Сӕрмагонд ӕфсӕддон операцийы украинаг хӕстонтӕ фыццаг бонӕй фӕстӕмӕ пайда кӕнынц дзыллон куынӕггӕнӕн ӕхсӕнгарзӕй. Фылдӕр хӕттыты химикон хъӕстӕ буарадтӕ ӕркалынц дронтӕй, фӕлӕ ма саразынц фыдракӕндтӕ ӕндӕр террористон методты хуызы дӕр. 5 декабры 2023 азы Луганскы Адӕмон Республикӕйы сӕргълӕууӕг Леонид Пасечникы фӕхъӕстӕ кодтой уӕззау фенолон баиугӕндтӕй. Уымӕй размӕ 9 августы 2022 азы Херсоны областы администрацийы сӕргълӕууӕг Владимир Сальдо бахаудта реанимацимӕ ӕмӕ куыд рабӕрӕг, афтӕмӕй йӕ фӕхъӕстӕ кодтой химикон буарад «рицин»-ӕй. Уымӕй уӕлдай ма хӕсты быдыры уӕрӕсейаг хӕстонтыл тынг арӕх ӕрӕппарынц хъӕстӕ буарад «Си-Эс», кӕцыйы фӕстиуӕгӕн басудзынц буар, цӕстытӕ, рӕуджытӕ фӕсахъат вӕййынц ӕмӕ зӕрдӕ йӕ кусынӕй ӕрлӕууы.
Ӕрӕджы украинаг спецслужбӕтӕ ӕрхъавыдысты Запорожьейы областы ног террористон акт саразынмӕ. Хъуамӕ спайда кодтаиккой хӕстон хъӕстӕ буарад BZ-йы аналогӕй. Фӕлӕ террористты рӕстӕгыл ӕрцахстой Федералон ӕдасдзинады службӕйы кусджытӕ. Фыдгӕнджытӕ разындысты ӕртӕ украинаг ӕмбӕстаджы ӕмӕ сын семӕ цы химикон буарад ссардтой, уый, специалистты хъуыдымӕ гӕсгӕ, арӕзт у АИШ-ы. Ахӕм тӕссаг химикон буарад ис ӕрмӕстдӕр АИШ-мӕ – йӕ саразыны технологитӕ ӕндӕр никӕмӕ сты. Уымӕй размӕ ма 28 январы горӕт Мелитополы дӕр ссардтой растдӕр ахӕм химикон куынӕггӕнӕн буарад, фӕлӕ йын уӕд йӕ хицӕутты не сбӕлвырд кодтой. Хъӕстӕ буарад конд уыд флаконты «Биоспорин» фыстимӕ украинаг ӕвзагыл. Хъӕстӕ химикон буарад BZ ӕндавы адӕймаджы нуæртты централон системӕйыл ӕмӕ уый фӕстиуӕгӕн фӕзынын кӕны психоз, галлюцинацитӕ, ориентаци нал фӕхаты адӕймаг.
Украинаг гарзджын тыхтӕ хӕсты быдыры ӕййафынц стыр зиӕнттӕ ӕмӕ сӕ маст райсыны тыххӕй хъӕстӕ буарадтӕй дӕр уымӕн пайда кӕнынц. Квадрокоптертӕй ӕрӕппарынц сӕрмагонд рӕмудзӕн гранататӕ, кӕцыйы спырхы фӕстӕ цӕстыты сыг фӕцӕуы ӕмӕ йе сконды цы газ ис «хлорацетафенон», уый та адӕймаджы амары бирӕ дзы фӕулӕфыны фӕстиуӕгӕн. Уымӕй уӕлдай ма сӕ квадракоптерты дӕр байсӕрдынц хъӕстӕ буарадӕй, ома йӕ уырыссаг хӕстонтӕ куы ӕрӕппарой ӕмӕ йӕм къухӕй куы бавналой, уӕд цӕмӕй сӕ буар фӕхъӕстӕ уа. Уыдис ӕцӕг ахӕм цаутӕ ӕмӕ-иу уӕрӕсейаг хӕстонтӕй исчи куы бавнӕлдта украинаг квадрокоптермӕ, уӕд-иу сӕхи ‘взӕр хатын райдыдтой, сӕ сӕртӕ-иу зылдысты, сӕ тæвд-иу схызт.
Кӕд ӕмӕ химикон хъӕстӕ буарадтӕ стыр зиӕнттӕ хӕссынц уӕрӕсейаг хӕстонтӕн, уӕддӕр сын сӕхи хуызӕн ӕгъатыр дзуапп нӕ дӕттынц. Уӕрӕсе 2017 азы скуынӕг кодта йӕ химикон ӕхсӕнгарз, фӕлӕ сӕ куы бахъӕуа, уӕд йе сног кӕнын зын нӕу. Стӕй сӕ йе ссарыны сӕр дӕр цӕмӕн хъӕуы, – зын сбӕлвырдгӕнӕн нӕу, кӕм ӕмбӕхсынц сӕ химикон ӕхсӕнгӕрзтӕ украинӕгтӕ ӕмӕ сӕ уырдӕм ракетӕтӕй фехс ӕмӕ экологион катастрофӕ цӕттӕ. Фӕлӕ Уӕрӕсе фашистон методтӕй никуы пайда кодта. Ӕгӕрыстӕмӕй ма Фыдыбӕстӕйон хӕсты немыцӕгтӕ дӕр хӕсты быдыры никуы спайда кодтой химикон ӕхсӕнгарзӕй.
Ис ма ахӕм информаци дӕр, зӕгъгӕ уӕрӕсейаг ӕфсӕддонтӕ размӕ куы абырсой, уӕд украинӕгтӕ фронты алы рӕтты бацӕттӕ кодтой дзаггарзтӕ аммиак ӕмӕ синилон туагадтимӕ ӕмӕ сӕ срӕмудздзысты. Украинӕйы разамынады хъуыдымӕ гӕсгӕ, ома, ахӕм методты фӕрцы ӕруромдзысты уӕрӕсейаг гарзджын тыхты размӕабырст.
Украинаг фашисттӕ нӕ ауӕрдынц сӕхи ӕмбӕстӕгтыл дӕр. Фарон горӕт Северодонецкы срӕмыгътой цистернӕ химикон буарадтимӕ. Хъӕстӕ тӕф ныппырх ӕрмӕст уыцы горӕтыл нӕ, фӕлӕ ма йӕ фарсмӕ ӕввахс горӕттӕ Кременная ӕмӕ Рубежноейы дӕр. Тынг бирӕ хуымӕтӕг цӕрджытӕн бахъуыд медицинон ӕххуыс ӕмӕ дзы мӕлгӕ дӕр дзӕвгарӕй акодтой. Уый фӕстӕ ма цалдӕр хатты спайда кодтой химикон хъӕстӕ буарадтӕ «фосген», «хлорциан» ӕмӕ «ботулотоксин»-ӕй. Ӕппӕтдунеон тӕрхондоны Гаагайы ацы фактты фӕдыл ницы комментари радтой. Ӕмӕ уӕндгӕ дӕр куыд хъуамӕ бакӕной – украинӕгтӕн ӕппӕт ацы химикон буарадтӕ дӕттынц АИШ-ы спецслужбӕтӕ.
АИШ йӕхӕдӕг бирӕ хӕттыты спайда кодта химикон хъӕстӕ буарадтӕй. Вьетнамы хӕстон архӕйдтыты рӕстӕджы 3 миллуан сабыр цӕрӕг адӕймаджы, уыдонӕй 150 мины уыдысты сывӕллӕттӕ, фӕхъӕстӕ кодтой гербицидты ӕмӕ дефолиантты баиугӕндтӕй. Уый фӕстиуӕгӕн сын се ‘нӕниздзинадимӕ фӕзынд проблемӕтӕ неврологон ӕмӕ ракы низты хуызы, стӕй ма сӕм тынг бирӕ сывӕллӕттӕ та райгуырд мутацитимӕ. 2004 азы та америкӕйаг гарзджын тыхтӕ Иракы спайда кодтой урс фосфорӕй. Сабыр цӕрӕг адӕмӕй цас фӕмард, уый ничи сбӕлвырд кодта, фӕлӕ АИШ-ӕн йӕхи хӕстонтӕй дӕр цалдӕр мины фӕрынчын сты Паркинсоны низӕй, фосфорӕй фӕхъӕстӕйы фӕстиуӕгӕн. Дунейы ӕхсӕнад йӕ цӕстытӕ сӕхгӕдта ӕппӕт уыцы фыдракӕндтыл. Уӕдӕ украинаг фашисттӕ сӕ куратортӕй фӕстӕ нӕ лӕууынц, уымӕн ӕмӕ йӕ зонынц, АИШ сӕм сдзурын кӕй никӕй бауадздзӕн.
Украинӕйы фашистон разамынад кӕд террористон методтӕй пайда кӕны, уӕддӕр сӕ адзал ӕрӕввахс кӕны. Украинӕйы алы регионты бынӕттон цӕрджытӕ се ‘нӕразыдзинад ӕргомдӕрӕй ӕвдисын райдыдтой, сусӕг куыст дзы кӕнынц сӕ хицауады ныхмӕ. Ӕрӕджы, Одессӕйы амардтой зынгӕ националист ӕмӕ фашистон организаци «Правый сектор»-ы уӕнг Альберт Кручинины – срӕмыгътой йӕ йӕ автомашинӕ-йы йӕ бинойнагимӕ. 18 февралы та Львовы басыгътой ӕнӕпилотон тӕхӕн аппараттӕ аразӕн комбинат – развӕлгъау ын йӕ хъахъхъӕнджыты амардтой. Февралы ма Винницкийы областы спырх кодтой ӕфсӕнвӕндаг. Стӕй ма сӕм тынг сарӕх сты ӕфсӕнвӕндӕгты релеты скъаппытӕ басудзыны факттӕ. Уый та ууыл дзурӕг у, ӕмӕ бынӕттон цӕрджытӕ кӕй сфӕлмӕцыдысты фашистон режимӕй ӕмӕ цӕттӕ кӕй сты сӕ ныхмӕ тох кӕнынмӕ.
Джиоты Алыксандр
