Президент Гаглойты Алан йæхимæ райста Геодези æмæ картографийы Мæскуыйы паддзахадон университеты ректор Надежда Камынинайы. Уый делегацийы сæргълæудæй Цхинвалмæ æрцыд кадастры фадыджы РХИ-йы Юстицийы министрады кусджытæн æнæмæнгхъæуæг ахуырады фадыджы æмгуыстады фæлгæтты.
Фембæлды хайад райстой УФ-йы РХИ-йы Уæлвæткон æмæ æххæстбарджын минæвар Гасситы Знаур, УФ-йы РХИ-йы минæварады уынаффæгæнæг-минæвар Уалыты Зарæ, Геодези æмæ картографийы Мæскуыйы паддзахадон университеты проректортæ Наталья Карлова æмæ Алексей Карпуков.
Ныхасы рæстæджы Президент банысан кодта республикæйы уазджытæ цы куыст кæнынц, уый ахсджиагдзинад, æмæ загъта, зæгъгæ, кадастр æмæ картографийы фадыг, афтæ ма зæххы фæдыл бартæ сты актуалон.
«2023 азы Уæрæсейы Хуссар Ирыстоны минæварад æмæ университеты ‘хсæн æмгуыстады фæдыл сразыдзинадыл къухтæ фыст æрцыд Æхсæнадæмон экономикон форумы фæзуаты. Æмæ ныр нæ бон у фæстиуджытæ уынын нæ Юстицийы министрады кусджыты ахуырад фæбæрзонддæр кæныны фадыджы æмархайды хуызы. Абоны бон республикæйы ацы фадыджы ис цъус квалификациджын специалисттæ, куыст та ис бирæ. Мах цымыдис кæны æмгуыстад æмæ бузныг уыдзыстæм бакæнгæ æххуысæй», – загъта уый.
Йæ рады, Надежда Камынина загъта, зæгъгæ цæттæ сты æмгуыстадмæ æмæ банысан кодта, ацы куыст ахсджиаг кæй у алы паддзахады дæр.
«Мах абон хорз æмбарæм, куыд ахсджиаг у зæххыты хыгъд, арæнтæ сбæрæг кæнын æмæ сæ барыны дырысдзинад. Ныфс нæ ис, æппæт нæ иумæйаг тыхтæ æрмæст геодезион æмæ кадастрон куыстытæм хайбавæрд нæ хæсдзысты, фæлæ зонадон скъола, профессионалон ахуырадæн бындур æрæвæрынмæ дæр», – загъта уый.
Надежда Камынина ныфс бавæрдта бирææмгъуыдон перспективæтæн æмæ бузныг загъта хуссарирыстойнаг паддзахады сæргълæууæгæн йе ‘ууæнкдзинады тыххæй.
Уый Гаглойты Аланы фæхуыдта Геодези æмæ картографийы Мæскуыйы паддзахадон университеты юбилей нысан кæнынмæ. Ууыл ацы аз æххæст кæны 245 аз.
Фембæлды кæрон Президент Надеджда Камынинайы схорзæхджын кодта Хæлардзинады орденæй Республикæ Хуссар Ирыстоны бирæквалификаци-джын кадртæ цæттæ кæныны хъуыддаджы.
«Мæнæн иууыл стырдæр хорзæх у уе ‘ууæнкдзинад. Ныфс мæ ис, фыдæнхъæл уæ кæй нæ фæкæндзыстæм», – загъта Надежда Камынина.