Хуссар Ирыстоны паддзахадон телеуынынады фæлгæтты райдыдта сывæллæтты зарæджы конкурс «Зарæг». Конкурсы проекты организатортæ сты РХИ-йы Культурæйы министры хæдивæг Мамиты Григори æмæ журналист Бестауты Юля.
Конкурсы сæйраг нысан у рæзгæ фæлтæры зарæджы аивадон зонæнтæ сбæлвырд кæнын, сæхи уæрæхмасштабон сценæйыл куыд феной, æмæ банкъарой сæ арæхстдзинад. Мамиты Григори куыд радзырдта, афтæмæй проекты фæлгæтты зарджытæ æххæстгонд цæудзысты æрмæстдæр ирон æвзагыл. «Проект арæзт у нæ республикæйы Культурæйы ми-нистрады хæслæвæрдмæ гæсгæ, телеуынынады къухдариуæгадимæ æмгуыстгæнгæйæ. Ис нын æппæт уавæртæ дæр, цæмæй нæ проекты фæлгæтты сбæлвырд кæнæм рæзгæ фæлтæры курдиат æмæ сын йæ рапарахат кæнынæн радтын уавæртæ. Хайадисджытæн сæ бон у азарын эстрадон, адæмон, героикон æмæ æндæр жанрты зарджытæ, фылдæр ирон æввзагыл», — загъта Григори.
Ныридæгæн уал уагъд æрцыдысты æвзарæнты фыццаг æмæ дыккаг хай. Уым хайад райстой 130 конкурсанты бæрц. Уыдонæй проекты баззайдзæнис æрмæстдæр 30 хайадисæджы.
«Хайадисджытæ проекты кастинг рацæуынмæ бацæттæ кæнынц æмæ азарынц сæхи фæндонмæ гæсгæ зарджытæ. Фæлæ хауæнты фæстæ уыдон хъуамæ азарой проекты хæслæвæрдмæ гæсгæ зарджытæ, ома, æнæ развæлгъауæй бацæттæгонд зарæг. Уæд бæлвырддæрæй уыдзæн сæ арæхстдзинад рахатæн», — загътой проектаразджытæ.
Конкурсы жюрийы уæнгтæй нысан æрцыдысты зындгонд зарæггæнджытæ æмæ музыкалон аивадамонджытæ Харебаты Вадим, Гæджиты Жаннæ æмæ Гатыгкоты Миленæ. Сæ разылæууæг сæйраг хæс у хайадисджыты курдиат раст сбæлвырд кæнын æмæ уый фæстæ, конкурсы кæрон, уæлахиздзаутæ бæлвырд æрцæудзысты æргом хъæлæсæппæрсты руаджы комкоммæ эфиры.
Проекты хайадисджыты ныййарджытæ райгонд сты проекты куыстæй. Тыджыты Мадинæ куыд зæгъы, афтæмæй рæзгæ фæлтæры æнæмæнгæй хъæуы ахæм проектты сæ арæхстдзинад равдисын.
«Махмæ ис тынг бирæ курдиатджын сабитæ, куыд аивады, афтæ алы æмæ алы къабæзты дæр. Уыдон цæмæй сæхиуыл æууæндой æмæ фидар къахдзæфтæй хизой сæ курдиат парахт кæнынмæ, уый тыххæй сæ æнæмæнгæй фæхъæуы уавæртæ. „Зарæг“- ы проект та, сæйраджыдæр, у ахæм æнæмæнгхъæугæ проект», — зæгъы Мадинæ.
ХУЫГАТЫ Миленæ
Comments are closed, but trackbacks and pingbacks are open.