Куыд æрвылаз, афтæ та ныр дæр горæт Цхинвалы микрорайонты рафидауын кодтой рæсугъд фæлыст ногазон назбæлæстæ. Горæты районты фæсивæд æрвылазон конкурсы фæлгæтты традицион æгъдауæй сæ кæртыты сæвæрынц наз бæлæстæ æмæ сæ сфæлындзынц алыгъуызон хъазæнтæй. Ахæм наз-бæлæстæ ацы аз горæты æвæрд æрцыд 12. Ног азы хæдразмæ уыдоныл азылдысты горæт Цхинвалы администрацийы сæргълæууæг Хуыгаты Ромео æмæ йæ хæдивджытæ. Саргъ кодтой хуыздæр назбæлас чи сфæлындзыдта, уыдонæн.
Иуæй-иу районты горæты администрацийы минæвæрттыл æмбæлдысты ирон æгъдаумæ гæсгæ æмæ сын уыдон дæр цæстуарзонæй кодтой ногазон арфæтæ. Районты цæрджытæ ног азмæ цы назбæлæстæ сфæлыстой, уыдоны цурæй хъуыстысты музыкæйы зæлтæ. Сывæллæттæ кастысты æмдзæвгæтæ, зарыдысты зарджытæ.
Конкурсы фыццаг бынат бацахста БАМ-ы микрорайоны назбæлас. «Ацы районы фæстаг дыууæ аз наз-бæлас нал сфæлындзыдтам. Йæ аххосаг – ацы районы цæрæг Дзабиты Иналы трагикон мæлæт. Фæлæ районы фæсивæд æрæмбырд стæм æмæ бадзырдтам ацы аз æнæмæнг кæй сæвæрдзыстæм назбæлас. Нæ районы цы гом спортивон фæзуат ис, уым æй сæвæрдтам! Фæлындзгæ та йæ кодтам цыппар боны. Сæ хайбавæрд æм хастой хистæртæ дæр æмæ фæсивæд дæр, суанг ма нæ алфæмблай цъилау зылдысты кæстæр кары сывæллæттæ дæр», – зæгъынц организатортæ.
Дыккаг æмæ æртыккаг бынæттæ та лæвæрд æрцыдысты Шанхай æмæ, Хъайтарты æмæ Исахъы уынгтæ кæм иу кæнынц, уыцы бынæтты æвæрд назбæлæстæн.
Конкурсы фæуæлахизуæвджыты схорзæхджын кодтой Театралон фæзуаты бæрæгбонон концерты рæстæджы.
Ирæтты уынджы, бирæпрофилон медицинон центры бахизæнмæ хæстæг цы наз бæлас æвæрд æрцыд, уымæн та лæвæрд æрцыд сæрмагонд приз, куыд оригиналон фæлыст назбæлас, афтæ.
УАЗÆГТЫ Марфæ
