Цхинвалы горæтон тæрхондоны дарддæр тæрхон цæуы Дзабиты Иналы хъуыддаджы фæдыл. Адвокатты куырдиатмæ гæсгæ, тæрхонгæнæг Кокойты Оксанæ уголовон хъуыддагæй аиуварс кодта Зæгъойты Заринæйы арæзт тæрхондонон экспертизæты.
Фæмардуæвæг Дзабиты Иналы æмæ æфхæрд баййафæг Цхуырбаты Никъалайы тыххæй тæрхондонон-медицинон эксперты скъуыддзаггæнæн тæрхонгæнæг Кокойты Оксанæ растыл нæ банымадта æмæ йæ бæлвырдгæнæнты номхыгъдæй систа. Уый тыххæй цы уынаффæ рахаста, уымæн нæй фæивæн.
Зæгъойты Заринæ æфхæрдбаййафæг Хъуылымбегты Герсаны тыххæй цы экспертизæ сарæзта, ууыл уынаффæ кæндзысты тæрхондоны радон рабадты, уый фæстæ адвокат куырдиат бахæсдзæн уголовон хъуыддагæй йæ сисыны тыххæй.
Тæрхонгæнæг фæндон бахаста, ацы хъуыддаджы фæдыл фыст цы бæлвырдгæнæнтæ сты, уыдон ногæй раиртасыны тыххæй. Иртæст æрцыд, æфхæрд баййафджытæ кæм уыдысты æмæ фыдракæнд кæм æрцыд, уыцы бынаты – Паддзахадон æдасдзинады комитеты бæстыхайы басгæрсты суагъæ.
Адвокаттæ хъусдард аздæхтой уымæ, зæгъгæ, басгæрсты рæстæджы кæй аххосджын кæнынц, уыдонмæ ахасты ницахæм биологон фæдтæ сбæрæг чындæуыд, зæгъгæ, уымæ. Афтæ ма не сбæрæг, Цхуырбаты Никъала кæцы камерæйы уыд, уый дæр. Æппæт уыдæттæ дзурæг сты, ацы суагъæ бæлвырдгæнæн кæй нæу, ууыл.
Раиртæст æрцыд, Дзабиты Иналы 10 мин сомæй фæивар кæныны тыххæй Цхинвалы горæтон тæрхондоны 2020 азы 25 августы уагæвæрд.
Банысан æрцыд, зæгъгæ, милиийы кусджыты куырдиатмæ гæсгæ, 2020 азы 24 августы Дзабиты Инал наркотикон буарадæй спайда кодта æви нæ, уый хъуамæ сбæрæг кодтаиккой, фæлæ Инал ууыл не сразы ис. Цæй тыххæй не сразы, уый аххосаг та нæ бамбарын кодта.
Куыд бамбарын кодтой, афтæмæй Иналы уыцы архайдæн радтой наркотикон æмæ психотропон буарадтæй æнæ закъонæй пайда кæныны квалификаци.
2020 азы 24 августы Дзабиты Инал басаст, зæгъгæ, йæ кæй нæ фæндыд, æмæ уый тыххæй не сразы ис наркотикон буарадтæй спайда кодта æви нæ, уый тыххæй анализ аразыныл.
Азымджынтæ тæрхонгæнæджы хъусдард аздæхтой, зæгъгæ, уыдонмæ ницы бар дары уæлдæр банысангонд уагæвæрд.
Нæ уацх.
