Галаты Барисы номыл кафт æмæ зарды паддзахадон ансамбль «Симд» 2024-æм азæй суыдзæнис æппæтуæрæсейаг проект «Мы – Россия»-йы æрвылазон хайадисæг. Уый тыххæй хъусын кæны Республикæ Хуссар Ирыстоны Культурæйы министрады пресс-службæ.
«Ацы хъуыддаджы тыххæй бадзырдтой нæ республикæйы Культурæйы министр Зæгъойты Рада æмæ Уæрæсейы Федерацийы Культурæйы министры хæдивæг Андрей Малышев сæ фембæлды рæстæджы», – банысан кодтой пресс-службæйы.
Культурон программæ «Мы – Россия» реализаци цæуы Федералон паддзахадон бюджетон культурон уагдон «Росконцерт»-ы руаджы æмæ Уæрæсейы Федерацийы Культурæйы министрады æппæтуæрæсейаг гастролон-концертон планмæ гæсгæ.
«Ацы культурон программæйы мах хайад кæй исдзыстæм, уый нæ ансамблæн гом кæны ног перспективæтæ, уый руаджы сфæлдыстадон коллектив арæхдæр цæудзысты гастролон балцты Уæрæсейы Федерацийы æппæт регионтæм», – банысан кодтой пресс-службæйы.
Нæ уацх.
