Æрæджы Паддзахадон унитарон куыстуат «Арæзтадон æрмæджыты завод» бацыд Автомобилон фæндæгты арæзтад æмæ эксплуатацийы фæдыл комитеты дæлбармæ. Банысангонд комитеты сæрдар Елдзарты Константин бабæрæг кодта «Арæзтадон æрмæджыты завод» æмæ бынаты базонгæ куыстуаты уавæримæ. Уый куыд зæгъы, афтæмæй завод æнæкъуылымпыйæ куы куса, уæд гаранти уыдзæн рæстæгыл арæзтадон объектты куыстытæ фæуынæн.
Заводы сæргълæууæг Дзуццаты Андрей куыд загъта, афтæмæй ныртæккæ заводæн ис æвæрццаг динамикæ. Цы 35 адæймаджы дзы кусы, уыдон æмбарынц, сæ куысты гъæдыл баст кæй у заводы дарддæры æнтыст. Гъæдджын куыст кæныны тыххæй та ис æппæт фадæттæ дæр.
«Нæ арæзтадон æрмæджытæй пайда кæнынц, куыд адæм, афтæ арæзтадон организацитæ дæр, кæцытæ ифтонг кæнынц уынгты арæзтад Инвестпрограммæйы фæлгæтты. Цы продукци уадзæм, уыдон аразынæн раздæр æрмæг ласын хъуыд Цæгат Ирыстонæй. Ныр заводы территорийыл ис дурцъæлгæнæн комплекс æмæ нæ куыст бирæ фæрогдæр. Цы арæзтадон æрмæджытæ уадзæм, уыдон дзуапп дæттынц ГОСТ-ы нормæтæн», – загъта Дзуццайы фырт.
Фидæны плæнттыл дзургæйæ, заводы къухдариуæггæнæг банысан кодта, зæгъгæ, сæйрагдæр хæстæ сты арæзтады гуырахсттæ фæбæрзонддæр кæнын, стабилон æфтиагджын куыстмæ рахизын, куыстуаты цы кусджытæ кусы, уыдонæн рæстæгыл куыстмызд фидын.
Директор ма куыд банысан кодта, афтæмæй цы заказтæ райсынц, уыдон рæстæгыл æххæст æрцæуынц.
УАЗÆГТЫ Марфа
Comments are closed, but trackbacks and pingbacks are open.