Аххосджынты бандоныл бадынц Хуыгаты Марат, Годжыцаты Зауыр, Бибылты Джумбер, Наниты Ацæмæз, Сланты Ирбег, Багаты Алан, Къозонты Сергей æмæ Джиоты Андрей.
Наниты Ацæмæз, Багаты Алан æмæ Годжыцаты Зауыр та республикæйы арæнтæй кæй нæ ахиздзысты, уый тыххæй сæ къухтæ кæй æрфыстой, уымæ гæсгæ ахст не сты.
Уæлдæр банысангонд адæймæгты ма аххосджын кæнынц Цхуырбаты Никъала æмæ Хъуылымбегты Герсаны фæнæмыны хъуыддаджы дæр.
Ацы хатт та фарстой Сæрмагонд нысаниуæджы милицийы къорды, Хуссар Ирыстоны Паддзахадон æдасдзинады комитеты Арæнхъахъхъæнæг управленийы, Мидхъуыддæгты министрады горæтон хайады æмæ Генералон прокуратурæйы минæ-вæрттæй аст æвдисæны – Куымæридтаты Нарикы, Къораты Георгийы, Джиоты Сæрмæты, Мæргъиты Уырызмæджы, Плиты Эдуарды, Бибылты Роланды, Елзарты Нодары æмæ Гæззаты Сосланы.
Адвокат бахатыд тæрхонгæнæгмæ, цæмæй æфхæрд баййафджытæ Цхуырбаты Никъала æмæ Хъуылымбегты Герсан сæхæдæг радтой æвдисæн дзырдтæ, ома, сæ хайадист æнæмæнг хъæуы. Уымæн æмæ развæлгъау æвдисæн дзырдтæ куы радтой, уæдæй фæстæмæ сæ хонынц тæрхондонмæ, фæлæ нæ цæуынц.
Адвокат Бæззайы фырт банысан кодта, зæгъгæ, 2024 азы 17 æмæ 22 январы рабадтыты рæстæджы прокуратурæйы минæвæртты фæндыд æфхæрд баййафæг Хъуылымбегты Герсан æмæ Цхуырбаты Никъалайы фæсарæйнаг æмбæстæгтыл банымайын, цæмæй ма æрцыдаиккой тæрхондонмæ, уый нысанæн. Фæндыд сæ сæ развæлгъау æвдисæн дзырдты сын æргомæй бакæсын, ома уыдонæй спайда кæнын.
«РХИ-йы æмбæстагдзинады принцптæ æмæ РХИ-йы æмбæстагдзинады фарстатæ æрбæстон кæныны фæткойты тыххæй» Конституцион закъонмæ гæсгæ, хуссарирыстойнаг æмбæстаг фæсарæнты куы цæра, уæддæр РХИ-йы æмбæстаг у», – бахахх кодта адвокат.
Тæхонгæнæг Кокойты Оксанæ æрдомдта, цæмæй Цхуырбаты Никъала æмæ Хъуылымбегты Герсан фæсарæйнаг æмбæстæгтæ кæй сты æмæ се ‘рцыд тæрхондонмæ æнæмæнгхъæуæг кæй нæу, уый сбæлвырд кæныны тыххæй тæрхондонмæ æрбавдисой нотариалонæй сбæлвырдгонд гæххæттытæ.
Дарддæр бамбарын кодта, тæрхондонон-медицинон эксперт Зæгъойты Заринæйы цæй тыххæй нæ фæхуыдтой, уый æмæ фехъусын кодта, тæрхондон Генпрокуратурæмæ цы куырдиат арвыста, æмæ цы дзуапп райста, уый.
Генпрокуратурæйы уынаффæйы нысан уыд, зæгъгæ, 2021 азы 5 июны Зæгъойты Заринæйыл бакондæуыд уголовон хъуыддаг, Дзабиты Иналы амæлæты хъуыддаджы йæ профессионалон архайды рæстæджы мæнг документтæ кæй сарæзта, уый тыххæй. Прокуратурæйы минæвары ныхæстæм гæсгæ, ацы хъуыддаджы фæдыл фæдысгарæн мадзæлттæ нырма нæ фесты.
Тæрхонгæнæг банысан кодта, 2024 азы 19 февралы Уæрæсейы Федерацийы æмæ Республикæ Хуссар Ирыстоны Мидхъуыддæгты министрадты информацион-координацион центрæй кæй райста Дзæ-гъиаты Заринæйы квалификаци бæл-вырдгæнæны тыххæй дзуаппы халдих. Документы фыст ис Уæрæсейы Мидхъуыддæгты министрад нырма дæр фæдысгарæн мадзæлттæ кæй уадзы ахуырадон уагдон «Хорс-Групп»-ы, сæ куырдиат сын сæххæст кæныны фæдыл æмæ прокуратурæйы минæварæн бахæс кодта, цæмæй сæм Дзæгъиаты чызджы профессионалон квалификацийы тыххæй цы официалон информаци ис, уый тæрхондонмæ æрбав-дисой. Фехъусын ма кодта, зæгъгæ, Дзабиты Иналы амæлæты факты фæдыл цалынмæ Дзæгъиаты Заринæйы процессуалон статусы тыххæй æмбæлон уынаффæ нæ райса тæрхонгæнæг, уæдмæ Заринæйæн æвдисæны хуызы бафæрсæн нæй.
Дарддæр фарстой æвдисæнты.
Куыд раздæры рабадтыты, афтæ ныр дæр фыдракæнды кæуыл дызæрдыг кæнынц, уыдон дæр фарстатæ лæвæрдтой æвдисæнтæм. Сæ сæйраг фарст та уыд:
«Дзабиты Иналимæ мæ федтай ныхасгæнгæ, кæнæ йæм æввахс бацæугæйæ, кæнæ махæй искæй федтай, Инал кæм уыд, уыцы территоримæ æввахс?»
Æвдисæнтæ иууылдæр иугъуызон дзуапп лæвæрдтой, зæгъгæ, уæ никæй фед-тон.
Генпрокуратурæйы экспертон-клиникон хайады сæргълæууæг Бибылты Роланд куыд радзырдта, афтæмæй 2020 азы 28 августы иу суткæ радгæс уæвгæйæ сæм Дыгъуызты Михаилимæ фæсидтысты рынчындоны моргмæ.
«Уым басгæрстам Дзабиты Иналы мард буар. Æз фотоаппаратæй систон буары цъæхтæ æмæ цъæррæмыхстытæ, фæлæ мæ компетенцимæ цæфтæ рæстæг сбæлвырд кæнын кæй нæ хауы, уый тыххæй сæ не сбæрæг кодтон», банысан кодта Роланд.
Паддзахадон æдасдзинады комитеты арæнхъахъхъæнæг управленийы кусæг Плиты Эдуард 23 августы иу суткæ радгæс куы уыд, уæд сæм æрбакодтой ахст адæймаджы. Бафæдзæхстой сæ, ахст адæймагæн сæ куыстмæ кæй ницы ахаст ис æмæ йæм бацæуой, уый бар сын кæй нæй.
Эдуард йæ хæдзармæ куы фæцæйцыд, уæд ахст адæймаг цы хатæны уыд, уырды-гæй фехъуыста: «Кæм ис хæцæнгарз?» æмæ дзуапп «Æз ницы зонын»
Йæ рады Мидхъуыддæгты министрады Агурæн управленийы хистæр Мæргъиты Уырызмæг дæр банысан кодта, зæгъгæ, «24 августы Мидхъуыддæгты управленимæ æрбакодтой Цхуырбаты Никъалайы, фæлæ йæ чысыл фæстæдæр фæстæмæ акодтой. Изæры та Дзабиты Иналы æрбакодтой, цæмæй йæ басгæрстаиккой æмæ йæ наркотикон буарадты æвæрыны тыххæй тæрхондонмæ арвыстаиккой. Дыккаг райсом Иналы акодтой тæрхондонмæ. Дыууæ боны дæргъы домдтам се ‘рцахсты cуагъæ, фæлæ нын æй нæ радтой, прокуратурæйы фæдысгарæг, дам, уæм æй бахæсдзæн. 27 августы мидхъуыддæгты министрæн уавæры тыххæй куы фехъусын кодтон, уæд нæм изæры фæдысгарæг Тъехты Олег документ æрбахаста æмæ нæм бахатыд, цæмæй йын рахицæн кодтаиккам æрфарсты тыххæй хатæн. Уыцы хатæны фарста Дзабийы фырты дæр. 28 августы Иналы акодтой Цырд фердæхты сæрмагонд къорды бæстыхаймæ», – дзыр-дта Мæргъийы фырт.
Мидхъуыддæгты министрады кусæг Джиоты Сæрмæт куыд радзырдта, афтæмæй уыцы азы августы улæфты уыд, фæлæ йæм куыстмæ фæсидтысты басгæрст уадзыны тыххæй.
«Хайад истон Цхуырбаты Никъалайы хæдзары сгарæн мадзалы æмæ мидхъуыддæгты министр Наниты Игоры амарынмæ бахъавды тыххæй Никъалайы ба-фарсты, фæлæ уый нæ саст фыдракæнды хайадистыл. Æндæр ницы хæслæвæрдтæ лæвæрдтон нæ кусджытæн, уымæн æмæ улæфты уыдтæн», – банысан кодта Сæрмæт.
Милицийы сæрмагонд нысаниуæджы къорды ротæйы командир Елдзарты Нодар куыд дзырдта, афтæмæй зонгæ уыд Цхуырбаты Никъалаимæ. Банысан кодта, зæгъгæ, 23 августы наряды уыд æмæ хайад иста Цхуырбайы фырты æрцахсты æмæ йын йæ хæдзары басгæрсты.
«23 августы æрцахстам Цхуырбайы фырты æмæ йæ Мидхъуыддæгты горæтон хайадмæ æрбакодтам. Уым æй фарстой. Никъалайы рагæй кæй зыдтон, уый тыххæй-иу бахызтæн, æрфарст цы хатæны уагътой, уырдæм», – дзырдта уый æмæ банысан кодта, зæгъгæ, нæ федта 23 августы Никъалайы ныхмæ исты тыхбахаст.
Мидхъуыддæгты горæтон хайады хистæр оперативон радгæс Къораты Георги 2020 азы 26 августы уыд суткæйон радгæс.
«Куыстмæ куы æрбацыдтæн, уæд сæ бафарстон: исчи нæм ахст ис æви – нæ. Загътой мын, Дзабиты Иналы кæй æрцахстой. Уый фæстæ та сæ бафарстон, къухдариуæгад зоны уыцы хабар. Æмæ та мын сдзуапп кодтой, «ойы», зæгъгæ. Уый фæстæ бахызтæн Иналмæ, йемæ зонгæ кæй уыдтæн, уый тыххæй, йемæ аныхас кодтон. Цалдæр хатты та йæ къахæвæрæнмæ ракодтон, фæлæ йыл физикон тыхбахасты фæдтæ нæ рахатыдтæн.
Мидхъуыддæгты горæтон хайады хистæр оперативон радгæс Куымæридтаты Нарик радзырдта, зæгъгæ, радгæс куы уыд, уыцы рæстæджы Дзабийы фырты ничи фæнадта, уый йæхи хорз хатыд.
Гæззаты Сосланы æвдисæн дзырдтæ дæр уабæрæг ницæмæй хицæн кодтой иннæ æвдисæнты дзырдтæй.
Тæрхондоны радон рабадт уыдзæн 11 мартъийы.
ОСИАТЫ Индирæ