Ногазон бæрæгбонты рæстæджы æхсæнадон фæтк æмæ æмбæстæгты æдасдзинад хъахъхъæнын куыд организаци æрцыд, ууыл æруынаффæ кодтой Хуссар Ирыстоны Мидхъуыддæгты министрады барадхъахъхъæнæг ведомствоты службæты æмæ управлениты оперативон æмбырды.
Мидхъуыддæгты министрады пресс-службæ куыд хъусын кæны, афтæмæй, Мидхъуыддæгты министрады сæргълæууæг Гуыцмæзты Аланæн радзырдтой, ногазон бæрæгбонты рæстæджы серьезон бархалынæдтæ кæй не ‘рцыд.
«Мидхъуыддæгты министр æхсæнадон æдасдзинады милицийы куысты сбæрæг кодта иуæй-иу цухдзинæдтæ мадзæлттæуадзæн бынæтты. Загъта, зæгъгæ, æххæст гуырахстæй контроль цы территоритыл цыд, уым хъæугæ фæтк нæ уыд. Уый зæрдыл æрлæууын кодта, зæгъгæ, æхгæд цы бынæттæ æрцыдысты, уырдæм æндæр адæмы ма хъуамæ уадзой, кæцытæ хъыг дарынц барадхъахъхъæнджыты куыст», – дзырдæуы пресс-службæйы.
Мидхъуыддæгты министр ма æмбырды хайадисджыты хъусдард аздæхта службæйон дисциплинæ æххæст кæныны фарстатæм. Уый бафæдзæхста, дисциплинæ чи фехала, уый кæй баййафдзæн дисциплинарон æфхæрд.
