15 апрелы Цхинвалы Юстицийы министрады уыдис тымбыл фынг ахæм темæйыл: «Картографион-геодезион архайды нырыккон тенденцитæ».
Хайад дзы райстой Уæрæсейы Федерацийы Республикæ Хуссар Ирыстоны æххæстбарджын минæвар Гасситы Знауыр, РХИ-йы юстицийы министр Джиоты Алан, РХИ-йы юстицийы министры хæдивæг Цхуырбаты Нинæ, Республикæ Хуссар Ирыстоны Юстицийы министрады Паддзахадон регистраци, кадастр æмæ картографийы службæйы къухдариуæггæнæг Коцты Аленæ; Республикæ Хуссар Ирыстоны Паддзахадон регистраци, кадастр æмæ картографийы службæйы разамонæджы хæдивæг Дзуццаты Ритæ; РХИ-йы Юстицийы минристрады Паддзахадон регистраци, кадастр æмæ картографийы Дзауы районы хайады сæргълæууæг Плиты Игорь.
Мадзалы уыдысты уæрæсейаг уазджытæ – Мæскуыйы Геодези æмæ картографийы паддзахадон университеты ректор, экономикон зонæдты доктор Камынина Надежда; Мæскуыйы Геодези æмæ картографийы паддзахадон университеты зæххы æмæ паддзахадон исады регистрацийы кафедрæйы сæргълæууæг, профессор Злотникова Тамара; Мæскуыйы Геодези æмæ картографийы паддзахадон университеты проректор, юридикон зонæдты кандидат Карлова Наталья; Мæскуыйы Геодези æмæ картографийы паддзахадон университеты проректор Карпуков Алексей; Мæскуыйы Геодези æмæ картографийы паддзахадон университеты территориты управленийы факультеты деканы хæдивæг Машкова Татьяна.
Джиоты Алан уазджытæн раарфæ кодта, РХИ-йы Юстицийы министрадмæ æдзух сæ хъус кæй дарынц, нæ студенттæ сæ университетты кæй ахуыр кæнынц, юстицийы кусджытæ сæ квалификаци кæй бæрзонд кæнынц, уый тыххæй. Банысан кодта, зæгъгæ, уыцы æххуысæн ныридæгæн ис фæстиуæг.
«Сымах руаджы нæ службæ йæ къахыл фидарæй лæууы. Уый æвдисæн у, нæ ахастытæ кæй хуыздæр æмæ фидардæр кæнынц, уымæн. Абоны тымбыл фынг дæр нæ службæйы рæзты фарстыты тыххæй у. Мах тынг хъæуы уе ‘ххуыс, уый у конкретон, конструктивон, эффективон æмæ тынг ахъаз у нæ службæйы размæцыдæн», – загъта Джиоты Алан æмæ бахахх кодта, зæгъгæ, нæ æмахастытæн хорз фидæн уыдзæн.
Мæскуыйы Геодези æмæ картографийы паддзахадон университеты ректор Надежда Камынинайы хъуыдымæ гæсгæ, дыууæфарсон æхсæнведомствойон ахастытæн ног импульс радтын хъæуы.
«Бузныг уæ дæн, куыд стыр Реестры командæйы уæнг, афтæ Росреестр æмæ Республикæ Хуссар Ирыстоны ‘хсæн æмахастыты «фæндагон картæ» кæй хонынц, уый реализацийы фæлгæтты Хуссар Ирыстоны реестрæн методикон æххуыс бакæныны хъуыддаджы нæ университеты инициативæйы æвварс кæй хæцут, уый тыххæй. Уырны нæ, тагъд рæстæджы нæ къухы бафтдзæн импульс радтын æмæ нысанмæздæхтæй среализаци кæнын республикæйы территорийыл æндидзынады æмæ хызæг саразыны проект, уыцы нымæцы республикæйы зæххыты эффективон æрзылдæн чи фæахъаз уа, хъæуæг инфраструктурæйы æппæт бæрæггæнæнты уыцы проект дæр. Уый та, йæ рады, фæахъаз уыдзæн Хуссар Ирыстоны экономикон рæзтæн.
Мах баныхас кодтам Гасситы Знауыримæ, кæй адарддæр кæндзыстæм кадрты ахуыр кæнын æмæ сын сæ квалификаци бæрзонд кæнын. Ныртæккæ Фæсарæйнаг хъуыддæгты министрады æххуысæй цæттæ стæм магистрон цæттæдзинады квотатæ æххæст кæнынмæ», – банысан кодта Надежда Камынина.
Хуссар Ирыстоны Юстицийы министрады Паддзахадон регистраци, кадастр æмæ картографийы службæйы разамонæг Коцты Аленæ банысан кодта, зæгъгæ, ныртæккæ сæ кусджыты иу хай сæ квалификаци бæрзонд кæнынц Мæскуыйы Геодези æмæ картографийы паддзахадон университеты. Ныридæгæн уал цалдæр адæймаджы рацыдысты цæттæгæнæн курсытæ.
«Уый тыххæй мæ стыр бузныг зæгъын фæнды Мæскуыйы Геодези æмæ картографийы паддзахадон университеты ректорат æмæ ахуыргæнджыты коллективæн се ‘ххуысы æмæ бæрзонд профессионализмы тыххæй», – загъта Коцты Аленæ æмæ цыбыр экскурс сарæзта Республикæ Хуссар Ирыстоны Паддзахадон регистраци, кадастр æмæ картографийы службæйы сырæзт æмæ куыстæн.
Тымбыл фынджы рæстæджы уазджытæ скодтой докладтæ: «Деятельность Югосреестра в сфере кадастрового учета и регенерации прав на земельные участки» æмæ «Особенности законодательного регулирования геодезии, картографии и пространственных данных в России на современном этапе».
ОСИАТЫ Индира
