Æрæджы нæ горæты Сывæллæтты сфæлдыстадон галуаны уыд конкурс «Фæлдисæм рæсугъддзинад». Ацы сфæлдыстадон конкурсы хайад райстой Цхинвал æмæ районты скъолаты технологийы ахуыргæнджытæ.
Конкурсы æппæт хайадисджытæ дæр ерыс кодтой, зæгъгæ, сæ равзаргæ дæсныйæдты чи хуыздæр сарæхсдзæн æмæ адæмы рæгъмæ рахастой хъæдæрмæг æмæ гæххæттыл куыстытæ, бисер æмæ æндæхтæй быд алыгъуызон рæсугъд дзаумæттæ. Мадзалы фæлгæтты ма ауагътой мастер-къластæ дæр. Ам та сывæллæттæ зонгæ кодтой хъæдæрмæгимæ куысты сусæгдзинæдтимæ. Къалаты Нариман йæ мастер-къласы равдыста хъæдæрмæджы лыггагæй уидыг куыд ацарæзта, уый.
«Ацы конкурсы сæйраг нысан у, технологийы ахуыргæнджыты сфæлдыстадон потенциал раргом кæныны хъуыддаджы педагогтæн баххуыс кæнын, цæмæй сæ дæсныйадыл хуыздæр фæхæст уой, афтæ ма раргом уой курдиатджын ахуыргæнджытæ», – банысан кодта Сывæллæтты сфæлдыстадон галуаны директоры хæдивæг Сиукъаты Мальвинæ.
Конкурсы фæстиуджытæм гæсгæ фæбæрæг сты хуыздæртæ ахæм номинациты: «хъæдыл нывæфтыдтæ аразын», «хъæдыл арауын», «фæлмæн хъазæн», «кæрдын æмæ хуыйын», «адæмон куклæ», «бисерæй бийын», «æндахæй бийын» æмæ «сувенир».
Ацы конкурс уагъд цæудзæн дыууæ азы мидæг иу хатт.
Нæ уацх.
