Уæлвæткон уавæрты министрады хъæппæрисæй, 20-æм майы æхгæд æрцыд горæтæй микрорайон «Хурзæрин»-мæ, Стыр Леуахийы сæрты цы хид æвæрд ис, уый. «Хид у аварион æмæ йæ сæрты цæуын æдас нæу, фæндагæн змæлд дæр уый аххосæй æрурæдтам» – зæгъынц Уæлвæткон уавæрты пресс-службæйы.
Ацыдыстæм бынатмæ. Нæхи цæстæй федтам Леуахийы сæрыл æвæрд хид. Æцæгдæр йе ‘мбисмæ æввахс бетонон конструкцитæ кæрæдзийæ ахицæн сты. Хиды бынмæ куы бакæсай, уæд бæлвырд зыны, хиды уадздзæг куыд фæцудыдта æмæ иуварс куыд азылын ис. Табу Хуыцауæн, цæрджытæй хъыгдардбаййафæг ничи нæ разынд, фæлæ хиды сæрты цæуын тæссаг кæй у, уый гуырысхойаг нæу.
Хъуыддаг цæй аххосæй æрцыд, зæгъгæ, куы бафарстам, уæд нын ахæм дзуапп радта «КомАвтодор»-ы сæргълæууæг Гæбæраты Алан: «Экспертон иртæстытæ саразын хъæуы. Нæхимæ ахæм специалисттæ нæй, бахъæудзæн сæ Цæгат Ирыстон-Аланийæ æрхонын. Уый фæстæ аскъуыддзаг кæндзыстæм дарддæры пълæнттæ. Ныр та хъуамæ цæрджытæ æмбарой, хидыл цæуын æдас кæй нæу, ома, фистæгæй цæуджытæн дæр тæссаг у. Уый тыххæй фæндагон инспектортæ сæвæрдтой нысæнттæ», – зæгъы Гæбæраты лæппу.
Ныртæккæ «Хурзæрин»-ы микрорайонмæ транспорт цæуы Присы хъæуыл, иуварс цæуæг фæндагыл.
Р.S. Цалынмæ эксперттæ хатдзæгтæ саразой, уæдмæ аххосæгтыл дзурын раджы у. Фæлæ ацæргæ адæм куыд зæгъынц, афтæмæй фæстаг дыууæ къуырийы цы къæвдатæ уарыд, уыдоны фæстиуæгæн дон тынг раивылд. Æмæ, дам, уый тыххæй хиды быцæу дзæвгар рæстæг хъыгдард æвзæрста æмæ уымæн фезмæлыд йæ бынатæй. Микрорайоны цæрджытæй чидæртæ хиды фехæлд сæ фарсмæ уæвæг æфсæддон полигонимæ бæттынц – уырдæм, дам, уæззау æфсæддон техникæ арæх кæй цыд, уый нæ бафæрæзта хиды конструкци…
Нæ уац.
Ацы æрмæджытæ дæр бакæс:
Елдзарты Константин: «Рагзаманты арæзтæдты æнгæс у ацы проект æмæ органикон æгъдауæй микрорайоны йæ бынат ссардта»
ЙÆ ХЪУЫДДАГ ХУЫЗДÆР ЧИ ЗОНЫ, АХÆМ СПЕЦИАЛИСТТÆЙ ПАЙДА КÆНЫН ХЪÆУЫ
Цытджын æмбырд бæрæгбоны цытæн
ТАДТАТЫ Алан: «Махмæ ис æппæт фæрæзтæ æмæ тыхтæ дæр…»
Сæйраг у цæрджыты хæрзиуæгæн кусын
