Майы кæрон Белорусийы Бресты уагъд æрцыд Æхсæнадæмон фестиваль-конкурс «АРТ-ПАНОРАМА РОССИЯ-БЕЛАРУСЬ», зæгъгæ. Уæрæсейы Федерацийæ жюрийы скондмæ бацыд Хуссар æмæ Цæгат Ирыстоны сгуыхт артисткæ, аивадон энциклопеди «Muveszet»-мæ (Венгри) гæсгæ «Культура»-йы номинацийы азы адæймаг, «BeIIa Voce»-йы премийы хицау, Национ политикæ æмæ æддагон бастдзинæдты фæдыл РЦИ-Аланийы министры уынаффæгæнæг, Мæскуыйы ирон æхсæнады культурæйы фарстаты фæдыл къамисы сæргълæууæджы хæдивæг Амага Готти (Готойты Иринæ).
Уæрæсейæ ма фестивалы жюрийы сконды уыд проект «Синяя Птица»-йы музыкалон редактор, Æппæтуæрæсейон фæсивæдон форум «Таврида»-йы эксперт, шоу «Голос. Дети»-йы генералон продюсер Марина Андрусенко. Жюрийы сæрдар уыд аивæдты Æхсæнадæмон фестиваль «Славянский базар в Втиебске»-йы директор, паддзахадон уагдон «Центр культуры «Витебск»-ы генералон директор Глеб Лапицкий. Афтæ ма жюрийы скондмæ бацыдысты Белоруссийы популярон музыканттæ æмæ артисттæ.
«Егъау тæлмæнтæ. Уый абон у тынг ахсджиаг проект Уæрæсе æмæ Белорусийы курдиатджын фæсивæдæн. Ахæм мадзæлтты фæрцы кæрæдзиимæ зонгæ кæнынц дыууæ бæстæйы горæтты фæсивæд æмæ уый стыр ахъаз у ахсджиаг моменты баиу уæвынæн. Уымæн æмæ культурæ æмæ аивад алыхатт дæр уыдысты дипломатийы хуыздæр хæлæрттæ. Стыр кадыл нымайын мæхицæн Ирыстоны æвдисын, нæ бæстæйы тыххæй дзурын.
Тынг бирæ ирд номыртæ дзы уыд. Фылдæр хатт ахæм стыр фестивалты жюрийы куыст иугъуызон вæййы, зын у алкæцы хайадисæджы дæр банысан кæнын æмæ сын сæ курдиаты цæхæр уайтагъд рахатын. Фæлæ ацы хатт алцыдæр уыд æндæргъуызон, банкъардтон дзы тынг динамикон атмосферæ. Чысыл улæфты рæстæджы, мах, жюрийы уæнгтæ, зарыдыстæм нæ хайадисджыты зарджытæ. Уæлдай бузныджы ныхæстæ зæгъын мæ фæнды фестивалы организацион комитетæн йæ сæрдар Лариса Петровскаяйы сæргълæудæй», – радзырдта нын фестивалы тыххæй йæ тæлмæнтæ Амага Готти.
Гала-концерты ма уникалон уыд, жюрийы уæнгтæ æмæ хайадисджытæ иумæйаг номыртæ кæй сæххæст кодтой, уымæй дæр. Уыдон уыдысты мастер-кълæсты хуызæн. Фестиваль уагъд фæцæуы Республикæ Беларусы ахуырад, культурæ æмæ зонады фæдыл æдзухон къамисы, Национ æмбырды минæвæртты, аивæдты æхсæнадæмон фестиваль «Славянский базар в Витебске», проекты партнер – уырыссаг культурæйы фестиваль «Истоки»-йы æххуысæй.
Зынгæ фестиваль «Славянский базар»-ы эгидæйы бын белорусаг Бресты уагъдцæуæг æхсæнадæмон конкурс фестиваль «Арт-Панорама»-йы радон хатт хайад райста хоры студи «Гармония»-йы бафæзминаг коллектив. Студи «Гармония» конкурсмæ рахызт цалдæр скондæй: хор æмæ вокалон джазон ансамблтæ. Æмæ æппæт скондтæ дæр конкурсæй ахастой кубоктæ æмæ 2-аг æмæ 3-аг къæпхæны лауреатты дипломтæ. Ацы егъау фестивалы хайад райстой Уæрæсе æмæ Белорусийæ сæдæгай коллективтæ. Аргъ сын кодта бæрзонд профессионалон жюри æмæ афтæмæй лауреат суæвын æнцон нæ уыд. Æвзонг зарæггæнджыты курдиатæн стыр аргъ скодтой ирон оперон зарæггæнæг Амага Готти, ансамбль «Песняры»-йы экссолист Андрей Усанов æмæ Уæрæсейы телеуынынады фыццаг каналы музыкалон редактор Марина Андрусенко.
Готойты Иринæйы куы базыдтой Ирыстонæй у, уæд ыл уæлдай цин фæкодтой. Ирон дарæсы йын сæвæрдтой йæ нывимæ банертæ. Иудзырдæй, нæхи цхинвайлаг чызгæн кад кæнынц ахæм зынгæ адæймæгтæ, куыд Марина Андрусенко, Глеб Лапицкий, Лариса Петровская æмæ æндæртæ. Стыр æнтыст ын у, ахæм фестивалы жюрийы уæнг кæй ссис, уый дæр.
Амага Готти ма куыд банысан кодта, афтæмæй ацы аз июлы мæйы «Центр культуры «Витебск»-ы фæлгæтты уыдзæн Кавказы фестиваль. Сæ дæсныйад уым æвдисдзысты ирыстойнаг курдиæттæ дæр. Йæ зонындзинæдтæ нæ бавгъау кæны Иринæ Ирыстоны суинаг курдиæттæн, цæстуарзонæй бакусы семæ.
Уый ма фестивалы рæстæджы йæ раныхасы загъта, зæгъгæ, хорз уаид æмæ фидæны куы хуыйнид фестиваль «Уæрæсе-Белорус-Ирыстон», æмæ йæ ныхæстыл залы адæм сæмбæлдысты тыхджын къухæмдзæгъдимæ. Иудзырдæй, ирон сылгоймаг тынг тыхсы йе ‘мтуг ирон адæмыл. Фæнды йæ, цæмæй нæ аивады куыджытæ хайад исой алыгъуызон фестивалты æмæ конкурсты æмæ афтæмæй Ирыстонимæ зонгæ кæной æндæр нациты минæвæрттæ дæр.
Банысан кæнын хъæуы уый дæр, æмæ æрæджы Мæскуыйы цур «Крокус Сити Холлы» цы æбуалгъы теракт æрцыд, уым кæй бахаудта Готойты Иринæ дæр. Фæлæ йын Ирыстоны тыхджын дзуæрттæ баххуыс кодтой, сæрæгасæй аирвæзт уырдыгæй, уадз, æмæ йын дарддæр дæр æххуысгæнæг уæнт!
Нæ зæрды дын зæгъы Амага, ноджы стырдæр æнтыстытæ дæ архайды.
ДЖИОТЫ Екатеринæ
