РХИ-йы Хæдбардзинады акт райсыны боны цытæн уагъд æрцыд радон турнир. Ныр та ерыстæ уагъд æрцыдысты æппæтстилон каратэйæ. Банысан кæнын хъæуы уый дæр, æмæ спорты ацы хуызæй Хуссар Ирыстоны турнир уагъд кæй æрцыд фыццаг хатт. Сæйраг тæрхонгæнæг Хъуылымбегты Мамеды ныхæстæм гæсгæ спорты ацы хуыз тынг цæуы куыд æмбуархæстæй архайæг спортсменты, афтæ ма спортуарзджыты зæрдæмæ дæр. Уымæн æмæ, зæгъгæ, у æмхæццæ æмбуархæсты хуызæн.
Ерысты хайад райстой 100 спортсмены бæрц. Уыдоны ‘хсæн уыдысты Цæгат Ирыстон-Аланийы командæ дæр. Æфсымæрон республикæйы спортивон делегацийы сæргъ лæууыд Цæгат Ирыстон-Аланийы æмбырдгонд командæйы сæйраг тренер Таймæзты Игорь. Специалистты ныхæстæм гæсгæ ацы ерысты фæстиуджытæм гæсгæ иууыл хуыздæр спортсментæ Ирыстоны спортивон кад хъахъхъæндзысты уæрæсейаг алыгъуызон ерысты.
Турнир официалонæй байгом кæныны церемонийы спортсментæн раарфæ кодтой Фæсивæдон политикæ æмæ спорты фæдыл комитеты сæрдар Хубежты Руслан æмæ йæ хæдивæг Гасситы Сослан.
Нæ республикæйы майы мæй хъæздыг уыд алыгъуызон спортивон мадзæлттæй. Спортсментæ ма нысан кодтой Стыр Фыдыбæстæйон хæсты уæлахизы бæрæгбон дæр. Æдæппæтæй майы уагъд æрцыд 15 спортивон мадзалæй фылдæр.
Хуссар Ирыстоны Хæдбардзинады Акт райсыны боны цытæн ерыстæ уагъд цæуынц дыккаг аз. Уый размæ ма ерыстæ уагъд æрцыдысты уæгъдибар хъæбысхæст, волейбол, бокс, армрестлинг, аивадон гимнастикæ, шахматтæ æмæ футболæй. Цæрджытæ æмæ республикæйы уазджытæм уæлдай цымыдисдзинад сæвзæрын кодтой бæгъты дугътæ. Йæ уæлахиздзаутæ æмæ призертæ Президент Гаглойты Аланы номæй хорзæхджын æрцыдсты æхцайы призтæй.
ХУРИТЫ Батрадз
