Хуссар Ирыстоны Централон æвзарæн къамис ауагъта æмбырд, цыран сфидар кодта 17 округон æвзарæн къамисты скондтæ. Сарæзта ма æвзарæн фадгуытæ, уыцы нымæцы республикæйæн æддейæ дæр.
Куыд банысан чындæуыд, афтæмæй округон æвзарæн къамисты уæнгтæн сæ бон у, сæ хæстæ æххæст кæныны рæстæджы сæ сæйраг куыстæй сæхи ссæрибар кæнын, сæ куыстмыздтæ бахъахъхъæнгæйæ. ЦÆК-ы сæргълæууæг Гæджиты Эмилия куыд бамбарын кодта, афтæмæй къамисæн йæ хæс нæу, округон æвзарæн къамисы уæнгтæм кæй кандидатурæты бавдыстой, уыдон сæ сæйраг куыстытæй ссæрибар кæна. Уыцы фарстатæ скъуыддзаг цæуынц фæллойадон закъондæттынадмæ гæсгæ æмæ кусæг æмæ куыстдæттæг куыд бадзурой, уымæ гæсгæ.
Уый банысан кодта, зæгъгæ, 22 апрелмæ округон къамистæ хæсджын сты сусæг хъæлæсæппæрстæй се скондтæй равзарой сæрдæрттæ, сæрдæртты хæдивджытæ æмæ нымæрдартæ.
«Уый фæстæ æрбахондзыстæм округон æвзарæн къамисты сæрдæртты се ‘ппæты дæр, цæмæй сын бамбарын кæнæм, сæ разы цы хæстæ ис, уыдон», – загъта Гæджиты Эмилия.
Централон æвзарæн къамис сарæзта æвзæрстытæ ауадзын æмæ хъæлæстæ нымайыны тыххæй æвзарæн фадгуытæ дæр. Æдæппæт кусдзысты 75 фадыджы, уыдонæй 71 – Хуссар Ирыстоны территорийыл, цыппар та – республикæйы æддейæ, уыдонæй дыууæ – Цæгат Ирыстоны территорийы, иу – Мæскуыйы, иу та – Сухумы.
Иуæй-иу дæрддаг хъæуты 20-æй къаддæр æвзарджытæ кæй баззад, уый тыххæй сæ нæ бакондæуыдзæн æвзарæн фадгуытæ. Уый бахынцгæйæ, закъонмæ гæсгæ, скъуыддзаг æрцыд, уыцы хъæутæй кæрæдзимæ æввахс кæцытæ сты, уым æвзарæн фадгуытæ баиу кæнын.
Гæджиты Эмилия ма хъусдард аздæхта РХИ-йы Фæсарæйнаг хъуыддæгты министрады фыстæгмæ, цыран дырысæй нысан сты, республикæйы æддейæ кæмыты æмæ цал æвзарæн фадыджы байгом уыдзæн, уыдон.
«Республикæ Хуссар Ирыстоны æмбæстæгтæ кæм сты, уыцы фæсарæйнаг бæстæтæ бар куы нæ радтой, уæд сæ территоритыл æвзарæн фадгуытæ бакæнæн нæй.
Ис Хуссар Ирыстоны Фæсарæйнаг хъуыддæгты министрады официалон дзуапп, кæцы йæ рады куыста РХИ-йы æддейæ æвзарæн фадгуытæ бакæныны фадатыл, æмæ уый мах дæр бахынцдзыстæм», – йæ ныхасмæ бафтыдта ЦÆК-ы сæргълæууæг.
Уымæй дарддæр, закъондæттынадмæ гæсгæ, республикæйæн æддейæ цы æвзарæн фадгуытæ уыдзæн, уыдон хаст æрцæудзысты иууон республикон округтæм. ЦÆК сæ бахаста Дзауы районы 12-æм æмæ 13-æм æвзарæн округтæм.
ЦÆК 5 кандидатæн радта специалон æвзарæн хыгъдтæ бакæныны бар.
Фидар æрцыдысты округон æвзарæн къамисты уæнгты бæлвырдгæнæн гæххæттыты формæ æмæ округон къамисты тымбыл мыхуырты (печать) хуызтæ дæр.
Æмбырды рæстæджы Централон æвзарæн къамисы уæнгтæ æркастысты, йæхи йæхæдæг чи раразмæ кодта, уыдонæй сæ иуы куырдиатмæ, сбæлвырд ма кодтой иумандатон æвзарæн къамисты сырæзты тыххæй бæрнджын адæймæгты æмæ ивындзинæдтæ бахастой депутаттæм кандидатты документтæ исын æмæ сæ бæрæг кæныны фæдыл кусæгон къорды скондмæ.
ЦÆК-ы уæнг Цхуырбаты Маринæ йæ коллегæты базонгæ кодта, 2019 азы парламентон æвзæрстыты хайад чи райста, уыцы æвзарджыты номхыгъды фæдыл информациимæ.
Йæ ныхæстæм гæсгæ, №1 æвзарæн округ æмæ №1 æвзарæн фадыджы цæвиттонæй бæрæг у, æвзарджыты æмбисæй фылдæр кæй цæрынц уыцы окруджы, фæлæ уым регистраци не сты, бæлвырдгæнæнтæ та арæзт æрцыдысты хæдзæрттыл зилгæйæ.
ЦÆК-ы сæрдар бафиппайдта, зæгъгæ, Цхинвалы администраци æвзарджыты номхыгъдтæ куы нæ радта, уæд æвзæрстыты тыххæй закъонмæ гæсгæ фарст æвæрд æрцæудзæн, цæмæй фадыгон къамисты уæнгтæн бар лæвæрд æрцæуа адрестыл азилгæйæ, æвзарджыты номхыгъдтæм бахæссой, бæрæг æвзарæн фадыджы территорийыл регистраци чи у, æрмæстдæр уыцы æвзарджыты, Конституцион закъон куыд домы, афтæ.
Къамисы уæнгтæ ма уынаффæ кодтой организацион фарстатæм хауæг æндæр фарстатыл дæр.
БАЛÆВÆРДТОЙ СÆ ДОКУМЕНТТÆ
Централон æвзарæн къамисы нымæрдар Аулохты Кристинæ куыд фехъусын кодта, афтæмæй майрæмбоны ЦÆК-мæ сæ документтæ балæвæрдтой, депутаттæм кандидаттæй сæхи чи раразмæ кодтой, уыдонæй æртæ æмбæстаджы.
«Документтæ нæм æрбарвыстой депутаттæм кандидаттæ: Хуыгаты Алан – Дзауы районы иумандатон æвзарæн округ №13, Æлборты Алыксандр – Цхинвалы иумандатон æвзарæн округ №8 æмæ Коцты Игорь – Цхинвалы иумандатон æвзарæн округ №1», – загъта Кристинæ.
Раздæр та ЦÆК-мæ сæ документтæ балæвæрдтой депутаттæм кандидаттæ Цхинвалæй: Чысиаты Константин – иумандатон æвзарæн округ №5, Гæбæраты Гамлет – иумандатон æвзарæн округ №7, Дыгъуызты Олег – иумандатон æвзарæн округ №2. Елбачиты Алыксандр – Дзауы районы иумандатон æвзарæн округ №12, Хъазиты Зелим – иумандатон æвзарæн округ №3 æмæ æндæртæ.
Сабаты ЦÆК-мæ сæ документтæ балæвæрдтой Пæррæстаты Таймураз – Дзауы районы иумандатон æвзарæн округ №12, Къусраты Давид – Ленингоры районы иумандатон æвзарæн округ № 16, Æрсойты Лавир – Знауыры районы иумандатон æвзарæн округ №15.
Хуыцаубоны та Централон æвзарæн къамисмæ сæ документтæ балæвæрдтой Гæбæраты Инарæ – Цхинвалы иумандатон æвзарæн округ №2 æмæ Гасситы Алыксандр – Цхинвалы иумандатон æвзарæн округ № 3.
Æвзæрстыты тыххæй РХИ-йы закъонмæ гæсгæ, партитæ æмæ иумандатонтæн сæ документтæ ЦÆК-мæ бадæттынæн ис рæстæг 25-æм апрелмæ.
