Знауыры районы цæрæнуатон-коммуналон хæдзарады кусджытæ схæрзарæзт кодтой Метъехы хъæумæ фæндаг, кæцы 20 азæй фылдæр цалцæг не ‘рцыд, – фехъусын кодтой районы администрацийы пресс-службæйы.
Ам куыд банысан кодтой, афтæмæй фæндаджы арæзтад ис фæуыны стадийыл.
«20 азæй фылдæр ацы хъæумæ фæндаг цалцæг нæ уыд æмæ нал бæззыд. Цæрæнуатон-коммуналон хæдзарады кусджытæ егъау куыст бакодтой, фæндаг сарæзтой æмæ дзы ныртæккæ ацæуæн ис рог машинæйыл дæр», – загътой пресс-службæйы.
Куыд банысан кодтой, афтæмæй Лопаны, Цънелисы, Калеты хъæутæм дæр цалцæг цæуынц фæндæгтæ.
«Фæндæгтыл калынц хуыр æмæ йæ дарддæр лæгъз кæнынц», – загътой пресс-службæйы.
Куыд ма банысан кодтой, афтæмæй районы разамынад пълан кæны 2023 азы мадзæлтты пълан-мæ цы фæндæгтæ хаст æрцыд, уыдон сцалцæг кæнын.
«Президент Гаглойты Алан бахæс кодта Бехъмары хъæуæй Сихиатмæ фæндаг алæгъз кæнын», – банысан кодтой районы администрацийы.