Дубай цымыдис кæны «Alandon» æмæ «Swadon»-мæ

Республикæ Хуссар Ирыстоны амалиуæггæнджыты Базарадон цæдисы сæргълæууæг Гæбæраты Алан нын куыд фехъусын кодта, афтæмæй февралы мæйы кæрон Турчы бæстæйы Дубайы горæты уыдис 28-æм Æхсæнадæмон равдыст «Gulfood-2023». Ацы равдыстмæ хуынд æрцыд хуссарирыстойнаг компани «Апиотрес»-ы дæр. Ацы компани «Продэкспо 2023»-ы райста призон бынат. Йæ продукци – суадоны дæттæ «Alandon» æмæ «Swadon» райстой æвзист майдантæ. Хуссар Ирыстонæй фыццаг хатт æвдыст æрцыд продукци фæсарæнты ахæм уæрæх хæлцад æмæ нозты армукъайы. Ацы суадоны дæттæ стыр цымыдис сæвзæрын кодтой Арабаг бæстæтæй дыууæ компанимæ. Сæ иу архайы æмæ кусы Дубайы рæстæмбис категорион отелты натуралон донæй ифтонг кæныныл. Иннæ та офисты ифтонг кæны донæй. Компанитæ «Sorp group» æмæ «101 hotels» ныртæккæ уадзынц бадзырдтæ «Апиуотрес»-имæ. Амалиуæггæнджыты базарадон цæдисы сæргълæууæг куыд зæгъы, афтæмæй уæлдæр загъд компанитæ цæттæ сты мæйы мидæг доны 100 мин авджы æлхæнынмæ.

РХИ-йы Базарадон минæвар ма куыд зæгъы, афтæмæй компани «Апиуотрес» цы дон бавдыста, ахæм ма ис Дзауы районы Итраписы хъæумæ хæстæг. «Gulfood-2023»-ы продукци бавдисынæн сын баххуыс кодта «Росэспо». Амалиуæггæнæджы ныхæстæм гæсгæ компани цæмæй ахæм уæрæх масштаб фæсарæйнаг хæлц æмæ нозты армукъамæ бахаудтаиккой, уый тыххæй бахъуыдысты дзæвгар рæстæг æмæ тыхтæ. «Роспотребнадзор»-æй паддзахадон регистраци æмæ сертификат кæй райста, уый фадат дæтты компани «Апиуотрес»-æн Таможнæйон цæдисы бæстæтæ æмæ фæсарæйнаг компанитимæ æмæ амалхъом адæмимæ æмгуыст кæнынæн.

Рæстæджы цыдимæ, дон куы ахиза Уæрæсе æмæ фæсарæйнаг базарадмæ, уæд кондады гуырахст фæфылдæр кæндзысты æмæ кусæгон бынæттæ кæй фæзындзæн. Ныртæккæ уал «Апиуотрес»-ы кусы æрмæст дæс адæймаджы. Компани сиды æндæр æнтыстджын амалиуæггæнджытæм, цæмæй ма зивæг кæной сæ продукци æхæм æхсæнадæмон равдыстытæм бавдисынмæ. Æхсæнадæмон равдыст «Продэкспо» æмæ «Gulfood»-ы дæр хæлцад æмæ нозты товартæ бавдисæн ис æнæаргъæй. Уый тыххæй хъæуы æрмæстдæр æппæт æмбæлæг документаци афоныл бавдисын РХИ-йы Амалиуæггæнæджы базарадон цæдисы.

УАЗÆГТЫ Марфа