæн историон бындур нӕй.
1991 азы Украинӕ йӕ бирӕ «лӕвӕрттимӕ» Советон Цæдисæй рахызт ӕмӕ сарӕзта хӕдбар паддзахад. Путин куыд ӕмбарын кӕны, афтӕмӕй Уӕрӕсейы разамынадмӕ ницы претензитӕ уыд, сразы сты алцӕуылдӕр. «Ӕвӕццӕгӕн, хъуыды кодтой, ома иу адӕмыхатт стӕм, иу диныл хӕст, ис нын иу культурӕ, иу истории, ӕмӕ фидӕны дӕр хъӕрмудӕй цӕрдзыстӕм. Уымӕн ӕмӕ Украинӕйы цӕрджыты 90 % дзырдтой уырыссаг ӕвзагыл, сӕ фылдӕр хайӕн хӕстӕджытӕ уыд Уӕрӕсейы. Фӕлӕ афтӕ нӕ хъуыды кодтой украинаг националисттӕ ӕмӕ алыгъуызон фашистон хъуыдыйыл хӕст цӕрджытӕ, кӕцытӕй Украинӕйы ныгуылӕн хайы бирӕ цӕры.
Ныгуылӕн бӕстӕты ӕххуысӕй 90-ӕм азтӕй фӕстӕмӕ Украинӕйы ӕппынӕдзух цыд уырыссаг ӕвзагыл дзурджыты ныхмӕ агрессивон политикӕ, кӕцы нысанмӕздӕхт уыд. Национ хъайтарты бынаты сæвæрдтой немыцаг фашистты фӕдонты – Бандера, Шухевич ӕмӕ ӕндӕрты. Комкоммӕ зӕгъгӕйӕ, украинаг фашистты ‘фсон НАТО-йы инфраструктурӕ сабыргай ӕввахсæй æввахсдæр кодтой Уӕрӕсейы арӕнтӕм. Ахӕм уавӕрты махӕн ӕндӕр гӕнӕн нал уыд ӕмӕ райдыдтам нӕ паддзахады ӕдасдзи-над хъахъхъӕнын».
Советон Цӕдисы ныппырхы фӕстӕ Уӕрӕсейы разамынад ӕнхъӕлдта, зæгъгæ, ныр хъӕрмудӕй цӕрдзыстӕм ныгуылӕн бӕстӕтимӕ. Фӕлӕ фӕсайды сты. Путин куыд зӕгъы, афтӕмӕй 90-ӕм азтӕй фӕстӕмӕ ныгуылӕн бӕстӕтӕ АИШ-ы сӕргълӕудӕй иунӕг къахдзӕф дӕр нӕ сарӕзтой Уӕрӕсейы рдӕм – ӕрмӕстдӕр архайдтой нӕ ныппырх кӕныныл, финанстӕй ӕмӕ ӕхсӕнгарзӕй ифтонг кодтой террористты ӕмӕ сепаратистты. Уымӕй уӕлдай ма НАТО-йы скондмӕ райстой ӕппӕт Хурыскӕсӕн Европӕйы бӕстӕты, кӕд ӕмӕ уый размӕ дзырд радтой, зӕгъгӕ, НАТО хурыскӕсӕны рдӕм нал ауӕрӕх уыдзӕн, уӕддӕр.
Иу рæдыды аргъ политикæйы
АИШ фӕстаг азты бирӕ рӕдыдтытӕ ӕруагъта ӕддагон политикӕйы ӕмӕ йын ныр зын у сӕ рараст кӕнын. Ӕгӕрыстӕмӕй сӕ рараст кӕнынмӕ дӕр нӕ хъавы – архайы, раздӕрау, тыхӕй. Ӕнӕзаконон санкциты фӕстиуӕгӕн доллары кад дӕлӕмӕ хауын райдыдта, сӕ экономикон бастдзинӕдтӕ хъомысджын бӕстӕтимӕ лӕмӕгъ кӕнынц, се ‘ууӕнкдзинад фесӕфтой ӕмӕ сӕм сӕ капиталтӕ ӕвӕрын нал уӕндынц иннӕ бӕстӕтӕ. Ӕппӕт ацы процесстӕ фӕахъаз сты Китай, Инди, Уӕрӕсе ӕмӕ иннӕ бӕстӕты размӕцыдӕн. Ӕрмӕст БРИКС-ы экономикӕтӕ ахӕм темптӕй рӕзынц ӕмӕ тагъд рӕстӕджы сӕ экономикон потенциалимӕ быцӕу кӕнын никӕй бон уыдзӕн.
«АИШ ӕппӕт бадзырдтӕ фехалгӕйӕ, ӕгӕрыстӕмӕй ИНО-йы барад дӕр ныссӕстой сӕ къӕхты бын, фӕндаг радтой ӕнӕзакъонон архайдтытӕн, ӕмӕ ныр дис кӕнынц, сӕ ныхмӕ цӕмӕн систы бирӕтӕ. Борис Ельцинӕй ӕппынӕдзух ӕппӕлгӕ кодтой, фӕлӕ куыддӕр сербæгты сӕрыл сдзырдта, афтӕ сæ цæсты ницӕйаг политик, расыггӕнаг лæг фестад. Ома кӕд сӕ коммӕ кӕсыс, уӕд хорз дӕ, кӕннод та – се знаг».
Абоны бон Европӕйы бӕстӕты разамонджытæ нӕ уадзынц национ политикӕ – АИШ цы зӕгъы, ууыл уайтагъд сразы вӕййынц. Путин куыд ӕмбарын кӕны, афтӕмӕй абоны бон Европӕйы никӕимӕ ис аныхас кӕнӕн, истӕуыл бадзурӕн, уымӕн ӕмӕ, не сты хӕдбар.
Америкӕ ракетӕты ныхмӕ ног системӕ куы райдыдта аразын, ома «система ПРО США», уӕд Путин фӕндон бахаста, цӕмӕй йӕ иумӕ саразой. Фӕлӕ АИШ не сразы сты, уымӕн ӕмӕ йыл кӕд ӕргомӕй нӕ састысты ӕмӕ йӕ хуыдтой Ираны ныхмӕ системӕ, уӕддӕр ӕмбӕрстгонд уыд, Уӕрӕсейы ныхмӕ йӕ кӕй аразынц. Уымӕ гӕсгӕ Уӕрӕсейы бахъуыд ног ӕхсӕнгарз саразын уыцы ПРО-йы ныхмӕ ӕмӕ цыбыр рӕстӕгмӕ сарӕзтой «гиперзвуковую систему», кӕцыйӕ абоны бон ӕмризӕджы ризынц НАТО-йы кадрон афицертӕ.
Сӕрмагонд ӕфсӕддон операцийыл дзур-гӕйӕ Путин банысан кодта, зӕгъгӕ, Украинӕйы хӕст 2014 азы райдыдта паддзахадон фӕфӕлдӕхт саразыны фӕстиуӕгӕн, ӕмӕ ныр Уӕрӕсе архайы уыцы хӕстӕн кӕрон скӕныныл. 90-ӕм азты Украинӕ хӕдбар паддзахад куы ссис, уӕд бадзырдтой, кӕй уыдзӕн нейтралон бӕстӕ ӕмӕ Уӕрӕсейӕн тӕссаг кӕй нӕ уыдзӕн.
«Нейтралон статус, ӕгӕрыстӕмӕй, сӕ Конституцийы дӕр фыст у. Фӕлӕ хъуыддаг куыд ӕвдисы, афтӕмӕй АИШ-ӕн бадзырдтӕ ӕмӕ ӕндӕр ахӕм гӕххӕттытӕ ницы нысан кӕнынц, сӕ пайдайӕн куы нӕ уой, уӕд. Украинӕйы та абоны бон контроль к-нынц АИШ, сты дзы се фсӕддон инструктортӕ, се фсӕддон базӕтӕ. Юридикон цӕс-тӕнгасӕй Украинӕ у хӕдбар падзахад, фӕлӕ фактон ӕгъдауӕй та ис АИШ-ы дӕлбар».
Чи срæмыгъта «Северный поток»
Карлсон ӕнӕбафӕрсгӕ нӕ фӕцис Путины, «Северный поток» чи срӕмыгъта, уымӕй, фӕндыд ӕй базонын, Уӕрӕсе комкоммӕ кӕй аххосджын кӕны, уый. Путин йӕ дзуаппы логикон ӕгъдауӕй бамбарын кодта, ома газы хӕтӕлтӕ срӕмыгътаид, ӕрмӕстдӕр кӕй интересты уыд, уый.
«Уыцы хӕтӕлтӕ срӕмудзын, чизоны, бирӕ кӕйдӕрты фӕндыдаид ӕмӕ аххосджыны агурын хъӕуы ахæмты ‘хсӕн. Фӕлӕ ма дын уыцы уавӕртӕ ӕмӕ фадат дӕр хъуамӕ уа – алкӕмӕн, цӕмӕй Балтиаг денджызы арфы ныббырын ӕмӕ хӕтӕлтӕ срӕмудзыны техникон уавӕртӕ нӕй. Уымӕ гӕсгӕ аххосджын у, кӕй фӕндыд ӕмӕ йӕ бон кӕмӕн бауыдаид, уый.
Мӕнмӕ диссаг кӕсы Германы позици ацы фарстайы. Уымӕн ӕмӕ ацы газы хӕтӕлтӕ иууыл пайдадӕр уыдысты немыцаг экономикӕйӕн. Стӕй ма уый дӕр диссаг у ӕмӕ дзы иу хӕтӕл ӕнӕхъӕнæй баззад ӕмӕ сӕ куы фӕндид, уӕд ӕй райдаиккой эксплуатаци кӕнын. Польшӕйы территорийыл дӕр цӕуы ноджы иу газы хӕтӕл, фæлæ йæ ӕрӕхгӕдтой. Украинӕйы дӕр дыууæ хæтæ-лæй иу ӕрӕхгӕдтой. Куы сӕ фӕндид, уӕд ӕппӕт ацы газы хӕтӕлты руаджы исиккой дзӕвгар аслам ӕрдзон газ. Ам ӕрмӕстдӕр ис иу хатдзӕг саразӕн – Германы разамынад бынтондӕр нӕ хъуыды кӕнынц сӕ адӕмыл, барӕй уадзынц сӕ экономикӕйӕн зианхæссæг политикæ».
Путин банысан кодта, зӕгъгӕ АИШ-ӕн йӕхи проблемӕтӕ дзӕвгар сты, фæлæ уæддæр алы регионты барӕй аразы ӕндыгъд уавӕр.
«АИШ-ы хӕстӕ схӕццӕ сты 33 триллион доллармӕ, ис дзы масштабон миграцион кризис. Сӕ санкцитӕн уӕддӕр кӕрон нӕй. Уыцы санкциты руаджы сӕ фӕндыд ныппырх кӕнын Уӕрӕсейы экономикӕ. Фӕлӕ сын дзы ницы рауад. Абоны бон Европӕйы иууыл тыхджындӕр экономикӕйыл нымад у Уӕрӕсе, Евроцӕдис та фӕстӕмӕ цӕуын райдыдта. Мах нӕ экономикон партнертимӕ ахызтыстӕм национ валютӕтӕм ӕмӕ уыцы хъуыддаг тынг бандӕвта АИШ ӕмӕ Евроцӕдисы экономикӕтыл. Фӕлӕ сӕхи аххос – ӕнӕзаконон санкцитӕ исын нӕ хъуыд».
Кӕронбӕттӕны Путин банысан кодта, зӕгъгӕ, ныгуылӕн бӕстӕтӕн нӕ бантысдзӕн уӕрӕсейаг наци ныддихтӕ кӕнын, кӕрӕдзийы ныхмӕ сӕ скӕнын. «Рӕстӕг рацӕудзӕн ӕмӕ уӕрӕсейӕгтӕ украинӕгтимӕ хъӕрмудӕй цӕрдзысты. Ныры Украинӕйы разамынад афтӕ зӕрдиагӕй цӕмӕ пырх кӕны уырыссаг чырыстон аргъуан? Уымӕн ӕмӕ нӕ уыцы дин иу кӕны, нӕ удтӕ нын уый бӕтты. Ӕмӕ не знӕгтӕн сӕ фӕндтӕй ницы рауайдзӕн».
ДЖИОТЫ Алыксандр
