Зæнджиаты Тимур бацахста Санкт-Петербургы Михайловскаг театры сæйраг æрхонгæ дирижеры бынат. Культурæйы уагдоны сайты куыд хъусын кæнынц, афтæмæй «театр æмгуыстад кæнын райдыдта дунейы иууыл ирддæр æвзонгдæр маэстротæй сæ иуимæ». Михайловскаг театры Зæнджиаты Тимуры дебют уыд майы мæйы Джакомо Пуччинийы оперæ «Тоска», æмæ 30 июны та дирижир кодта «Пиковая дама»-йы оперæйæн.
Зæнджиаты Тимур фыццаг хатт дирижеры пульты раз слæууыд авдаздзыдæй, Дзæуджыхъæуы филармонийы симфонион оркестрæн дирижир кæнгæйæ. Абон йæ репертуары ис 40 фылдæр оперон æмæ балетон спектаклы æмæ бирæнымæц симфонион уацмыстæ. Критиктæ нысан кæнынц дирижеры «деликатон манерæйы» тыххæй. Тимур æмгуыстад кæны Уæрæсейы зынгæдæр театртимæ, кæцыты ‘хсæн сты «Стыр театр», Марияйы театр, К.Станиславский æмæ В. Немирович-Данченкойы номыл Мæскуыйы академион музыкалон театр.
Зæнджиаты Тимуры куысты зынгæдæр цауты ‘хсæн сты – «Ла Скала»-йы театры «Пиковая дама»-йы дебют, Уæрæсейы стыр те-атры Н.Римский-Корсаковы оперæ «Садко» æмæ К.Станиславский æмæ В. Немирович-Данченкойы номыл Мæскуыйы академион музыкалон театры И.Стравинскийы «Похождения повесы»-йы æвæрд оперæтæ, афтæ ма Уæрæсейаг национ оркестр, Уæрæсейы национ филармонион оркестр æмæ Е.Светлановы номыл Паддзахадон академион симфонион оркестри-мæ концерттæ. Афтæ ма зындгонд у йе сæвæргæ оперæтæ «Симфония до мажор», «Парижское веселье», «Иоланта», «Кащей бессмертный», «Евгений Онегин» æмæ æндæртæй.
Зæнджиаты Тимур райгуырд 1994 азы 27 январы горæт Мæскуыйы. Æртæаздзыдæй лæппу райдыдта музыкæйæ архайын æмæ цыппар азы фæстæ та фыццаг хатт дирижир кодта Дзæуджыхъæуы филармонийы симфонион оркестрæн. Дирижеры пультмæ кæй не ‘ххæсыд, уымæ гæсгæ-иу ын йæ къæхты бын бавæрдтой бынæвæрæнтæ. 2011 азы бацыд Чайковскийы номыл Мæскуыйы паддзахадон консерваторимæ профессор Геннади Рождественскийы къласмæ. Уæдмæ йын фæлтæрддзинад уыд Марияйы театры симфонион оркестр, Уæрæсейы паддзахадон академион камерон оркестр, «Виртуозы Москвы» æмæ «Новая Россия»-йы оркестртимæ дирижир кæнынæй. Консерваторийы 1-аг курсы студент уæвгæйæ хайад райста дунеон фестивалты. 2017 азы Мæскуыйы паддзахадон консерватори каст фæуыны фæстæ кусын райдыдта Константин Станиславский æмæ Владимир Немирович-Данченкойы номыл Мæскуыйы академион музыкалон театры штатон дирижерæй. Уыцы аз ссис Тольяттийы филармонийы сæйраг æрхонгæ дирижер.
Банысан кæнын хъæуы уый дæр, æмæ Зæнджиаты Тимур кæй у Цæгат Ирыстон-Аланийы сгуыхт артист æмæ дунейы иууыл æвзонгдæр курдиатджындæр дирижертæй иу.
Comments are closed, but trackbacks and pingbacks are open.