15-æм марты Уæрæсейы байгом уыдзысты президентон æвзарæн фадгуытæ. Ацы ахсджиаг цауыл Хуссар Ирыстоны цæрæг адæм цахæм хъуыдытимæ æмбæлынц, нæ адæмæн æвзæрстытæ цасбæрцæй фæахъаз уыдзысты æмæ Владимир Путины æддагон æмæ мидæггагон политикæйæн не ‘мбæстæгтæ цахæм нысаниуæг дæттынц, уый тыххæй сарæзтам æрфарст.
Гæбæраты Анатоли – Хуссар Ирыстоны паддзахадон университеты философи æмæ культурологийы кафедрæйы сæргълæууæг, философон зонæдты кандидат, профессор:
– Стыр æмæ ахсджиаг хæс скъуыддзаг кæнынц ацы уалдзæг Уæрæсейы адæм. 15-17-æм марты æвзардзысты бæстæйы сæргълæууæджы. Ацы æвзæрстытæ æрмæст Уæрæсейы адæмы не ‘ндавынц, фæлæ ма Хуссар Иыстоны æмæ дунейы æндæр сабырцардуарзаг адæмты дæр. Уымæн æмæ куыд нæхи, афтæ уыдоны сомбоны хъысмæт дæр бирæ-бæрцæй баст у Уæрæсеимæ, уымæ гæсгæ хъуыдытæ æмæ фæндиæгтæ æвзæрстыты тыххæй цъус не сты. Сæйраг у æдасдзинад æмæ уыцы хъуддаджы нæ адæм стыр ныфс æвæрынц Уæрæсейæ. Зындзинæдты цал хатты бахаудыстæм, уал хатты Уæрæсе уыд нæ фарсмæ, уыдон фæрцы нæ зындзинæдтæ æмæ зиæнттæ дæр уыдысты бирæ къаддæр.
Ноджыдæр ма йæ зæгъон, сабыр цардуарзаг адæм се ‘ппæт дæр сты Владимир Путины æддагон æмæ мидæггагон политикæйы æвварс. Йæ архайд здæхт у, цæмæй алы адæмтæ дæр рæзой æмæ размæ цæуой, сæхи куыд фæнды, афтæ, æндæр адæмтимæ хæларæй цæргæйæ æмæ æххуыс кæнгæйæ. Уымæй растдæр политикæ ма цы хъуамæ уа, æмæ куыд мæхæдæг, афтæ мæ кафедрæйы уæнгтæ æмæ студенттæ се ‘ппæт дæр хъæлæс кæныны рæстæджы уыдзыстæм Владимир Путины фарс. Уымæн та ис хорз фадæттæ. Нæ республикæйы æвзæрстыты боны байгом уыдзæнис æхсæз æвзарæн фадыджы. Уырны мæ, алчи дæр нæ бæстон кæй ахъуыды кæндзæнис æмæ кæй балæудзæнис, нæ адæм стыр ныфс кæмæй æвæрынц уыцы адæймаджы фарс.
Гæззаты Юринæ – Цхинвалы 6-æм астæуккаг скъолайы директор:
– Хуссарирыстойнаг адæмы царды Уæрæсейы президентон æвзæрстытæ ахсынц ахсджиаг бынат. Ацы æвзæрстытæ æрмæст Уæрæсейы хъысмæт не скъуыддзаг кæнынц, фæлæ ма Хуссар Ирыстоны хъысмæт дæр. Уæрæсейы абоны уавæр нæ рахондзыстæм хуымæтæг. Кæд иуæй-иу фæсарæйнаг бæстæты разамонджытæ балæууыдысты Украинæйы фашистон режимы фарсмæ, Уæрæсейæн аразынц алыгъуызон ныхдуртæ, уæддæр Владимир Путины фæрцы алы фадыджы дæр ис æнтыстытæ. Куыд мæн, афтæ не скъолайы коллективы дæр уырны, ацы æвзæрстыты Владимир Путин куы рамбула, уæд тагъд рæстæджы Уæрæсейы, Хуссар Ирыстоны æмæ ма æндæр бæстæты проблемæтæн дæр цадæггай кæй æрцæудзæнис кæрон.
Куыд Уæрæсе æмæ Хуссар Ирыстоны æмбæстаг, афтæ мæ хæсыл нымайын, цæмæй æвзæрстыты райсон хайад æмæ схъæлæс кæнон Владимир Путинæн. Фæнды мæ, цæмæй ахæм раст къахдзæф сараза Хуссар Ирыстоны алы цæрæг дæр.
Æлборты Анатоли – Нæ горæты цæрæг, куысты ветеран:
– Мæ хъуыдымæ гæсæ, æвзæрстытæ ацæудзысты хорз. Нæ дзы уыдзæнис, æвзæрстытыл мæгуырауæрдæм чи бандава, ахæм цаутæ. Уырны мæ, уæрæсейæгтæ бæстон кæй ахъуыды кæндзысты, кæй бамбардзысты ацы уæззау рæстæджы президенты бынаты Владимир Путины хуызæн кæй ничи сарæхсдзæнис, æмæ кæй рахæцдзысты йæ кандидатурæйы фарс. Уырны мæ, Владимир Путин нæ адæмæн цы лæггæдтæ бакодта æмæ кæны, уыдонæн лæвæрд кæй æрцæудзæнис æмбæлон аргъ æмæ сæ хъæлæстæ кæй ратдзысты Владимир Путинæн.
Банысан ма кæндзынæн уый æмæ ацы æвзæрстыты, кæд Владимир Путин Уæрæсейы президентæй ногæй æвзæрст æрцæуа, уæд уый ноджыдæр бирæ фæахъаз уыдзæнис нæ паддзахады рæзт æмæ размæцыдæн. Алчидæр ма нæ лæмбынæг ахъуыды кæнæд, гуырдзиаг фыдгæнджытæй кæй фæрцы фервæзтыстæм. Кæй фæрцы нæ къухты бафтыд, фыдæлтæй фæстæмæ нæ адæм цæмæ бæллыдысты, уыцы хæдбардзинад.
Æз дæн Владимир Путины политикæйы æвварс. Уымæн æмæ уый сæйраджыдæр фæнды, цæмæй дунейы адæмтæ уой æмбар, алы адæмтæ дæр рæзой æмæ размæ цæуой, сæхи фæндонмæ гæсгæ.
ГÆЗЗАТЫ Иван
