Цхинвалы тæрхондоны дарддæр цæуы Дзабиты Иналы амæлæты хъуыддаджы фæдыл рабадт.
Резонансон уголовон хъуыддаг æвзарыны рæстæджы ауагъдæуыд æвдисæнты – Генералон прокуратурæйы фæдагурæг Тъехты Олег æмæ Мидхъуыддæгты горæтон управленийы кусæг Мæргъиты Уырызмæджы дзуарæвæрд (перекрестный допрос) бафарст, ацы дыууæ адæймаджы раздæры æвдисæн ныхæстæ кæрæдзийыл кæй нæ бадтысты, уый тыххæй.
Тъехты Олег 2020 азы уыд мидхъуыддæгты горæтон управлений хистæр, Мæргъиты Уырызмæг та разамынд кодта, мидхъуыддæгты эксминистр Наниты Игоры амарынмæ бахъавды тыххæй цы фæдагурæн къорд сарæзтой, уымæн.
Мæргъиты Уырызмæг дзырдта, зæгъгæ, йын радгæс куыд загъта, афтæмæй æрфарсты нысанæн Тъехты Олег Дзабиты Инал æмæ Цхуырбаты Никъаламæ бахызт 27 августы изæры аст сахатыл æмæ рахызт фæсæмбисæхсæв. Олег та банысан кодта, зæгъгæ, Инал æмæ Никъалаимæ 20 минуты йедтæмæ нæ баззад. «Йе сбæрæг кæнын проблемон нæу, фенæн ын ис видеокамерæтæм бакæсгæйæ».
Æмхуызон нæ уыдысты 28 августы ахæстты Мидхъуыддæгты министрады горæтон управленийы бæстыхайæ Криминалон милицæмæ бакæныны тыххæй æвдисæнты ныхæстæ дæр. Уырызмæджы ныхæстæм гæсгæ, Иналы Криминалон милицимæ Оледжы ба-хæсмæ гæсгæ акодтой. Фæлæ Олег ууыл не сразы.
Дзуарæвæрд бафарсты фæстæ тæрхонгæнæг байхъуыста СОБР-ы кусджытæй цыппар æвдисæнмæ – Тыджыты Дзамболат, Пухаты Ибрагим, Дзæгъиаты Филипп æмæ Медойты Давидмæ. Уыдон иууылдæр хайад истой Дзабиты Иналы, Цхуырбаты Никъала æмæ Хъуылымбегты Герсаны æрцахсыны хъуыддаджы.
Æвдисæнтæ банысан кодтой, зæгъгæ, сæ 2020 азы 23 августы æрæмбырд кодтой æмæ сæ къордтыл адих кæныны фæстæ арвыстой уæлдæр банысангонд æмбæстæгты ахсынмæ. Æвдисæнтæ сæ раздæры æвдисæн дзырдты ногæй бафидар кодтой.
Раздæры тæрхондоны рабадтыты рæстæджы тæрхонгæнæг Кокойты Оксанæ бахатыд прокурормæ, цæмæй тæрхондонмæ æрбавдиса, медицинон эксперт Зæгъойты Залинæйы квалификаци сбæрæг кæныны тыххæй Фæцыбыргонд бæрндзинадимæ æхсæнад «Хорс-групп» – мæ ахасты «Рособрнадзор»-ы дзуапп.
Тæрхонгæнæг куыд банысан кодта, афтæмæй Генпрокуратурæйæ райстой «Хорс-групп»-æй цы æрмæджытæ куырдтой, уыдон. Куыд рабæрæг, афтæмæй уыцы æрмæджытæ Генпрокуратурæмæ «Рособрнадзор» æрæрвыста, цалынмæ йæм тæрхондон куырдиат нæ арвыста, уæдмæ, фæлæ… Хъыгагæн уыцы документты Генпрокуратурæ нæ равдыста.
«Генпрокуратурæйæ цы æрмæджытæ райстам, уыдон бæлвырд кæнынц ахæстты ныхæстæ, уыцы æрмæджытæ дæр æмæ «Рособрнадзор»-ы бæрнджын адæймаджы дзуапп дæр Генпрокуратурæйы кæй уыдысты, уый тыххæй», – загъта тæрхонгæнæг.
«Рособрнадзор»-ы дзуаппæй бæрæг уыд, Фæцыбыргонд бæрндзинадимæ æхсæнад «Хорс-групп»-ы организацийæн ахуырадон архайды тыххæй ли-цензи кæй нæй.
ТЕДЕТЫ И.
