Æрæджы, Налцыччы уагъд æрцыд æстæм æхсæнадæмон конкурс «Евразийы курдиæттæ – 2024 аз». Конкурсы хайад райстой хуыздæр хореографион коллективтæ, вокалон зарæггæнджытæ, адæмон инструментты оркестртæ æмæ хицæн зарæггæнджытæ, кæцытæ уыдысты УФ-йы республикæтæ, æввахс æмæ дард фæсарæнтæй.
Конкурсы хайад райста хуссарирыстойнаг хореографион ансамбль «Скиф» дæр, кæцы архайы нæ горæты Колыты Аксойы номыл аивæдты лицейы. Æрыгон артисттæ сæххæст кодтой дыууæ кафты «Хæххон кафт» æмæ «Хонгæ» æмæ бацахстой дыккаг бынат.
Сценæмæкæсджытæн йæ арæхстдзинад равдыста æвзонг музыкант Мамиты Марик дæр. Уый фæндырыл аив сæххæст кодта композици «Хонгæ» æмæ ссис «инструменталон аивæдты» номинацийы уæлахиздзау.
Ацы конкурс ссис традицион æмæ дзы æрвылаз дæр хайад райсынц аивады хуыздæр архайджытæ. Конкурсы фæлгæтты йæ хайадисджытæн уагъд æрцыдысты мастер- къластæ, хæлардзинады изæртæ æмæ базонгæ сты горæты æмæ республикæйы фенддагдæр бынттимæ.
Банысан кæнын хъæуы уый æмæ ахæм мадзæлттæ кæй ахъаз кæнынц хицæн нациты æвзонг минæвæртты æрбангом кæнынæн æмæ кæрæдзийы культурæ æмæ тардицитимæ лæмбынæгдæр базонгæ уæвынæн.
