Уыцы бæстæ хъæздыг у, сабитæ æмæ дзы ныййарджытæ амондджын кæм сты. Нæ сабитæ нæ бæстæйы стырдæр хæзна сты, нæ цин, нæ рухс æнкъарæнтæ хæссæг. Æмæ кæд абон цард уæззау у, нæ сабитæ хæст цы у, уый базыдтой, арæх сын сæхи цард дæр ахæссы, уæддæр паддзахад кæстæр фæлтæрыл хорз ауды, алы мадзæлттæ сын аразы сæ рухс фидæнæн. Уый та ноджыдæр рабæрæг 1 июны, Сывæллæтты дунеон боны рæстæг. Куыд æппæт Уæрæсейы, афтæ Цæгат Ирыстоны дæр сбæрæг кодтой ацы кадджын бæрæгбон.
Нырма уал республикæйы Сæргълæууæг Сергей Меняйло райсомæй ралæвæрдта йæ арфæтæ: «Мæ чысыл хуртæ, арфæ уын кæнын ацы рæсугъд бæрæгбоны фæдыл! Ут æнæниз æмæ хъæлдзæг! Уæ разæй ис цымыдисаг æмæ дæргъвæтин цард уæлахизтæ æмæ хъæлдзæг цаутимæ æмæ йыл амондджынæй цæут! Мах, уæ хистæртæ, кæддæриддæр уæ фарсмæ уыдзыстæм. Сараздзыстæм æппæтдæр, цæмæй уæ фидæн рæсугъд уа».
Кæд боныхъæд зæрдæзæгъгæ нæ уыд, уæддæр Дзæуджыхъæуы Сæйраг парчы айтыгъдысты сывæллæтты алыхуызон хъазæн тематикон фæзтæ. Сабитæ иу ран нывтæ кодтой, иинæ ран спортæй архайдтой… Уыд дзы мастер-къластæ адджын гуылтæ кæнынæй, флешмобтæ, концерттæ, зондабитæ… Национ музейы ацыд фестваль равдыстимæ «Про чтение», зæгъгæ. Горæты уынгты æнæхъæн бон цыд сæрмагонд фæлыст трамвай æмæ лæвар ласта сывæллæтты. Трамвайы саходæн уыд дыргътæ, адджинæгтæ æмæ цайæ.
Уыцы бон «Диалог»-ы ахуырдзаутæ дæр равдыстой сæ арæхстдзинад: компьютертыл ирон æвзагыл бацæттæ кодтой алыхуызон программæтæ, хъæзтытæ, мультипликацион кинонывтæ…
Бæрæгбоны уæлдай змæлд уыд Дзæуджыхъæуы сывæллæтты реабилитацион центр «Доброе сердце»-йы. Ам сты фæкæсинаг бинонты сабитæ, стæй сидзæртæ. Уымæ гæсгæ, ардæм æрбацыдысты республикæйы разамынад дæр лæвæрттæ æмæ адджинæгтимæ. Сæйрагдæр лæвар уыд бассейн. Хæрзаив фæлыст райдзаст кæрты дидинджытæ, шартæ, хъæлдзæг музыкæ. Сабитæ ацы бæрæгбонæй райстой стыр тæлмæнтæ. Уыдон дæр уазджытæн сæ арæхстдзинад равдыстой зарынæй, кафынæй, æмдзæвгæтæ дзурынæй.
Нæ уацх.
