Æрæввахс кæнынц РХИ-йы президентон æвзæрстытæ. Бæрæг куыд у, афтæмæй æвзæрстыты хайад райсыны сæраппонд республикæмæ æрцæудзысты æхсæнадæмон цæстдарджытæ дæр.
Абоны бон уал бæрæг у, республикæйы президентон æвзæрстытæ ауадзыны рæстæджы Хуссар Ирыстонмæ кæй æрцæудзысты цæстдарджытæ Уæрæсейы Федерацийæ æмæ Луганскы Адæмон Республикæйæ.
Хуссар Ирыстоны Централон æвзарæн къамис хонæн гæххæттытæ арвыста Уæрæсейы Федераци, Абхазы, Донецкы Адæмон Республикæ, Луганскы Адæмон Республикæ æмæ Приднестровьейы республикæйы минæвæрттæм, æхсæнадæмон цæстдарджыты хуызы республикæйы президентон æвзæрстыты хайад райсыны тыххæй. Æвзæрстыты хайад райсыны тыххæй сæ хайадист бафидар кодтой Уæрæсейы Федерацийы æхсæнадон палатайы цæстдарджытæ, Цæгат Ирыстоны Централон æвзарæн къамисы æмæ Луганскы Адæмон Республикæйы минæвæрттæ.
ЦÆК-ы нымæрдар Аулохты Кристинæ куыд банысан кодта, афтæмæй дыццæджы райсомæй Хуссар Ирыстоны Полиграфион баиугæнды мыхуыр кæнын райдыдтой бæстæйы президентон æвзæрстытæ ауадзыны тыххæй æвзæрстыты бюллетентæ.
Йæ ныхæстæм гæсгæ, мыхуыр æрцæудзæн 40 мин бюллетены.
«Хуссар Ирыстоны закъондæттынады нысан ис, зæгъгæ, гæнæн ис, ныммыхуыргонд бюллетенты нымæц уа, æвзарджыты иумиаг нымæцмæ ма æртæ проценты куы бафтауай, уыйас. Уымæ гæсгæ бюллетентæ рауадысты 40 мины. ЦÆК-ы цы номхыгъдтæ ис, уыдонмæ гæсгæ республикæйы ис 34 мин æвзарæджы. Уыдонæй дарддæр республикæйы æддейæ байгом уыдзæн цыппар æвзарæн фадыджы: дыууæ – Цæгат Ирыстоны территорийыл, иу – Мæскуыйы, иу та – Абхазы», – бамбарын кодта Аулохты Кристинæ.
Уый куыд загъта, афтæмæй бюллетентæ куыд мыхуыр цæудзысты, уымæ сæ хъус дардзысты ЦÆК-ы минæвæрттæ, регистраци цы кандидаттæ æрцыдысты, уыдоны минæвæрттæ, афтæ барадхъахъхъæнæг органты минæвæрттæ. Цалынмæ бюллетентæ мыхуыр цæуой, уæдмæ типографы бæстыхай хъахъхъæндзысты барадхъахъхъæнæг органты кусджытæ. Централон æвзарæн къамисмæ бюллетентæ баласдзысты барадхъахъхъæнæг органтæ. Цалынмæ бюллетентæ территориалон æвзарæн фадгуытыл уæрст не ‘рцæуой, уæдмæ ЦÆК хъахъхъæд цæудзæн æхсæвæй-бонæй.
Йæ рады Хуссар Ирыстоны Централон æвзарæн къамисы уæнг Цоциты Игорь фехъусын кодта, Республикæ Цæгат Ирыстон – Аланийы цæрæг Хуссар Ирыстоны æмбæстæгтæн сæ бон кæй уыдзæн 10-æм апрелы хайад райсой Хуссар Ирыстоны президентон æвзæрстыты, горæт Дзæуджыхъæуы цы дыууæ æвзарæн фадыг байгом, уыдоны.
Йæ ныхæстæм гæсгæ, Цæгат Ирыстоны æвзарæн фадгуытæ байгом сты Ирыстоны уынджы 3-æм хæдзары (Культурæйы галуан «Металлург»-ы бæстыхайы) æмæ Леоновы уынджы 2-æм хæдзары (ГБУК Фæсивæды республикон галуаны бæстыхайы). Фадыгон æвзарæн къамистæ арæзт æрцыдысты, уыдоны сконды ис фæйнæ 10 адæймаджы, кæцытæ абоны бон æххæст кæнынц сæ бæрныуæвæг хæстæ).
Цæгат Ирыстоны æвзарæн фадгуытæ æвзæрстыты бон – 10-æм апрелы кусдзысты 8.00 сахатæй 20.00 сахаты онг. Уыцы бон сæ æвзæрстыты бартæй спайда кæндзысты, РХИ-йы æмбæстæгтæй 18 азы æмæ уымæй уæлæмæ кæуыл цæуы, уыдон, кæцытæм ис Республикæ Хуссар Ирыстоны паспорттæ.
Хуссар Ирыстоны президентон æвзæрстытæ уагъд цæудзысты Мæскуы æмæ Сухумы дæр. Уæрæсейы æмæ Абхазы столицæты байгом фæйнæ иу æвзарæн фадыджы.
Comments are closed, but trackbacks and pingbacks are open.