Куыд ма хъусын кодтам, афтæмæй Хуссар Ирыстон 5-9-æм февралмæ хайад райста Мæскуыйы æхсæнадæмон сæрмагонд экономикон равдыст – «Продэкспо-24»-ы.
Ацы фарстыл бакуыста республикæйы базарадон минæвар Уæрæсейы Таймураз Гогинов. Хуссар Ирыстон ацы армукъайы хайад райста ныр æхсæзæм хатт. Ам махæн цы сæрмагонд стенд хицæн æрцыд, уым æвæрд æрцыдысты нæ бæстæйы экспозицитæ: сæнуадзæн завод «Иронсæн»-ы, Ленингоры бæгæныфыцæн заводы продукци минералон дæттæ, афтæ ма индивидуалон амалиуæггæнджыты продукци – Бететы Юрийы сæн «Борджнис», Лохты Давиды «Лимончелло» æмæ Николай Акоповы мыд æмæ мыдæй продукттæ дæр. Армукъамæ фæуазæг сты РХИ-йы Хицауады Сæрдар Джуссойты Константин æмæ Экономикæйы министр Хъотайты Сæрмæт. Уыдон кусæгон балцы уыдысты Мæскуыйы æмæ бабæрæг кодтой «Продэкспо»-йы не ‘мбæстæгты стенды дæр.
Базарадон минæвар Джуссойты Константин æмæ Хъотайты Сæрмæтæн радзырдта æхсæнадæмон равдыст «Продэкспо» кæй у базарады сæйраг тыгъдад. Йæ фæзуатыл уагъд æрцæуынц сæудæджерадон, базарадон, сервисон комплексты æмæ организациты хъуыддагон фембæлдтытæ. Ацы армукъайы хайад чи исы, уыдонæн фадат ис сæ базарадон-хъуыддагон фембæлдтытæ фæуæрæхдæр кæнынæн. «Ам мах архайæм туризмы фарстатыл дæр, цæмæй Уæрæсе æмæ æндæр бæстæты туристон компанитæ се ‘ргом нæ республикæмæ раздахой. Мах архайæм, цæмæй туристон компаниты минæвæртты базонгæ кæнæм Ирыстоны туризмы фадæттимæ», – загъта Таймураз Гогинов.
Уый ма радзырдта, Хуссар Ирыстоны стенд кæй бабæрæг кодтой дзæвгар адæм, алыгъуызон æмвæзады профессионалтæ, бизнесментæ. Афтæ ма Уæрæсейы Фæсарæйнаг хъуыддæгты министрады бæрнон кусджытæ, Беларус æмæ паддзахад Джибутайы минæвæрттæ Уæрæсейы. Гогиновы ныхæстæм гæсгæ уыдон ныридæгæн бадзырдтæ сарæзтой Федералон регионалон базарадон таг «Азбука вкуса»-имæ, «Иронсæн» æмæ Ленингоры бæгæныйы заводы продукци реализацийы тыххæй. Бирæты бафæндыд фылдæр базонын Хуссар Ирыстоны тыххæй æмæ йæм балцы æрцæуын. Уымæй дарддæр кæцыдæр хайадисджыты цымыдис кодта республикæйы хъалонты фæдыл информаци.
«Хуссар Ирыстон дарддæр дæр æвдисдзæн йæ продукци æхсæнадæмон базæртты. Мах фæнд кæнæм æндæр ахæм армукъатæм дæр нæ национ экспозицитæ бавдисын. Ахæм мадзæлттæ ахъаз сты экономикæ æмæ бизнес-бастдзинæдты райрæзтæн, афтæ ма æндæр бæстæтæй нæхимæ дæр хъæуæг продукттæ ласынæн. Ныртæккæ мах лæууæм нæ бæстæйы экономикæ сфидар кæныны ы къæсæрыл. Уый хуымæтæг этап нæу, хъæуы бирæ кусын. Мах нæ хъус лæмбынæг дарæм ацы процессмæ. Нæ хæс у Уæрæсейы Федерациимæ хæларадон-æмгуыстадон фæндæгтыл фидарæй цæуын. Уыдон та, сæйраджыдæр, сты базарады къабазы фарстатæ: импорт, экспорт, инвестицитæ», – дзырдта Джуссойты Константин.
Уый ма куыд загъта, афтæмæй УФ цæттæ у кæрæдзийæн пайдайы экономикон æмгуыстадмæ, стæй Хуссар Ирыстоны территорийыл æнтыстджын проекттæ реализаци кæнынмæ. Кæрæдзийæн пайдайы фадæттæн абон æвдисæн сты ахæм инвестицион бадзырдтæ, куыд Ленингоры бæгæныфыцæн завод, сæнуадзæн завод, дыргъгуысты фадыджы «Южный сад». Индивидуалон амалиуæггæнджыты продукцимæ кæй цымыдис кæнынц «Продэкспо»-йы, уый та фадат дæтты фидæны ацы продукцийы хуызтæ иттæг зындгонд кæй суыдзысты республикæйæн æддейæ.
«Продэкспо»-йы ма хайад исынц не ‘мбæстæгтæ Цæгат Ирыстон-Аланийæ компани «Сырная долина». Уыдон та равдыстмæ аластой æхсырæй конд продукттæ. Стендыл равдыстой цыхты алы хуызтæ. Уыдон дæр бабæрæг кодтой РХИ-йы Хицауады сæрдар Джуссойты Константин æмæ экономикæйы министр Хъотайты Сæрмæт.
Ирыстонæй ныццæугæ бизнесментæн ахæм уæрæх фæзуаты сæ интерестæ размæ кæныны хъуыддаджы стыр хайбавæрд ис Хуссар Ирыстоны æдзухон базарадон минæвар Таймураз Гогиновæн. Фæскавказы адæмтæй иууыл активондæр у Хуссар Ирыстоны базарадон минæварад, уымæн æмæ хайад райсынц æппæт экономикон мадзæлтты. Нæ минералон дæттæ алы хатт дæр экономикон армукъа «Продэкспо»-йы бацахсынц призон бынæттæ.
Армукъа йæ куыст фæцис 9-æм февралы.
УАЗÆГТЫ Марфа
